دنیا کے خرابے میں مَیں افلاس کو لے کر،شاعر:صفدر بھٹی

دنیا کے خرابے میں مَیں افلاس کو لے کر

بیٹھا ہوں بڑی دیر سے اک آس کو لے کر

سینے میں جو پیوندِ گنہ گاری لگا ہے

کچھ کیجے مداوا بھی اسی یاس کو لے کر

جب حبس بڑھی شہرِ ستم گار میں یارو

سب چل دیے احباب تو انفاس کو لے گر

اک ہم تھے مگر تان کے جذبات کھڑے تھے

بے حسی کے سیلاب میں احساس کو لے کر

کہتی تھی بہو لکھوں گی مظلوم کہانی

شوہر کو سسر اور مری ساس کو لے کر

اور ساس کہ دیتی تھی دہائی مرے مالک

ہم لوگ تو غارت ہوے خنّاس کو لے کر

صفدر نہ رہے بیلے نہ لسی ہے نہ چُوری

اب ہیر بھی آئے گی تو تھرماس کو لے کر

.......................................................

وصلِ دلدار بھی اس بے سر و سامانی میں

عکسِ مہتاب ہو جوں دور کُھلے پانی میں

حسن گھائل ہوا فکرِ زر و دیناری پر

عشق ناچار ہے افلاس کی زندانی میں

گنجِ قارون کروں تجھ کو ودیعت جاناں

دسترس پاوں اگر قدرتِ یزدانی میں

یک شبِ سرما کسی شاہدِ بازاراں پر

دل وہیں بھول گئے نرگسِ صہبانی میں

تھا قبا پوشی میں وہ سحر کہ جو تھا سو تھا

روپ کے رنگ نہایت کِھلے عریانی میں

پرفسوں خوب ہی تھا روئے طرح داری وہ

گر پڑا دل کہ وہیں چاہِ زنخدانی میں

عضو در عضو جو دیکھا کیے معلوم پڑا

ہائے بے مثل سا پیکر بنو انسانی میں

زینتِ بام بہ یک کوچہِ بے توقیراں

تف بہ جس جھونکا تجھے آتشِ شہوانی میں

صفدرا تیری حکایاتِ دلِ شاہد باز

خوب ہی رنگ بھریں یہ تو غزلخوانی میں