پہلے زرداری تو اب خورشید شاہ کی طبیعت بگڑ گئی

سکھر: سیاستدانوں کو نیب کی کسٹڈی میں بہت مشکلات کا سامنا ہے ، کبھی شہباز شریف تو کبھی نواز شریف کی طبیعت بگڑجاتی ہے ، ایسے ہی ابھی یہ اطلاعات آرہی تھیں کہ سابق صدر آصف علی زرداری کے دل کا ایک وال بند ہے تو ساتھ ہی خورشید شاہ کی طبیعت خراب ہونے کی خبریں گردش کرنا شروع ہوگئیں

باغی ٹی وی کے مطابق خورشید شاہ کی طبیعت بھی بگڑ گئی۔ذرائع کے مطابق خورشید شاہ عارضہ قلب کی وجہ سے این آئی سی وی ڈی میں داخل ہیں جہاں ان کی حالت مزید خراب ہو گئی ہے۔ خورشید شاہ کے دل کی شریانوں میں تکلیف بڑھ جانے کی شکایت ہے۔

این آئی سی وی ڈی ہسپتال کے سربراہ امراض دل کے ماہر ڈاکٹر ندیم قمر سکھر پہنچ گئے اور انہوں نے خصوصی طور پر پیپلز پارٹی رہنما کا طبی معائنہ کیا۔واضح رہے کہ خورشید شاہ کی طبیعت خراب ہونے کے باعث 27 اکتوبر کو این آئی سی وی ڈی ہسپتال منتقل کیا گیا تھا جہاں وہ گزشتہ 5 روز سے ڈاکٹرز کی آبزرویشن میں ہیں۔

ہسپتال ذرائع کے مطابق پیپلز پارٹی رہنما خورشید شاہ کے دل کی 2 شریانیں متاثر ہونے پر ان کے انجیو گرافی ٹیسٹ کرنے کا فیصلہ کیا گیا اور ڈاکٹر ندیم قمر نے خود خورشید احمد شاہ کی انجوگرافی کی۔خورشید شاہ کی انجیو گرافی کی رپورٹ چیئرمین قومی احتساب بیورو (نیب) کو بھی بھجوا دی گئی۔