نمل یونیورسٹی، مختلف زبانوں میں تراجم اور تشریح کے حوالے سے ترقی کرنے کے اقدامات

وزیر خارجہ مخدوم شاہ محمود قریشی کی نمل یونیورسٹی آمد ہوئی اور ریکٹر نمل یونیورسٹی میجر جنرل (ر) محمد جعفر نے وزیر خارجہ کا پرتپاک خیر مقدم کیا۔ وزارتِ خارجہ اور نمل کے مابین مختلف زبانوں کی ترویج کے حوالے سے معاہدہ کیا۔ نمل یونیورسٹی، مختلف زبانوں میں تراجم اور تشریح کے حوالے سے وزارتِ خارجہ کی معاونت کرے گی۔ نمل یونیورسٹی، وزارت خارجہ کے افسران کی زبان دانی کے حوالے سے استعداد کار بڑھانے میں مدد کرے گی۔
مخدوم شاہ محمود قریشی نے کہا کہ زبانوں کی ترویج کے حوالے سے وزارتِ خارجہ اور نمل کے مابین یہ معاہدہ، وقت کی اہم ضرورت ہے ۔ وزارتِ خارجہ اور نمل یونیورسٹی کے مابین زبانوں کی ترویج کے اس معاہدے سے قومی بیانیے کی تشکیل اور بین الاقوامی سطح پر تشہیر میں مدد ملے گی۔
وزیر خارجہ مخدوم شاہ محمود قریشی اور ریکٹر نمل میجر جنرل (ر) محمد جعفر کی موجودگی میں وزارت خارجہ اور نمل کے مابین طے پانے والے معاہدے کی مفاہمتی یادداشت پر دستخط کئے گئے۔ وزیر خارجہ نے علم و ادب کے حوالے سے نمل یونیورسٹی کی خدمات کو سراہا۔ ریکٹر نمل یونیورسٹی میجر جنرل (ر) محمد جعفر نے نمل یونیورسٹی آمد پر وزیر خارجہ کا شکریہ ادا کیا