طائف ایئر بیس پر حوثی حملہ، اطالوی لڑاکا طیارے کو شدید نقصان
سعودی عرب کے طائف ایئر بیس پر حوثی ملیشیا کے حملے کے دوران ایک اطالوی لڑاکا طیارے کو شدید نقصان پہنچا ہے۔
اطالوی وزیر دفاع گائیڈو کروزیتو نے واقعے کی تصدیق کرتے ہوئے کہا کہ حوثی حملے میں اطالوی لڑاکا طیارہ متاثر ہوا، تاہم کسی فوجی اہلکار کے زخمی ہونے کی اطلاع نہیں ملی۔وزارت دفاع کے مطابق حملے کے وقت طیارہ ایئر بیس کے ایک دور دراز حصے میں موجود تھا، جو مرکزی تنصیبات سے الگ ہے۔ حملے کے باوجود طیارے کے قریب موجود دیگر اثاثوں یا مقامی بنیادی ڈھانچے کو کوئی بڑا نقصان نہیں پہنچا۔اطالوی حکام کا کہنا ہے کہ حفاظتی پروٹوکولز کے باعث علاقائی دفاعی کارروائیوں کے لیے تعینات اہلکار محفوظ رہے۔ واقعے کے فوراً بعد حکام نے صورت حال کا جائزہ لینے اور فوجی اہلکاروں کے تحفظ کے اقدامات برقرار رکھنے کے لیے آپریشنل جائزہ شروع کردیا۔
یہ حملہ یمن کی حوثی ملیشیا کی جانب سے ڈرونز اور میزائلوں کے ذریعے حملوں کی تازہ لہر کا حصہ بتایا گیا ہے، جس میں سعودی عرب میں فوجی تنصیبات اور بنیادی ڈھانچے کو نشانہ بنایا جا رہا ہے۔
