عمران خان پر تنقید کیوجہ سے میرا میوزک کیرئیر ختم ہوگیا:گلوکار جواد احمد

لاہور: معروف گلوکار جواد احمد نے انکشاف کیا ہے کہ سیاست میں آنے کے بعد اور چیئرمین پی ٹی آئی عمران خان پر تنقید کے سبب اب مجھے کوئی کنسرٹ میں نہیں بلاتا ہے۔

جواد احمد نے ایک انٹرویو میں اپنے گلوکاری کے کیریئر سے متعلق پوچھے گئے سوال کے جواب میں کہا ہے کہ گلوکاری کے شعبے میں دو طرح کہ کام ہوتے ہیں، ایک آپ میوزک کمپوز کر رہے ہوں اور دوسرا کہ آپ گا رہے ہوں۔

گلوکار نے کہا ہے کہ جب سے میں نے سیاست میں قدم رکھا ہے اور جس طرح سے عمران خان کی مخالفت کی ہے اب مجھے کوئی کنسرٹس کے لیے بلاتا ہی نہیں ہے۔اُن کا کہنا تھا کہ سیاسی مؤقف کی وجہ سے میرا میوزک کا کام 95 فیصد تک ختم ہوچکا ہے، لوگ کہتے ہیں کہ اسے رہنے دو یہ متنازعہ شخص ہے۔

اُنہوں نے مزید کہا کہ میں عمران خان سمیت دوسری سیاسی جماعتوں پر بھی تنقید کرتا ہوں، میں پاکستان کے عام عادمی کی بات کرتا ہوں اور عام آدمی کے لیے جماعت بنانا چاہتا ہوں۔

جواد احمد 29ستمبر 1970ء میں لاہور میں پیدا ہوئے۔ جواد احمد نے اپنے گانے ”اللہ میرے دل دے اندر‘ ‘ سے انٹرنیشنل توجہ حاصل کی اور یہ گانا ان کی شہرت کی وجہ بنا۔ بعد میں انہوں نے بے شمار گانے گائے اور کئی البمز بھی ریلیز کیے۔ جواد احمد کو نوجوان نسل میں انتہائی شہرت حاصل ہے۔ ان کے گائے ہوئے گانوں کی نوجوان نسل میں خاصی مقبولیت حاصل ہے۔ جواد کے مشہور گانوں میں “ اوہ کیہندی اے سیاں میں تیری آں، مہندی، بن تیری کیا ہے جینا، تو ہی دلدار ہے، اچیاں مجاجاں والی، دوستی، آسماں سے اونچا“ او ر جواد کے مشہور البمز میں”بول تجھے کیا چاہیے، اچیاں مجاجاں والی، جند جان سوہنیاں، لو لائف“ وغیرہ شامل ہیں۔