Home›پاکستان›تُرک اداکار انجین التان نے پاکستانی برانڈ سے بطور ایمبیسڈر معاہدہ منسوخ کردیا

تُرک اداکار انجین التان نے پاکستانی برانڈ سے بطور ایمبیسڈر معاہدہ منسوخ کردیا

ستمبر 9, 2020

شہرہ آفاق تُرک ڈرامے ارطغرل غازی میں بہادر جنگجو ارطغرل میں مرکزی کردار ادا کرنے والے کے انجین التان نے پاکستانی برانڈ سے بطور ایمبیسڈر معاہدہ منسوخ کردیا۔

باغی ٹی وی : چند روز قبل ارطغرل غازی کے مرکزی کردار نے دارالحکومت اسلام آباد کی نجی ہاؤسنگ سوسائٹی سے برانڈ ایمبیسڈر کا معاہدہ کیا تھااس حوالے سے نجی ہاؤسنگ سوسائٹی نے سوشل میڈیا سائٹس پر پر جاری مختلف پوسٹس میں بتایا تھا کہ انجین التان دوزیتان جلد اسلام آباد میں بلیو ورلڈ میں مسجد کے سنگ بنیاد کی تقریب میں شرکت کریں گے۔
بعدازاں سوشل میڈیا پر جاری ویڈیو پیغام میں انجین التان نے پاکستانی برانڈ کا ایمبیسڈر بننے کی تصدیق کی تھی اور کہا تھا کہ جلد پاکستان آؤں گا۔

اب ارطغرل غازی کے مرکزی کردار نے بلیو ورلڈ سٹی کو غیر قانونی قرار دیے جانے کی وجہ سے اپنا معاہدہ منسوخ کردیا ہے۔

اس حوالے سے ترکی کے سرکاری نشریاتی ادارے ٹی آر ٹی کی رپورٹ میں بتایا گیا کہ ڈراما سیریل ار طغرل غازی کے ہیرو انجین التان نے بلیو ورلڈ سٹی کے ساتھ طے پانے والا معاہدہ منسوخ کردیا ہے۔

رپورٹ کے مطابق یار من ترکی یوٹیوب چینل کے اینکر ڈاکٹر فرقان حمید سے ٹیلی فون پر گفتگو کرتے ہوئے انجین التان دوزیتان نے بتایا کہ معاہدے کے وقت انہیں بلیو ورلڈ سٹی کے بارے میں کوئی زیادہ معلومات حاصل نہیں تھیں۔

انجین نے مزید بتایا کہ پاکستان سے حاصل ہونے والی معلومات کی روشنی اور اس فرم سے متعلق اچھی رائے نہ ہونے کی وجہ سے انہوں نے بطور ایمبیسڈر طے پانے والے معاہدے کو منسوخ کرنے کا فیصلہ کیا ہے۔

انجین التان کا کہنا تھا کہ اس حوالے سے جلد ہی باقاعدہ طور پر معاہدہ منسوخ کرنے کی دستاویز جاری کی جائیں گی۔