پنجابی ایکشن کامیڈی فلم ’’مینگو جٹ‘‘ کا ٹریلر ریلیز

حمیم پروڈکشنز کے بینر تلے بننے والی پنجابی ایکشن کامیڈی فلم ’’مینگو جٹ‘‘ کا آفیشل ٹریلر گلبرگ کے ایک سینما میں منعقدہ تقریب کے دوران جاری کردیا گیا۔ حریم فاروق کی پروڈیوس کردہ فلم ’’مینگو جٹ‘‘ کی نمایاں کاسٹ میں فیصل قریشی، حریم فاروق، شمعون عباسی، قیصر پیا، ہنی البیلا، علی محمد، نواز انجم، حسن مراد اور عائشہ جہانزیب شامل ہیں۔ فلم کے ٹریلر کی رونمائی کے موقع پر پروڈیوسر اور اداکارہ حریم فاروق، اداکار قیصر پیا، ہنی البیلا، ندیم مانڈوی والا، راشد خواجہ، فلم ساز صفدر ملک، معروف ڈائریکٹر شہزاد رفیق، اسلم حسن، رابعہ حسن سمیت شوبز سے وابستہ نمایاں شخصیات کی بڑی تعداد موجود تھی۔ ایکشن، کامیڈی، رومانس اور خاندانی جذبات کا امتزاج لیے ’’مینگو جٹ‘‘ کی کہانی مراد جٹ کے گرد گھومتی ہے، جو پنجاب پولیس کا ایک افسر ہے۔ مراد جٹ اپنے خطرناک سابق ساتھی منور مرزا سے مریم اور اس کے تین بچوں کی حفاظت کی ذمہ داری اٹھاتا ہے۔ کہانی اس وقت ایک نیا رخ اختیار کرتی ہے جب مریم اور اس کے بچے ایک گاؤں میں پناہ لینے پہنچتے ہیں۔ اس دوران مراد کی زندگی میں غیر متوقع رشتے جنم لیتے ہیں، جو اسے محبت، وفاداری اور خاندان کے ایک نئے احساس سے روشناس کراتے ہیں۔ فلم کے حوالے سے گفتگو کرتے ہوئے پروڈیوسر اور مرکزی اداکارہ حریم فاروق نے کہا کہ ’’مینگو جٹ‘‘ ان کے لیے انتہائی ذاتی اور اہم فلم ہے۔ ان کے مطابق پہلی سولو پروڈکشن کے طور پر یہ فلم ان کے فنی سفر میں ایک نئے باب کا آغاز ہے۔ حریم فاروق نے کہا کہ فلم کو بے پناہ محبت اور پنجابی سنیما کے ساتھ گہرے یقین کے ساتھ بنایا گیا ہے، جبکہ پنجابی سنیما میں ناظرین کو بھرپور تفریح فراہم کرنے کی صلاحیت موجود ہے۔ انہوں نے بتایا کہ فلم کی ڈسٹری بیوشن ندیم مانڈوی والا کریں گے۔ حریم فاروق نے کہا کہ انہیں خوشی ہے کہ ندیم مانڈوی والا ’’مینگو جٹ‘‘ کے ساتھ منسلک ہیں، کیونکہ ان کا تجربہ، پاکستانی سنیما سے وابستگی اور تھیٹر کے منظرنامے کی سمجھ انہیں فلم کو ملک بھر کے ناظرین تک پہنچانے کے لیے ایک اہم شراکت دار بناتی ہے۔ حریم فاروق نے مزید بتایا کہ حمیم پروڈکشنز کے بینر تلے پروڈیوس ہونے والی اور ندیم مانڈوی والا کی جانب سے ڈسٹری بیوٹ کی جانے والی فلم ’’مینگو جٹ‘‘ 16 اکتوبر 2026 کو ملک بھر کے سینما گھروں میں نمائش کے لیے پیش کی جائے گی۔