پیر، 16 نومبر، 2026
Baaghi TV Logo
ٹرینڈنگ

ہجوم میں گم انسان، تحریر: زینب جہانزیب

نقطہ نظر
zainab jahazeb

انسان بھی کتنا عجیب ہے، ساری زندگی کسی نہ کسی کی تلاش میں گزار دیتا ہے۔ کبھی اسے اپنے جیسا کوئی شخص درکار ہوتا ہے، کبھی کوئی ایسا ہم راز جس کے سامنے وہ اپنے دل کی تمام باتیں رکھ سکے اور کبھی محض ایک ایسا وجود جو اس کی خاموشی کو بھی گفتگو سمجھ کر سن سکے۔ مگر اس تلاش کے دوران وہ یہ بھول جاتا ہے کہ جس دنیا میں وہ اپنے لیے کسی کو ڈھونڈ رہا ہے، وہاں ہر شخص اپنی ذات کے گرد ایک الگ دنیا آباد کیے بیٹھا ہے۔


آج ہم ایک ایسے عہد میں جی رہے ہیں جہاں لوگوں کا تو ہجوم ہے، مگر انسانیت کے اظہار میں کم ہوگیا ہے۔ بازاروں میں رونق ہے، محفلوں میں قہقہے ہیں، سڑکوں پر لوگوں کا ہجوم ہے، رابطوں کے بے شمار ذرائع موجود ہیں، لیکن ان سب کے باوجود ایک عجیب سی تنہائی ہمارے معاشرے میں جڑ پکڑتی جا رہی ہے۔ یہ وہ تنہائی نہیں جس میں انسان کے آس پاس کوئی موجود نہ ہو، بلکہ یہ وہ کیفیت ہے جس میں اس کے اردگرد بہت سے لوگ ہوتے ہیں، مگر اس کا اپنا کوئی نہیں ہوتا۔


کبھی کسی بھری ہوئی محفل میں بیٹھ کر لوگوں کے چہروں کا مطالعہ کیجیے۔ بظاہر ہر شخص اپنی زندگی میں مصروف دکھائی دے گا۔ کوئی ہنس رہا ہوگا، کوئی گفتگو میں مشغول ہوگا، کوئی اپنے دوستوں کے ساتھ خوش گپیوں میں مصروف ہوگا، لیکن ان چہروں کے پیچھے چھپی کہانیاں کون جانتا ہے؟ کون جانتا ہے کہ اس مسکراتے ہوئے شخص نے گزشتہ رات کس کرب میں گزاری ہے؟ کس نے اپنی آنکھوں کی نمی کو مسکراہٹ کے پیچھے چھپایا ہے اور کون ہے جو ہر روز خود کو یہ سمجھا کر گھر سے نکلتا ہے کہ زندگی جیسے بھی گزر رہی ہے، گزارنی تو ہے۔


ہم نے انسانوں کو ان کی ظاہری حالت سے پرکھنے کی عادت بنا لی ہے۔ جو شخص ہنستا ہے، اسے خوش حال سمجھ لیتے ہیں، جو خاموش رہتا ہے، اسے مغرور قرار دے دیتے ہیں اور جو اپنی پریشانیوں کا ذکر نہیں کرتا، ہمیں لگتا ہے کہ اسے کسی سہارے کی ضرورت ہی نہیں۔ حالاں کہ بعض اوقات انسان اپنی تکلیف بیان نہ کرنے کا فیصلہ اس لیے نہیں کرتا کہ اسے کوئی تکلیف نہیں، بلکہ اس لیے کرتا ہے کہ وہ کئی مرتبہ اپنے احساسات کی وضاحت کرتے کرتے تھک چکا ہوتا ہے۔


یہ بھی ایک حقیقت ہے کہ انسان ہمیشہ اپنے دکھوں سے نہیں ٹوٹتا، بعض اوقات وہ لوگوں کے رویوں سے زیادہ تھک جاتا ہے۔ وہ جنہیں اپنا سمجھ کر اپنی زندگی میں جگہ دیتا ہے، جب وہی لوگ اس کی موجودگی کو غیر اہم سمجھنے لگیں تو انسان کے اندر ایک خاموش تبدیلی جنم لیتی ہے۔ وہ آہستہ آہستہ اپنی باتیں کم کر دیتا ہے، اپنی خواہشات کا ذکر چھوڑ دیتا ہے اور پھر ایک وقت ایسا آتا ہے جب اسے اپنی خوشی اور پریشانی کسی سے بیان کرنے کی ضرورت ہی محسوس نہیں ہوتی۔ لوگ اسے مطمئن سمجھتے ہیں، مگر حقیقت میں وہ اپنی ذات کے ساتھ رہنا سیکھ چکا ہوتا ہے۔


ہمارے معاشرے کا ایک بڑا المیہ یہ بھی ہے کہ ہم دوسروں کی زندگیوں میں دلچسپی تو بہت لیتے ہیں، مگر ان کے احساسات میں دلچسپی لینے کا ہنر کھوتے جا رہے ہیں۔ ہمیں معلوم ہوتا ہے کہ کس کے گھر کیا ہوا، کون کہاں گیا، کس نے کیا خریدا اور کس کی زندگی میں کیا تبدیلی آئی، لیکن یہ جاننے کی فرصت نہیں ہوتی کہ ہمارے قریب رہنے والا انسان اندر سے کس حال میں ہے۔ ہم کسی کی کامیابی پر تبصرہ کرنے میں دیر نہیں لگاتے، مگر کسی کی خاموش جدوجہد کو تسلیم کرنے میں بخل سے کام لیتے ہیں۔


شاید ہم نے تعلقات کو بھی اپنی سہولت کے مطابق سمجھنا شروع کر دیا ہے۔ جب تک کوئی ہماری بات سنتا رہے، ہماری ضرورت پوری کرتا رہے اور ہماری توقعات پر پورا اترتا رہے، وہ ہمارے لیے اہم رہتا ہے۔ لیکن جس دن اسے خود کسی کی توجہ درکار ہو، ہم اپنی مصروفیات کا عذر پیش کر دیتے ہیں۔ ہم چاہتے ہیں کہ لوگ ہماری خاموشی سمجھیں، مگر دوسروں کی خاموشی کو سمجھنے کی کوشش نہیں کرتے۔ ہم چاہتے ہیں کہ کوئی ہمارے بغیر کہے ہماری کیفیت جان لے، مگر کسی دوسرے کے چہرے پر لکھی تھکن پڑھنے کی زحمت نہیں کرتے۔


یہاں ایک سوال پیدا ہوتا ہے کہ کیا واقعی انسان اتنا مصروف ہو گیا ہے کہ اسے اپنے اردگرد موجود لوگوں کے لیے وقت نہیں ملتا، یا پھر اس نے اپنی ترجیحات میں انسانوں کو کہیں بہت پیچھے چھوڑ دیا ہے؟ اگر ایک شخص سارا دن سینکڑوں لوگوں سے بات کرنے کے باوجود اپنے دل کی بات کہنے کے لیے کسی ایک شخص کو تلاش کرتا رہے تو شاید مسئلہ رابطوں کی کمی کا نہیں، احساس کی کمی کا ہے۔


ہمیں یہ سمجھنا ہوگا کہ ہر انسان کی زندگی میں کچھ ایسے گوشے ہوتے ہیں جہاں تک کسی دوسرے کی رسائی نہیں ہوتی۔ ہر شخص اپنے حصے کی کوئی نہ کوئی جنگ لڑ رہا ہوتا ہے۔ کسی کو معاشی مسائل نے گھیر رکھا ہے، کوئی رشتوں کی بے اعتنائی سے پریشان ہے، کوئی اپنے مستقبل کے خوف میں مبتلا ہے اور کوئی ماضی کے کسی ایسے واقعے کو اپنے ساتھ لیے پھر رہا ہے جس کا ذکر وہ کسی سے نہیں کر سکتا۔ اس لیے کسی کے بارے میں رائے قائم کرنے سے پہلے یہ سوچ لینا چاہیے کہ ممکن ہے جس شخص کو ہم بے فکر سمجھ رہے ہیں، وہ اپنی زندگی کے مشکل ترین دور سے گزر رہا ہو۔


زندگی بہت مختصر ہے۔ اسے ایک دوسرے کو نظرانداز کرنے، احساسات کو مجروح کرنے اور تعلقات کو اپنی انا کی بھینٹ چڑھانے میں ضائع نہیں کرنا چاہیے۔ کبھی کسی کے پاس بیٹھ کر اس کی بات سن لیجیے، کبھی کسی کی خیریت محض رسم کے طور پر نہیں بلکہ دل سے دریافت کیجیے اور کبھی کسی ایسے شخص کو یہ احساس دلا دیجیے کہ اس کی موجودگی آپ کے لیے اہمیت رکھتی ہے۔ یقین جانیے، بعض اوقات انسان کو کسی بڑے سہارے کی ضرورت نہیں ہوتی، اسے صرف یہ یقین درکار ہوتا ہے کہ اس کی آواز سننے والا کوئی موجود ہے۔


اور آخر میں شاید اس پورے المیے کی سب سے تلخ حقیقت یہی ہے کہ ہم سب کسی نہ کسی ہجوم کا حصہ ہیں۔ کوئی اپنے خوابوں کے ہجوم میں گم ہے، کوئی خواہشات کے، کوئی رشتوں کے اور کوئی اپنی ہی بنائی ہوئی مصروفیات کے۔ ہم ایک دوسرے کے قریب سے گزرتے ہیں، ایک دوسرے کو دیکھتے ہیں، سلام کرتے ہیں، مسکراتے ہیں، مگر ایک دوسرے تک پہنچ نہیں پاتے۔


کبھی کبھی سوچتی ہوں کہ انسان کو سب سے زیادہ تکلیف تنہا رہ جانے سے نہیں ہوتی، بلکہ اس احساس سے ہوتی ہے کہ وہ جن لوگوں کے درمیان اپنی موجودگی کو اہم سمجھتا رہا، ان کے لیے اس کی غیر موجودگی بھی شاید کوئی معنی نہیں رکھتی۔ شاید اسی لیے آج کا انسان ہجوم سے بھاگتا نہیں، ہجوم میں رہتا ہے، اس کا حصہ بنتا ہے، مگر اپنی ذات کے کسی خاموش گوشے میں خود کو چھپائے رکھتا ہے۔


اور یہ کیسا المیہ ہے کہ دنیا کے اس بے پناہ ہجوم میں ہر شخص کسی نہ کسی کو تلاش کر رہا ہے، مگر شاید ہی کوئی کسی کو واقعی سمجھنے کی کوشش کر رہا ہے۔