ایکواڈور: لائیو عبادت کے دوران صلیب گرنے سے پادری ہلاک، ویڈیو وائرل

ایکواڈور کے شہر گوایاکل میں عبادت کی براہِ راست نشریات کے دوران دیوار پر نصب لکڑی کی بھاری صلیب گرنے سے کیتھولک پادری جان کی بازی ہار گئے، واقعے کی ویڈیو سوشل میڈیا پر وائرل ہوگئی۔

امریکی ٹی وی این بی سی کی رپورٹ کے مطابق پادری پیٹریسیو الفریدو سانچیز مولیناری ہفتہ 17 اکتوبر کو چرچ نوسٹرا سینیورا ڈیل سوکورو میں عبادت کروارہے تھے کہ اسی دوران ان کے پیچھے لگی صلیب اچانک دیوار سے الگ ہو کر ان کے سر پر آ گری اور وہ موقع پر ہی ہلاک ہوگئے۔

کوسٹا ریکا کے خبر رساں ادارے ’سی آر ہوئے‘ کے مطابق امدادی عملہ چند منٹ میں موقع پر پہنچا اور پادری کی موت کی تصدیق کر دی۔

چرچ کی مقامی انتظامیہ آرچ ڈایوسیس نے فیس بک اور انسٹاگرام پر جاری بیان میں پادری کی وفات کا اعلان کیا۔