سود خور گینگ کون سا خطرناک کام کرتے ہوئے گرفتار ہوا

گجرات(نمائندہ باغی ٹی وی)سود خور گینگ کی مزدور نوجوان کو گھر میں گھس کر اغواءکرنے کی کوشش، پولیس تھانہ سٹی نے بروقت کارروائی کر کے سود خور گینگ کو گرفتار کر کے مقدمہ درج کر لیا۔ تفصیلات کے مطابق محلہ فاروق پارک کے رہائشی فخر زمان کے والد قمر زمان نے چار سال قبل کریم داد کے رہائشی سید فضل حسین شاہ سے 2لاکھ روپے لئے، فخر زمان کے مطابق اس کے والد نے اپنی وفات سے قبل مختلف اوقات میں ساڑھے تین لاکھ روپے سید فضل حسین شاہ کو واپس کر دیئے اس کے باوجود سید فضل حسین شاہ اس سے فون پر 18لاکھ روپے کا تقاضا کرتا رہا ہے اور 18لاکھ روپے کا اقرار نامہ لکھ کر نہ دینے پر قتل کی دھمکیاں دیتا ہے۔ گزشتہ روز سید فضل حسین شاہ نے اپنے ساتھیوں سمیت اسے محلہ فاروق پارک میں واقع اس کی رہائش گاہ سے اغواءکرنے کی کوشش کی اور زبردستی کار میں ساتھ لے جانے کی کوشش کی۔ پولیس کی بروقت کارروائی سے یہ کوشش ناکام ہو گئی۔ پولیس تھانہ سٹی نے سید فضل حسین ، سجاد علی راولپنڈی، محمد شبیر پھالیہ، اور سید شاہسوار کریم داد کے خلاف مقدمہ درج کر کے تفتیش شروع کر دی ہے۔