چیئرمین سینیٹ کا یوم آزادی بارے پیغام

چیئرمین سینیٹ محمد صادق سنجرانی کا یوم آزاد ی پاکستان کے موقع پر قوم کے نام پیغام میں کہنا ہے کہ میں اسلامی جمہوریہ پاکستان کے ”یوم آزاد ی“ کے پر مسرت موقع پر اندرون اور بیرون ملک رہنے والے تمام پاکستانیوں کو دل کی اتھاہ گہرائیوں سے مبارکباد پیش کرنا چاہتا ہوں۔آج پوری قوم یوم آزادی نئے جوش اور ولولے کے ساتھ منا رہی ہے۔آج ہم پاکستان کی سالگرہ کا دن منا رہے ہیں اور میری دعا ہے کہ پاکستان اسی طرح پھلتا پھولتا رہے اور ہماری آنے والی نسلیں بھی اسی طرح پاکستان کو پھلتا پھولتا دیکھیں۔

چیئرمین سینیٹ نے مزید کہا کہ پاکستان مسلمانان برصغیر کی انتھک جدوجہد اور لازوال قربانیوں سے وجود میں آیا۔ لاکھوں مسلمانوں نے اپنے بچوں کے بہتر اور آزاد مستقبل کیلئے قربانیاں دیں۔آج ہم ان کی قربانیوں کی وجہ سے پُرامن، باوقار ملک میں ترقی و خوشحالی کی راہ پر گامزن ہیں۔ ہمارے آباؤ اجداد کی قربانیوں کا ہم پر اور ہماری آنے والی نسلوں پر قرض ہیں۔قائد اعظم محمد علی جناحؒ نے پاکستان میں ایک جدید جمہوری ریاست کا خواب دیکھا تھا۔ اس خواب کی تعبیر میں ہمیں بے شمار چیلنجز کا سامنا ہے۔

ان کا کہنا تھا کہ پاکستان نے عالمی امن کے قیام اور دہشت گردی کے خلاف جنگ میں سب سے زیادہ قربانیاں دیں۔ ہماری مسلح افواج، قانون نافذ کرنے والے اداروں کی لازوال قربانیوں کی مثال نہیں ملتی۔مسلح افواج، سول و آرمڈ فورسز اور دیگر متعلقہ اداروں کی دہشت گردی کے خلاف قربانیاں اور خدمات قابل تحسین ہیں۔ہمیں یقین رکھنا چاہیے کہ ہمارا یوم آزادی آنے والے دنوں میں ہمارے لئے سیاسی، اقتصادی اورسماجی استحکام کی نوید لے کر آئے گا۔
مزید یہ بھی پڑھیں؛
لاہور:سفاک شوہر نے اپنی امریکن نیشنل اہلیہ کو تشدد کرکے قتل کردیا
ون ویلرز اور ہلڑبازی کرنے والوں کےخلاف کریک ڈاؤن کا فیصلہ
76 ویں یوم آزادی: پاکستان ملٹری اکیڈمی کاکول میں آزادی پریڈ کا انعقاد
گریٹر پارک میں یوم آزادی کی تقریب ،آتشبازی اور میوزیکل پروگرام کا انعقاد
چیئرمین سینیٹ محمد صادق سنجرانی نے کہا کہ اللہ کے فضل سے ملک اقتصادی ترقی کی راہ پر گامزن ہو گااور جو ترقی وخوشحالی کی نئی منزلیں طے کرے گا جس کے ثمرات پوری قوم کو میسر ہونگے۔ہمار ا مذہب اسلام محبت رواداری اور حسن سلوک کا درس دیتا ہے آزادی کی نعمتوں کے تحفظ کیلئے ہمیں باہمی تعاون اور خیر سگالی کے جذبے کو فروغ دینا ہوگا۔ آج ہم اپنے ہیروز اور ان تمام لوگوں کو خراج تحسین پیش کرتے ہیں جنہوں نے اس ملک کے قیام کو یقینی بنایا۔آئیں عہد کریں کہ بابائے قوم ؒ کے نظریات اور علامہ اقبال ؒ کی فکر کے تحت ہم ایمان و یقین، اتحاد و اتفاق اور نظم و ضبط کے ساتھ پاکستان کی ترقی میں اپنا کردار ادا کریں۔ اللہ تعالیٰ ہم سب کا حامی و ناصر ہو۔

علاوہ ازیں ڈپٹی چیئرمین سینیٹ مرزا محمد آفریدی نے ”یوم آزاد ی پاکستان“ کے پر مسرت موقع پر اندرون اور بیرون ملک بسنے والے تمام پاکستانیوں کو مبارکباد پیش کی ہے۔ جبکہ ڈپٹی چیئرمین سینیٹ نے قوم کے نام اپنے پیغام میں کہا کہ آزادی کی قدر حقیقی جمہوریت میں مضمر ہے۔آزاد اور زندہ قومیں اپنا یوم آزادی اس عہد کی تجدید کے ساتھ مناتی ہیں کہ وہ اپنے ملک کو حقیقی معنوں میں ایک فلاحی ریاست بنائیں گے۔انہوں نے مزید کہا کہ آج کے دن ہم بحیثیت قوم یہ عہد کرتے ہیں کہ پاکستان کو بانیان پاکستان کے خوابوں کے مطابق بنائیں گے جہاں بلا رنگ ونسل ومذہب سب کو برابر کے حقوق حاصل ہوں گے اور اس مملکت کو دنیا کی ترقی یافتہ مملکت کی صف میں شامل کر یں گے۔

ڈپٹی چیئرمین سینیٹ نے مزید کہا کہ زندگی کا حقیقی احساس آزادی کی عظیم نعمت کے بغیر ادھورا ہے۔انہوں نے کہا کہ ہم تنازع جموں و كشمیر پر كشمیریوں كی اخلاقی، سیاسی اور سفارتی حمایت جاری ركھنے كے عزم كی تجدید كرتے ہیں، آج كے دن قوم عہد كرے كہ ہم قائداعظم كے نظریات پر عمل پیرا ہوتے ہوئے پاكستان كے اتحاد اور خوشحالی كے لیے كام كریں گے۔پاکستان ان تصورات کی مجسم تصویر ہے جس کی آغوش میں ہم ہر لمحہ آزادی کا لطف اٹھاتے ہیں، یوم آزادی پر سبز ہلالی پرچم مزید بلند کرنے کی لگن بڑھ جاتی ہے۔ آج حقیقی جشن کا دن ہے اور میں پوری قوم کو دل کی گہرائیوں سے مبارک باد پیش کرتا ہوں۔
***