کراچی کے علاقے ناظم آباد میں دوکان کا صفایا کر دیا

کراچی : کراچی کے علاقے ناظم آباد میں کم عمر ڈاکوئوں نے دکان کا صفایا کردیا، مسلح ملزمان نقدی اور موبائل فونز لوٹ کر باآسانی فرار ہوگئے۔تفصیلات کے مطابق کراچی کے علاقے ناظم آباد میں کمسن ڈاکوئوں نے دکان کا صفایا کردیا جس کی سی سی ٹی وی فوٹیج بھی منظرعام پر آگئی ہے ۔سی سی ٹی وی فوٹیج میں دیکھا جاسکتا ہے کہ دو کم عمر لڑکوں اسلحہ لہراتے ایک دکان میں داخل ہوتے ہیں، ملزمان نے ہلکے سبز اور نیلے رنگ کے شلوار قمیض پہن رکھے ہیں اور گلے میں رومال بھی ڈالا ہوا ہے ۔
فوٹیج میں بے خوف نظر آتے یہ کمسن ڈاکو دکاندار کو کیش کاونٹر خالی کرنے کو کہتے ہیں اور خود موبائل فون لوٹنے میں مصروف ہوجاتے ہیں۔لوٹ مار کے بعد یہ ملزمان موبائل فون، نقدی لینے کے ساتھ جاتے جاتے سگریٹ کاپیکٹ اورکولڈ ڈرنک بھی ساتھ لے جاتے ہیں۔واردات کی فوٹیج منظرعام پر آنے کے باوجود پولیس تاحال کمسن ڈاکووں کو گرفتار نہیں کرسکی ہے تاہم پولیس اس حوالے سے موقف ضرور سامنے آیا ہے۔واردات کے حوالے سے پولیس حکام نے بتایاکہ بچے جرائم پر مبنی بھارتی فلموں سے متاثر نظر آتے ہیں اور ان کی گرفتاری کے لیے کوششیں کی جارہی ہیں۔