fbpx

جنوبی افریقہ میں مہاتما گاندھی کی پڑپوتی کو دھوکہ دہی کے الزام میں سات سال قید کی سزا

جنوبی افریقہ کی ایک عدالت نے مہاتما گاندھی کی پڑپوتی کو دھوکہ دہی اور جعلسازی کے الزام میں سات سال قید کی سزا سنائی ہے۔

باغی ٹی وی : جنعبی افریقہ کی عدالت نے 62 لاکھ رینڈ کی دھوکہ دہی کے الزام میں سزا سنا ئی رینڈ جنوبی افریقہ کی کرنسی ہے اور انڈین روپے میں اس مبینہ دھوکہ دہی کی کل رقم تقریباً 32 لاکھ 50 ہزار روپے تک ہے۔

پیر کے روز ڈربن کی ایک عدالت نے 56 سالہ آشیش لتا رامگووند کو سزا سنائی۔ آشیش لتا پر صنعتکار ایس آر مہاراج کو دھوکہ دینے کا الزام ہے۔

ایس آر مہاراج نے مبینہ طور پر انھیں انڈیا سے ایک کھیپ درآمد کرنے اور کسٹم ڈیوٹی کو کلیئر کرنے کے لیے 62 لاکھ رینڈ دیے۔ تاہم اصل میں اتنی کسٹم ڈیوٹی تھی ہی نہیں۔ لتا سے یہ وعدہ بھی کیا گیا تھا کہ ان کو منافع کا حصہ دیا جائے گے۔

میڈیا رپورٹس کے مطابق یہ کیس 2015 کا ہے۔ جب آشیش لتا کے خلاف مقدمے کی سماعت کا آغاز ہوا تو جنوبی افریقہ کی قومی پراسیکیوشن اتھارٹی (این پی اے) کے بریگیڈیئر ہنگوانی مولود جی نے کہا تھا کہ لتا نے مبینہ طور پر ممکنہ سرمایہ کاروں کو جعلی رسیدیں اور دستاویزات دکھا کر راضی کرنے کی کوشش کرتے ہوئے یہ بتایا کہ لیلن کے تین کنٹینر انڈیا سے آ رہے ہیں۔

اس وقت آشیش لتا کو 50 ہزار رینڈ کی ضمانت پر رہا کیا گیا تھا۔

پیر کو سماعت کے دوران عدالت کو بتایا گیا کہ آشیش لتا نے اگست 2015 میں ‘نیو افریقہ الائنس فٹ ویئر ڈسٹری بیوٹرز’ کے ڈائریکٹر ایس آر مہاراج سے ملاقات کی تھی-

آشیش لتا نے مہاراج کو بتایا تھا کہ انھوں نے ‘جنوبی افریقی ہسپتال گروپ نیٹ کیئر’ کے لیے کپڑے کے تین کنٹینر منگوائے ہیں۔

مقامی میڈیا میں شائع ہونے والی اطلاعات کے مطابق آشیش لتا کے خاندانی پس منظر اور نیٹ کیئر دستاویزات دیکھ کر مہاراج نے اس قرض کے لیے ان سے تحریری معاہدہ کیا تھا تاہم بعد میں جب انھیں دھوکہ دہی کے بارے میں پتا چلا تو انھوں نے آشیش لتا کے خلاف فوجداری کا مقدمہ درج کرایا۔

واضح رہے کہ آشیش لتا انسانی حقوق کے معروف کارکن الہ گاندھی اور مرحوم میوا رامگووند کی بیٹی ہیں۔ الہ گاندھی منی لال گاندھی کی بیٹی ہیں جو مہاتما گاندھی کے چار بیٹوں میں سے دوسرے نمبر پر تھے۔

جواب چھوڑیں

آپ کا ای میل ایڈریس شائع نہیں کیا جائے گا.