سالک حسین کی گفتگو سے لگتا ہے کہ وہ اپنے حواس کھو بیٹھے ہیں،عظمیٰ بخاری

 وزیر اطلاعات پنجاب عظمیٰ بخاری نے سالک حسین کے بیان پر ردعمل دیتے ہوئے کہا ہے کہ چوہدری خاندان کو پہلے امتحان میں مونس نے ڈالا اور اب دوسرے امتحان میں سالک نے ڈال دیا ہے۔

عظمیٰ بخاری نے کہا کہ چوہدری خاندان کی وضع دار اور رکھ رکھاؤ والی سیاست کو ان دو نالائق بچوں نے بہت نقصان پہنچایا ہےجس شر یف خاندان نے انہیں چوہدری بنایا، اسے دھوکہ دینے کی ان کی ایک تاریخ بن گئی ہے سالک حسین کی گفتگو میں وضع داری کے بجائے تھڑ ے باز انداز نمایاں ہے،ان کی گفتگو سے لگتا ہے کہ وہ اپنے حواس کھو بیٹھے ہیں-

انہوں نے کہا کہ خواتین کی تضحیک کرنے والے کم از کم وضع دار نہیں ہوسکتے سالک حسین ایک ہفتے سے وزیراعلیٰ مریم نواز کے نو ٹس کا جواب نہیں دے سکے، اگر جواب نہیں دے سکتے تو وزارتوں سے استعفے دے کر گھر جائیں ایک طرف کرپشن کا راگ الاپا جاتا ہے اور دوسری طرف فنڈز بھی مانگے جاتے ہیں، یہ دوغلی سیاست کیسے کی جاسکتی ہے؟مریم نواز نے گجرات کو وہ حق دیا ہے جو 50 سال میں ظہور الٰہی، شجاعت حسین اور پرویز الٰہی نہیں دے سکے۔

انہوں نے سالک حسین کو مخاطب کرتے ہوئے کہا کہ ٹی وی پر بھاشن دینے کے بجائے استعفے دیں اور اپوزیشن میں بیٹھیں، پھر انہیں آٹے دال کا بھاؤ معلوم ہوجائے گا۔