آزادی مارچ کے شرکاء نے یہ کام کیا تو حکومت سخت کاروائی کرے گی؟ غلام سرور خان نے بتا دیا

وفاقی وزیر ہوا بازی غلام سرور خان نے کہا ہے کہ وزیراعظم عمران خان کی قیادت میں پاکستان تحریک انصاف کی حکومت مضبوط اور مستحکم ہے،

اسلام آباد ۔ 29 اکتوبر (اے پی پی) وفاقی وزیر ہوا بازی غلام سرور خان نے کہا ہے کہ جے یو آئی (ف) کی جانب سے حکومت مخالف مظاہروں کے باوجود وزیراعظم عمران خان کی قیادت میں پاکستان تحریک انصاف کی حکومت مضبوط اور مستحکم ہے۔ نجی نیوز چینل سے گفتگو کرتے ہوئے وفاقی وزیر نے کہا کہ پی ٹی آئی ہمیشہ عوام کے جمہوری حقوق کے ساتھ کھڑی ہے، انہوں نے کہا کہ اپوزیشن کا جمہوری حق ہے کہ وہ احتجاج کریں اور اگر وہ پر امن طریقے سے احتجاج کرتے ہیں تو تحریک انصاف کی حکومت ان کے حقوق غصب نہیں کرسکتی ہے، وفاقی وزیر نے کہا کہ حکومت نے حکمت عملی تیار کی ہے اور قانون کی خلاف ورزی کی صورت میں مظاہرین کے خلاف سخت کارروائی کی جائے گی، انہوں نے کہا کہ جب تحریک انصاف حزب اختلاف میں تھی اور حکومت مخالف مظاہروں کا اعلان کرتی تھی تو ماضی کی کرپٹ حکومت نے ہماری پارٹی کے ممبروں کو گرفتار کیا اور دھرنا مظاہرین کے لئے رکاوٹیں کھڑی کردیں لیکن اب پی ٹی آئی کی حکومت حزب اختلاف کے لئے کوئی رکاوٹ نہیں بنے گی اور انہیں پرامن آزادی مارچ کی اجازت دے گی۔ وفاقی وزیر نے افسوس کا اظہار کرتے ہوئے کہاکہ جے یو آئی (ف) کے سربراہ مولانا فضل الرحمن نام نہاد آزادی مارچ کا آغاز کرتے ہوئے مسئلہ کشمیر سے مقامی اور بین الاقوامی میڈیا کی توجہ ہٹانا چاہتے ہیں،

انہوں نے کہا کہ وزیر اعظم عمران خان مسئلہ کشمیر کو مناسب انداز میں اجاگر کررہے ہیں جو ملکی دشمنوں کے لئے قابل قبول نہیں ہے۔ انہوں نے یہ بھی یقین دہانی کرائی کہ اگر مولانا اسلام آباد میں پر امن آزادی مارچ کریں گے تو پی ٹی آئی کی حکومت ان کی مدد کرے گی۔