وزیر اعظم شہباز شریف سے اوور سیز کشمیریوں کے وفد کی ملاقات

کشمیر میں بھارتی قابض افواج کے مظالم کی نوعیت غزہ کی طرح ہے
0
93
kashmir

اسلام آباد: وزیر اعظم شہباز شریف سے اوور سیز کشمیریوں کے ایک وفد نے وزیر اعظم سیکرٹریٹ میں ملاقات کی-

باغی ٹی وی : کشمیری وفد میں ڈاکٹر غلام نبی فائی، نذیر قریشی، محمد غالب، مزمل ایوب ٹھاکر، فہیم کیانی، ظفر قریشی، سردار ذوالفقار روشن خان اور ڈاکٹر ولید رسول شامل تھے، وزیر اعظم شہباز شریف نے جموں و کشمیر کے تنازع اور بھارت کے غیر قانونی طور پر مقبوضہ جموں و کشمیر کے لوگوں کی حالت زار کے بارے میں عالمی سطح پر آگاہی بڑھانے کیلئے کشمیری کارکنوں کی کوششوں کو سراہا،انہوں نے کشمیریوں کے ناقابل تنسیخ حق خودارادیت کے حصول کے لیے کشمیریوں کی جدوجہد کے لیے پاکستان کی غیر متزلزل اخلاقی، سفارتی اور سیاسی حمایت کا اعادہ کیا، پائیدار امن اقوام متحدہ کی سلامتی کونسل کی متعلقہ قراردادوں اور کشمیری عوام کی امنگوں کے مطابق جموں و کشمیر تنازعہ کے منصفانہ حل پر منحصر ہے۔

انہوں نے کہ کشمیری بھائیوں اور بہنوں کی حمایت میں آواز اٹھانے میں کوئی کسر نہیں چھوڑی، 2022 کے اقوام متحدہ کی جنرل اسمبلی کے ساتھ ساتھ شنگھائی تعاون تنظیم سمیت دیگر فورمز اور دیگر عالمی رہنماؤں کے ساتھ ان کے حقوق پر بات چیت کی ہے۔

وفد نے وزیراعظم کو بتایا کہ کشمیر میں بھارتی قابض افواج کے مظالم کی نوعیت غزہ کی طرح ہے،بے گناہ شہریوں کا قتل، نسلی تطہیر اور زمینوں پر قبضے کا آپریشن تیز رفتاری سے جاری ہے، سکول کے بچوں کو اسلام سے دور کرنے کیلئے ایک منصوبہ بندی کی گئی ہے اور تعلیمی اداروں میں ہندو مذہبی منتر پڑھائے جا رہے ہیں، عالمی برادری بالخصوص اقوام متحدہ اور او آئی سی کو بھارتی حکومت کی ان مذموم سرگرمیوں کا سنجیدگی سے نوٹس لینا چاہیے اور انسانی حقوق کی ان خلاف ورزیوں سے باز رہنا چاہیے،وفد نے سیاسی قیدیوں کے حالات پر بات چیت کرتے ہوئے کہا کہ یاسین ملک، شبیر احمد شاہ، مسرت عالم، آسیہ اندرابی، ناہید فہمیدہ، صوفی نسرین، خرم پرویز، ڈاکٹر حمید فیاض اور دیگر کی رہائی کے لیے حکمت عملی تیار کرنے کی ضرورت ہے۔

Leave a reply