سرمایہ کم مگرحوصلہ بلند، اسلام آباد کے نوجوان نے ایک بیگ میں چلتی پھرتی کافی شاپ سجا کر سب کو حیران کردیا

وفاقی دارالحکومت اسلام آباد کی سڑکوں پر کافی فروخت کرنے والا یہ نوجوان محض کافی نہیں بیچ رہا، بلکہ اپنی محنت، خودداری اور حوصلے سے ایک باوقار زندگی گزارنے کا پیغام بھی دے رہا ہے۔

کچھ لوگ حالات بدلنے کے منتظر رہتے ہیں، جبکہ کچھ انہی حالات میں اپنے لیے کامیابی کی راہیں تلاش کرتے ہیں۔ راجا اسامہ الیاس بھی ایسے ہی باہمت نوجوانوں میں شامل ہے، جس نے محدود وسائل کے باوجود اپنے خواب کو حقیقت کا روپ دینے کے لیے عملی جدوجہد شروع کردی ہے۔

اسلام آباد کے علاقے آئی ایٹ میں ایک نوجوان بھاری بیگ اٹھائے لوگوں کے درمیان گھومتا دکھائی دیتا ہے۔ اس بیگ میں کافی تیار کرنے کا سامان موجود ہے، جو اس کے چھوٹے سے کاروبار کا ذریعہ ہے۔ نہ کوئی دکان، نہ بڑا کیفے اور نہ ہی لاکھوں روپے کی سرمایہ کاری، بس ایک بیگ، کافی بنانے کی چند ضروری اشیا اور کچھ کر دکھانے کا جذبہ!راجا اسامہ کا کاروباری آئیڈیا اپنی نوعیت کا منفرد ہے۔ عموماً کافی پینے کے شوقین افراد کو کسی کیفے یا دکان کا رخ کرنا پڑتا ہے، لیکن اس نوجوان نے کافی لوگوں تک پہنچانے کا ایک مختلف طریقہ اختیار کیا ہے۔ وہ اپنی پوری کافی شاپ ایک بیگ میں سمیٹ کر خود گاہکوں کے پاس پہنچ جاتا ہے۔ پاکستان میں چلتے پھرتے اس انداز سے کافی فروخت کرنے کا رجحان ابھی عام نہیں، یہی وجہ ہے کہ اس کا منفرد کاروباری انداز لوگوں کی توجہ حاصل کررہا ہے۔

راجا اسامہ ماسٹرز کا طالب علم ہے اور اسے ابتدا ہی سے کھانے پینے کے کاروبار میں دلچسپی تھی۔ تاہم جب اس نے ہوٹل یا کیفے کھولنے کے اخراجات کا جائزہ لیا تو اسے اندازہ ہوا کہ محدود وسائل کے ساتھ اس شعبے میں کاروبار شروع کرنا آسان نہیں۔ اسی دوران اس کے ذہن میں ایک منفرد خیال آیا اور اس نے دکان کھولنے کے بجائے خود لوگوں تک کافی پہنچانے کا فیصلہ کیا۔

راجا اسامہ نے اپنے کاروبار کے لیے تقریباً 9 ہزار روپے کی لاگت سے ایک خصوصی بیگ تیار کروایا اور انتہائی محدود سرمائے سے کام شروع کردیا۔ اس نے کافی کی قیمتیں بھی عام لوگوں کی قوتِ خرید کو مدنظر رکھتے ہوئے مقرر کیں۔ وہ مختلف اقسام کی کافی کے کپ 100 سے 300 روپے میں فروخت کرتا ہے، تاکہ طلبہ سمیت ہر طبقے کے افراد اس کی کافی خرید سکیں۔

تاہم اس سفر میں راجا اسامہ کے لیے سب سے بڑا چیلنج صرف بھاری بیگ اٹھانا یا گھنٹوں کھڑے رہنا نہیں تھا، بلکہ لوگوں کے سامنے اپنے کام کو اعتماد کے ساتھ قبول کرنا بھی ایک مشکل مرحلہ تھا۔راجا اسامہ کے مطابق جب اس نے کاروبار شروع کیا تو ابتدا میں شرمندگی کے باعث ماسک پہن کر آتا تھا۔ لوگوں کے درمیان کھڑے ہوکر کافی فروخت کرنا اس کے لیے آسان نہیں تھا۔ شروع میں اسے گھبراہٹ کا سامنا بھی کرنا پڑا اور خود اعتمادی کی کمی بھی محسوس ہوتی تھی۔ مگر پھر اس نے سوچا کہ محنت کرنے میں شرم کیسی؟ جو کام حلال روزی اور اپنے خوابوں کی تکمیل کا ذریعہ بنے، اس پر فخر ہونا چاہیے۔

’آہستہ آہستہ اس کا اعتماد بڑھا، لوگوں نے اس کے کام کو سراہنا شروع کیا اور سوشل میڈیا پر اس کی ویڈیو وائرل ہونے کے بعد اسے مزید پذیرائی ملی۔ اب لوگ نہ صرف اس سے کافی خریدتے ہیں بلکہ اس کے کاروباری آئیڈیا اور محنت کی بھی تعریف کرتے ہیں۔‘

راجا اسامہ کا خواب ہے کہ مستقبل میں اس طرز کے مزید کافی بیگز اور چھوٹے کاروبار شروع ہوں، تاکہ دوسرے نوجوان بھی محدود سرمائے سے اپنا روزگار شروع کرکے اپنے پاؤں پر کھڑے ہوسکیں۔

یہ کہانی محض کافی فروخت کرنے والے ایک نوجوان کی جدوجہد نہیں، بلکہ ان تمام نوجوانوں کے لیے ایک پیغام ہے جو بے روزگاری، محدود سرمائے یا لوگوں کے ردعمل کے خوف سے اپنا کاروبار شروع کرنے میں ہچکچاہٹ محسوس کرتے ہیں۔راجا اسامہ نے ثابت کردیا کہ کاروبار شروع کرنے کے لیے ہمیشہ بڑی دکان، بھاری سرمائے یا کسی بڑے نام کی ضرورت نہیں ہوتی۔ بعض اوقات صرف 9 ہزار روپے کی لاگت سے تیار کردہ ایک بیگ بھی کسی بڑے خواب کو حقیقت میں بدلنے کی جانب پہلا قدم ثابت ہوسکتا ہے۔

کیونکہ محنت کرنے والے ہاتھ کبھی چھوٹے نہیں ہوتے، اور اپنے خوابوں کے لیے اٹھایا گیا پہلا قدم ہی کامیابی کی اصل شروعات ہوتا ہے۔