ماڈل فروا علی اسقاط حمل کی وجہ سے غمزدہ

پاکستانی معروف ماڈل فروا علی کاظمی نے اپنی ایک سوشل میڈیا پوسٹ میں انکشاف کیا کہ ان کا 3 ماہ کا حمل ضائع ہو گیا ہے-

باغی ٹی وی : ماڈل فروا علی کاظمی نے نئے سال 2021 کے پہلے ہی دن انکشاف کیا کہ 2020 میں ان کا تین ماہ کا حمل ضائع ہوگیا فروا علی کاظمی نے حمل ضائع ہونے کا اعتراف کیا تاہم انہوں نے یہ نہیں بتایا کہ ان کا حمل کب ضائع ہوا۔

فروا علی نے انسٹاگرام پوسٹ میں دو ایکسرے کی تصاویر شیئر کرتے ہوئے ایک طویل کیپشن میں پچھلے سال کے اپنے سب سے بڑے غم پر بات کرکے خواتین کو حوصلہ دیا ہے کہ اگر ان کے ساتھ بھی حمل کے دوران کوئی پیچیدگیاں آجائیں تو وہ بھی ان پر کھل کر بات کریں۔

گزشتہ سل 2020 میں کورونا وائرس کا شکار ہونےوالی ماڈل فروا علی کاظمی نے لکھا کہ جب سب اس سال کو الوداع کہتے ہوئے اور نئے سال کو خوش آمدید کہتے ہوئے اچھی یادیں شئیر کرتے ہیں ، میں اپنی کہانی شیئر کر رہی ہوں جس کا اختتام خوشگوار نہیں ہے۔

فروا علی کاظمی نے حمل ضائع ہونے کی تفصیلات لکھیں جن کے مطابق ان کا حمل تیسرے مہینے ضائع ہوا لکھا کہ وہ ایک ایسے درد سے گزری ہیں جسے اسقاط حمل کہا جاتا ہے-

انہوں نے لکھا کہ خواتین اسقاط حمل کے بارے میں شاذ و نادر ہی بات کرتی ہیں کیونکہ اس میں بہت زیادہ جرم ، شرم اور تکلیف شامل ہوتی ہے۔ مجھے لگتا ہے کہ ہمیں غیر آرام دہ اور مشکل موضوعات کے بارے میں مزید بات کرنے کی ضرورت ہے کیونکہ اس کے بارے میں بات نہ کرنے سے یہ اور بھی پچیدہ ہو جاتا ہے۔ کسی بچے کا کھو جانا تکلیف دہ ہے اور جب تک کوئی چاہے غمزدہ رہے رکھے۔ یہ ماں کی غلطی نہیں اور نہ ہی اس کے اختیار میں ہے-

فروا علی کاظمی کا کہنا تھا کہ انہوں نے اپنے کبھی پیدا نہ ہونے والے بچے کے لیے پیار بھرے خطوط بھی لکھے تھے اور اب وہ ان خطوط کی طرف دیکھنے کی ہمت بھی نہیں کرتیں۔

ماڈل نے لکھا کہ انہیں امید تھی کہ وہ 7 ماہ بعد اپنے بچے کو گھر لے آئیں گی لیکن اگلے ہی روز انہیں معلوم ہوا کہ ان کے پیٹ میں پلنے والے جنین کے دل نے تین ماہ بعد بھی دھڑکنا شروع نہیں کیا اور پھر ایسی ہی بعض پیچیدگیوں کے باعث ان کا حمل ضائع ہوگیا۔

فروا نے لکھا کہ وہ اس ضمن میں کسی اور موقع پر تفصیلی پوسٹ لکھیں گی۔

انہوں نے سال نو کے حوالے سے کہا کہ اگرچہ پچھلے سال نے ہمیں کوئی ایسا موقع نہیں دیا کہ ہم خوشی سے نئے سال کو خوش آمدید کہہ سکیں لیکن اس کے باوجود ہمیں مثبت رہنا چاہیے اور مستقبل کے اچھے ہونے کی امید رکھنی چاہیے۔

پوسٹ کے آخر میں انہوں سب کے لیے دعا کی کہ 2021 سب کو خوشیاں عطا کرے۔

فروا علی کاظمی کی پوسٹ پر کئی مداحوں اور اہم شخصیات نے کمنٹ کرکے ان کے ساتھ ہمدری کا اظہار کیا اور انہیں بہادر بھی قرار دیا۔

خیال رہے کہ فروا علی کاظمی نے میر علی احمد کے ساتھ چند سال قبل شادی کی تھی –