جولائی تا ستمبر مجموعی درآمدات میں 12 اعشاریہ 37 فیصد کمی
جولائی تا ستمبر مجموعی درآمدات میں 12 اعشاریہ 37 فیصد کمی
موجودہ مالی سال پہلے 2 ماہ میں بڑی صنعتوں کی پیداوار میں 0.4 فیصد کمی ہوئی ہے۔ درآمدات میں کمی کے ذریعے تجارتی خسارہ کم کرنے کی حکومتی کوششیں رنگ لے آئیں، وفاقی ادارہ شماریات کے مطابق موجودہ مالی سال کی پہلی سہہ ماہی میں 35 ارب 90 کروڑ روپے کے موبائل فون اور 62 ارب روپے سے زیادہ مالیت کی گاڑیاں درآمد کی گئیں۔ وفاقی ادارہ شماریات کی رپورٹ کے مطابق موجودہ مالی سال جولائی تا ستمبر مجموعی درآمدات میں 12 اعشاریہ 37 فیصد کمی آئی۔ درآمدات کا حجم 18 ارب 71 کروڑ ڈالر سے کم ہو کر 16 ارب 40 کروڑ ڈالر پر آگیا۔
رپورٹ کے مطابق جولائی تا ستمبر ایک ارب 76 کروڑ 91 لاکھ ڈالر کی مشینری امپورٹ کی گئی۔ جب کہ گزشتہ سال اسی مدت میں 2 ارب 84 کروڑ ڈالر کی مشینری درآمد ہوئی تھی۔ ادارہ شماریات کے مطابق موبائل فون 67 فیصد، گاڑیوں کی امپورٹ اسی فیصد تک گر گئی ہے۔ اور جولائی تا ستمبر 16 کروڑ ڈالر یعنی 35 ارب 90 کروڑ کے موبائل امپورٹ ہوئے۔ جب کہ گزشتہ مالی سال اسی مدت میں 49 کروڑ 50 لاکھ ڈالر مالیت کے موبائل فون درآمد کئے گئے تھے۔
مالی سال کے پہلے تین ماہ میں 27 کروڑ 75 لاکھ ڈالر کی گاڑیاں درآمد کی گئیں۔ پاکستانی کرنسی میں گاڑیوں کی مالیت 62 ارب روپے سے زیادہ ہے۔ گزشتہ سال ابتدائی تین ماہ میں 40 کروڑ 73 لاکھ ڈالر کی گاڑیاں بیرون ملک سے منگوائی گئی تھیں۔ ادارہ شماریات کی رپورٹ کے مطابق موجودہ مالی سال کے پہلے 2 ماہ میں ملک کی بڑی صنعتوں کی پیداوار میں 0.4 فیصد کی کمی ہوئی ہے، تاہم اگست 2021 کی نسبت اگست 2022 میں صنعتی پیداوار 0.6 فیصد بڑھی ہے۔
مزید یہ بھی پڑھیں؛ جنرل قمر جاوید باجوہ بطور آرمی چیف اور سیکیورٹی چیلنجز ، بقلم: شکیل احمد رامے
امریکہ پاکستان کے ساتھ مضبوط شراکت داری چاہتا ہے،امریکی محکمہ خارجہ
روس سے قریبی تعلقات کے الزام میں جرمنی کے سائبر سیکیورٹی چیف برطرف
ادارہ شماریات کی رپورٹ کے مطابق دوماہ میں ٹیکسٹائل، گاڑیوں، خوراک، مشروبات، تمباکو اور ادویہ سازی کی پیداوار میں کمی ہوئی ہے، جب کہ کمپیوٹر، الیکٹرانکس، آپٹیل مصنوعات اور ربڑ مصنوعات کی پیداوار میں بھی کمی ہوئی ہے۔ رپورٹ کے مطابق جولائی سے اگست میں ملبوسات، لیدراور اسٹیل سمیت 8 شعبوں کی پیداوار میں اضافہ ہوا ہے، ملبوسات میں 60.9 فیصد، لیدر مصنوعات میں 11.5 فیصد اور کیميکلز کی پیداوار میں 2.8 فیصد اضافہ ہوا ہے۔ ادارہ شماریات کے مطابق دو ماہ کے دوران لوہے اور اسٹیل کی پیداوار میں 11.7 فیصد، فٹبال کی پیداوار میں 53 فیصد، فرنیچر کی پیداوار 174 فیصد اور جولائی سے اگست پیپر بورڈ کی پیداوار میں بھی 6.6 فیصد تک اضافہ ہوا ہے۔
