ایبٹ آباد درجہ چہارم سابق تمام درخواستیں منسوخ کر دی گئیں

ایبٹ آباد۔ 23 جولائی (اے پی پی) ڈسٹرکٹ ایجوکیشن آفیسر (زنانہ) ایبٹ آباد دفتر میں درجہ چہارم کی 50 سے زائد آسامیوں کیلئے جمع کرائی جانے والی سابق تمام درخواستیں منسوخ کر کے مکمل کوائف کے ہمراہ نئی درخواستیں طلب کر لی گئی ہیں۔ ڈی سیز کوٹہ، سنز کوٹہ، اقلیتی کوٹہ اور معذور کوٹہ سمیت تمام آسامیوں پر امیدواروں سے درخواست وصولی کیلئے 16 اگست حتمی تاریخ مقرر کی گئی ہے جس کے بعد درخواستیں جمع کرنے والے امیدواروں کو پذیرائی نہیں ملے گی۔ انتظامیہ کے مطابق قبل ازیں مشتہر کردہ آسامیوں کے جواب میں جمع کروائی گئی درخواستوں میں ضروری کوائف اندراجات میں نقائص کے علاوہ خالی آسامیوں کی نشاندہی بھی نہیں کی گئی تھی جس کے باعث ان درخواستوں کی منسوخی کا فیصلہ کیا گیا ہے۔ مذکورہ نوکریوں کے خواہشمند امیدواروں کو ہدایت کی گئی ہے کہ وہ اپنی یونین کونسل میں واقع سکولوں میں موجود آسامیوں کی تصدیق کے بعد متعلقہ آسامی کیلئے مکمل کوائف کے ساتھ درخواست جمع کروائیں، نامکمل کوائف اور جن یونین کونسلوں میں آسامیاں موجود نہیں ان کے رہائشی امیدواروں سے بھی درخواستیں وصول نہیں کی جائیں گی۔ امیدواروں کو سختی سے انتباہ کیا گیا ہے کہ وہ 16 اگست سے قبل دفتر ڈی ای او (زنانہ) میں درخواستیں جمع کروائیں جس کے بعد کسی امیدوار سے درخواست نہ تو وصول کی جائے گی اور نہ ہی اس کا نام لسٹ میں شامل کیا جائے گا۔