لاہور:سرور فاؤنڈیشن اور پاکستان ڈویلپمنٹ نیٹ ورک (پی ڈی این) کی جانب سے سیلاب متاثرین کیلئے امدادی راشن کے 2 درجن سے زائد ٹرک سندھ اور بلوچستان کے سیلاب متاثرہ علاقوں کو روانہ کر دئیے گئے۔ سرور فاؤنڈیشن مجموعی طور پر ڈیڑھ لاکھ راشن پیک متاثرہ علاقوں تک بھجوائے گا۔ ہر راشن پیک ایک فیملی کی ایک ماہ کی ضرورت کے تمام سامان پر مشتمل ہے۔ سوا ارب روپے سے زائد مالیت کے امدادی سامان کے ٹرک بانی و چئیرمین سرور فاؤنڈیشن چوہدری محمد سرور کی زیر نگرانی روانہ کئے گئے۔
امدادی سامان کی روانگی کے موقع پر گفتگو کرتے ہوئے چوہدری سرور نے سیلاب متاثرین کی بحالی تک ان کی کفالت کے عزم کا اظہار کیا اور کہا کہ اگلے چار سے 6 ماہ تک متاثرین سیلاب کی خدمت میں خود کو مصروف رکھوں گا۔ انہوں نے کہا کہ روزانہ کی بنیاد پر راشن کے 20 سے 25 کنٹینر متاثرہ علاقوں میں روانہ کئے جا رہے ہیں۔ جبکہ اب تک 1 لاکھ سے زائد خاندانوں کو ایک ایک ماہ کا امدادی راشن پہنچا دیا گیا ہے۔
چوہدری سرور نے کہا کہ ہمارا ہدف ڈیڑھ لاکھ خاندانوں کو اس راشن پیکٹ سے مستفید کرنا ہے۔ معاون اداروں کے تعاون سے ہم یہ ہدف حاصل کرنے کے قریب پہنچ چکے ہیں۔ انہوں نے کہا کہ راشن باکس میں ضرورت کی ہر چیز مہیا کرنے کے علاؤہ علاقہ کے حالات کو مدنظر رکھتے ہوئے پینے کا پانی بالخصوص اضافی طور پر شامل کیا گیا ہے۔ چوہدری سرور نے کہا کہ انٹرنیشل کمیونٹی کو تسلیم کرنا چاہئے کہ یہ سیلاب موسمیاتی تبدیلیوں کی وجہ سے آیا ہے۔ اس مشکل وقت میں پاکستان کا ساتھ دینا اور قرضے معاف کرنا انٹرنیشل کمیونٹی اور بینکنگ چینلز کا فرض ہے۔
چوہدری سرور نے متاثرہ خاندانوں کی آباد کاری کیلئے انٹرنیشل کمیونٹی سے کردار ادا کرنے کا مطالبہ کرتے ہوئے مزید کہا کہ وہ خود بھی اس ضمن میں متحرک ہوں گے اور عالمی سطح پر رابطے بڑھائیں گے۔ اس موقع پر انہوں نے پاک فوج سمیت ان تمام اداروں کو خراج تحسین بھی پیش کیا جو فرنٹ لائن پر رہ کر سیلاب متاثرین کی مدد کر رہے ہیں۔ انہوں نے کہا کہ اس وقت سیلاب سے متاثرہ بے شمار لوگوں کی واحد امید ہم ہی ہیں۔ انہیں مایوسی کی دلدل میں جانے سے بچانے کیلئے مشترکہ کردار ادا کرنے کی ضرورت ہے۔
چوہدری سرور نے کہا کہ سرور فاؤنڈیشن کے رضا کار ہر متاثرہ خاندان تک امدادی سامان پہنچائیں گے اور ان کی بحالی تک انہیں تنہا نہیں چھوڑیں گے۔ انہوں نے راشن پیک تیار کرنے میں مدد کرنے پر چئیرمن اورینٹ میاں طلعت اور ایل ایچ آئی ایس سمیت پاکستان ڈویلپمنٹ نیٹ ورک میں شامل تمام اداروں کا بھی شکریہ ادا کیا۔ امدادی سامان کی روانگی کے موقع پر ڈپٹی ڈائریکٹر اورینٹ احمد فضل، عبد الرحمن طلعت، جاوید اقبال بخاری بھی موجود تھے۔
آرمی چیف جنرل قمر جاوید باجوہ سے برطانوی ہائی کمشنر کرسچن ٹرنر کی ملاقات
سیلابی پانی کے بعد لوگ مشکلات کا شکار ہیں کھلے آسمان تلے مکین رہ رہے ہیں
آرمی چیف جنرل قمر جاوید باجوہ نے کانجو اور سوات کا دورہ کیا
وزیراعظم شہباز شریف نے چارسدہ میں سیلاب سے متاثرہ علاقوں کا دورہ کیا