9 مئی کے واقعات ، اشتہاری ملزمان کی جائیدادیں ضبط کےکی کارروائیاں شروع

لاہور : پولیس نے 9 مئی کے واقعات میں ملوث اشتہاری ملزمان کی جائیدادیں ضبط کرنےکی کارروائیاں شروع کردی ہیں۔

باغی ٹی وی: ڈی آئی جی انویسٹیگیشن عمران کشور نے لاہور میں پریس کانفرنس کرتے ہوئے بتایا کہ 9 مئی کے 336 ملزمان کی تلاش جاری ہے، قانون کے مطابق ملزمان کی جائیدادیں ضبط کرانےکی کارروائی شروع کردی ہے۔

عمران کشور کے مطابق 9 مئی کے 14 پرچے درج کیےگئے تھے، 9 مئی واقعات میں ملوث اشتہاری ملزمان میں پی ٹی آئی کی لیڈر شپ اور دیگر کارکن شامل ہیں ،جن میں ملوث بہت سے ملزمان گرفتار ہو چکے ہیں سابق چیف جسٹس ثاقب نثار کےگھر ہونے والے واقعے کی مشترکہ تفتیش جاری ہےمختلف ٹیمیں کیس پر تفتیش کر رہی ہیں، ابھی کچھ کہنا قبل ازوقت ہے، سی ٹی ڈی کے ساتھ مل کر ہماری ٹیمیں بھی کام کر رہی ہیں۔

پریس کانفرنس میں ڈی آئی جی انویسٹی گیشن لاہور عمران کشور نے پولیس کی سالانہ کارکردگی کے حوالے سے بھی بتایا انہوں نے کہا کہ انویسٹیگیشن پولیس نے رواں سال کے ایک لاکھ 77 ہزار 99 مقدمات کے چالانوں سمیت گزشتہ سالوں کے کل 4 لاکھ 92 ہزار 898 چالان عدالتوں میں جمع کروائے ہیں اور خطرناک ملزمان سمیت کل 2 لاکھ 53 ہزار 32 ملزمان گرفتار کیے ہیں۔