بلاول بھٹو زرداری نے گرفتاری کی صورت میں متبادل قیادت کا نام بتادیا

بلاول بھٹو زرداری نے گرفتاری کی صورت میں متبادل قیادت کا نام بتادیا

باغی ٹی وی : پاکستان پیپلز پارٹی کے چیئرمین بلاول بھٹو نے کہا ہے کہ اگر مجھے گرفتار کیا گیا تو آصفہ بھٹو میری آواز بنیں گی اور تحریک چلائیں گی۔ راولپنڈی میں نیب کے سامنے پیشی کے بعد میڈیا سے بات کرتے ہوئے بلاول بھٹو زرداری نے کہا کہ چیف جسٹس سپریم کورٹ کہہ چکے ہیں کہ بلاول بھٹو زرداری بے گناہ ہے لیکن نیب کی جانب سے بار بار ہراساں کرنے کا سلسلہ جاری ہے، آج اسی تسلسل میں مجھے نیب آفس بلایا گیا۔ نیب کو نجی لین دین کی تحقیقات کا کوئی حق نہیں، میں جب کمپنی کا شیئر ہولڈر بنا اس وقت 7 سال کا تھا، ہماری غلط فہمی تھی کہ نیب 7 سال کے بچے پر کیس نہیں بنائے گا، مہنگائی کے خلاف مارچ کا اعلان کے بعد ہمیں نوٹس بھیجا گیا، اعتراضات کے باوجود نیب کے سامنے پیش ہوا، ہم سیاسی انتقام کے خلاف اپنی آواز بلند کررہے ہیں۔

بلاول بھٹو زرداری کا کہنا تھا کہ عمران خان سے کہتا ہوں کہ عوام پی ٹی آئی ایم ایف کے بجٹ کو نہیں مانتے، ہم اسے پھاڑ کر پھینک دیں گے۔انہوں نے وزیراعظم پر تنقید کرتے ہوئے کہا کہ آپ نے عوام کا معاشی قتل کردیا اور کہتے ہیں قبر میں سکون ملےگا۔