سعودی عرب کے شہر جدہ پر حوثیوں کا تباہ کن حملہ
باغی ٹی وی :سعودی عرب کے شہر جدہ کے شمالی علاقے میں حوثیوں کی جانب سے آئل پلانٹ پر ڈرون حملہ کیا گیا۔
غیر ملکی خبر رساں ادارے کے مطابق سعودی حکام کا کہنا ہے کہ جدہ میں آئل پلانٹ پر حوثیوں کے دہشت گرد حملے کے باعث آئل ڈسٹری بیوشن پلانٹ میں لگی آگ پر قابو پا لیا گیا ہے۔
سعودی وزارت توانائی کے عہدیداروں کے مطابق حملے سے نہ کوئی جانی نقصان ہوا اور نہ ہی تیل کی سپلائی متاثر ہوئی۔دوسری جانب اسلامی ممالک کی تعاون تنظیم (او آئی سی) نے جدہ میں آئل پلانٹ پر حوثیوں کے دہشت گرد حملے کی شدید مذمت کی ہے.
عرب اتحادی فوج کے ترجمان بریگیڈیئر ترکی المالکی نے بتایا کہ حوثی باغیوں نے سعودی عرب میں شہری آبادی پر حملے کے لیے ایک بمبار ڈرون مملکت کی طرف چھوڑ تاہم عرب اتحادی فوج نے فوری کارروائی کرتے ہوئے بمبار ڈرون کو مار گرایا۔العربیہ ڈاٹ نیٹ کے مطابق ترجمان نے حوثی باغیوں کی طرف سے ڈرون طیاروں کے حملے کوبین الاقوامی قانون کی کھلی خلاف ورزی قرار دیتے ہوئے عالمی اداروں سے حوثیوں کی دہشت گردی کا نوٹس لینے کا مطالبہ کیا۔
قبل ازیں 14 نومبر کو حوثی باغیوںنے سعودی عرب کی سرزمین پر شہری آباد کو نشانہ بنانےکے لیے ایک ڈرون حملے کی کوشش کی تھی جسے ناکام بنا دیا گیا تھا۔اس سے پہلے 12 نومبر کو ایرانی حمایت یافتہ حوثی ملیشیا نے سعودی عرب پر 5 ڈرون حملے کیے جنہیں ناکام بنا دیا گیا اور تمام بمبار ڈرون تباہ کر دیے گئے تھے
