پشاور:اسلامو فوبیا کیخلاف 15مارچ کو عالمی دن منایا جائےگا:اطلاعات کے مطابق مراد سعید نے کہا ہے کہ اسلامو فوبیا کیخلاف 15مارچ کو عالمی دن منایا جائے گا۔پی ٹی آئی رہنما مراد سعید نے کہا کہ پاکستان کو دہشتگردی کے پروپیگنڈے سےجوڑا گیا، ان کا ہر عمل یہ بتا رہا ہے کہ یہ کتنا گر سکتے ہیں۔
انہوں نے کہا کہ دہشتگردی کیخلاف جنگ میں 80ہزارجانوں کانذرانہ پیش کیا، دہشتگردی کیخلاف جنگ میں سیکیورٹی فورسزکے جوان شہید ہوئے۔پی ٹی آئی رہنما کا کہنا تھا کہ عمران خان نے ہر فورم پر اسلامو فوبیا کیخلاف آواز اٹھائی، اسلاموفوبیا کیخلاف 15مارچ کو عالمی دن منایا جائےگا۔
مراد سعید کا یہ بھی کہنا تھا کہ عمران خان عالم اسلام کے سفیر بن کر باہر آئے جبکہ عمران خان کشمیرکے سفیر بن کر اقوام متحدہ بھی گئے۔
اقوام متحدہ کی جنرل اسمبلی نے 15 مارچ کو ‘انٹرنیشنل ڈے ٹو کامبیٹ اسلاموفوبیا‘ یعنی اسلاموفوبیا مخالف عالمی دن منانے کی پاکستان کی طرف سے پیش کردہ قرارداد منظور کر لی۔ تنظیم اسلامی تعاون (او آئی سی) کے 57 رکن ممالک کے علاوہ چین اور روس سمیت آٹھ دیگر ملکوں نے بھی قرارداد کی تائید کی تھی۔
اقوام متحدہ میں پاکستان کے سفیر منیر اکرم نے قرارداد پیش کرتے ہوئے کہا کہ اسلاموفوبیا ایک حقیقت ہے اور جنرل اسمبلی کے اراکین نے نشان دہی کی کہ یہ رجحان بڑھ رہا ہے اور اس کا ازالہ کرنا چاہیے۔انہوں نے کہا کہ اسلاموفوبیا کے نتائج نفرت انگیز تقریر، تفریق اور مسلمانوں کے خلاف جرائم ہیں اور یہ دنیا کے کئی خطوں میں پھیل رہا ہے۔ یہ مسلمانوں کی مذہبی آزادی اور عقائد کے خلاف ہے اور اس کے نتیجے میں اسلامی دنیا میں شدید تکلیف محسوس کی جارہی ہے۔
قرارداد منظور کیے جانے کے بعد اقوام متحدہ کے تمام رکن ممالک، اس کے متعلقہ اداروں، دیگر علاقائی اور بین الاقوامی تنظیموں، سول سوسائٹی، نجی شعبہ اور مذہبی تنظیموں کو مناسب انداز میں عالمی سطح پر یہ دن منانے کی دعوت دی گئی ہے۔
