ایلون مسک کا انسٹاگرام سے متعلق تبصرہ، سوشل میڈیا پر نئی بحث

ایلون مسک نے انسٹاگرام کو ایک مخصوص جنس سے منسوب کرتے ہوئے کہا ہے کہ انسٹاگرام لڑکیوں کے لیے ہے، جس پر سوشل میڈیا صارفین کی جانب سے مختلف ردعمل سامنے آ رہے ہیں۔

یہ تبصرہ ایکس صارف گیگر کیپیٹل کی اس پوسٹ کے جواب میں سامنے آیا، جس میں انہوں نے انسٹاگرام اکاؤنٹ ڈیلیٹ کرنے کا اعلان کرتے ہوئے اسے خواتین کے لیے بنایا گیا پلیٹ فارم قرار دیا تھا۔

ایلون مسک نے اس پوسٹ پر مختصر ردعمل دیتے ہوئے لکھا کہ انسٹاگرام لڑکیوں کے لیے ہے۔

ایلون مسک نے رواں سال مئی میں بھی انسٹاگرام سے متعلق اسی طرح کا بیان دیا تھا، اس وقت انہوں نے ان مردوں پر بھی تبصرہ کیا تھا جو انہیں اپنے انسٹاگرام پروفائل بھیجتے ہیں۔

مسک کے حالیہ بیان پر سوشل میڈیا صارفین نے سوالات اٹھاتے ہوئے ایکس کو بھی موضوعِ بحث بنا دیا۔