بدھ، 18 نومبر، 2026
Baaghi TV Logo
ٹرینڈنگ

نقد سے ڈیجیٹل معیشت تک کا سفر،تحریر : محمد سبحان شوق

نقطہ نظر

دنیا کی معاشی تاریخ میں بعض تبدیلیاں ایسی ہوتی ہیں جو بظاہر صرف سہولت کا ایک نیا دروازہ کھولتی ہیں مگر وقت گزرنے کے ساتھ انسانی زندگی کے معمولات کاروباری رویوں اور معاشرتی ڈھانچے تک کو تبدیل کردیتی ہیں کبھی انسان نے سکے سے کاغذی کرنسی کا سفر طے کیا تھا اور اب وہ کاغذی نوٹ سے موبائل اسکرین پر دکھائی دینے والے چند ہندسوں تک پہنچ رہا ہے ایک زمانہ تھا جب بازار میں خریداری کے بعد دکاندار کی گنتی اور خریدار کی جیب میں موجود نوٹ ہی لین دین کا مکمل حوالہ ہوا کرتے تھے مگر اب دنیا ایک ایسی معیشت کی طرف بڑھ رہی ہے جہاں رقم ہاتھ سے ہاتھ منتقل ہونے کے بجائے ایک اکاؤنٹ سے دوسرے اکاؤنٹ میں منتقل ہوتی ہے پاکستان بھی اسی تبدیلی کے ایک اہم مرحلے میں داخل ہوچکا ہے حکومت کا کیش لیس پاکستان منصوبہ دراصل معیشت کو ڈیجیٹل ادائیگیوں کے نظام سے منسلک کرنے کی ایک کوشش ہے جس کے تحت بڑے کاروباری اداروں سے لے کر چھوٹے دکانداروں اور ریڑھی بانوں تک کو QR کوڈ اور دیگر ڈیجیٹل ذرائع کے ذریعے ادائیگیاں وصول کرنے کے قابل بنانے کا تصور پیش کیا گیا ہے اسٹیٹ بینک کا راست نظام بھی اسی سمت میں ایک اہم قدم ہے اور حکومت کی حالیہ پیش رفت سے ظاہر ہوتا ہے کہ آنے والے برسوں میں پاکستان کی کاروباری زندگی کا ایک بڑا حصہ ڈیجیٹل ادائیگیوں کے تابع ہوسکتا ہے بظاہر یہ ایک جدید اور سہولت بخش تصور ہے مگر کسی بھی معاشی اصلاح کا اصل امتحان اس وقت شروع ہوتا ہے جب اس کے اثرات ملک کے امیر اور غریب دونوں طبقات پر یکساں طور پر پڑنے لگتے ہیں۔

اس منصوبے کے فوائد سے انکار ممکن نہیں پاکستان میں روزانہ کروڑوں روپے کی نقد لین دین ہوتی ہے اور اس میں ایک بڑا حصہ ایسا بھی ہے جس کا کوئی باقاعدہ حساب کتاب موجود نہیں ہوتا ڈیجیٹل ادائیگیوں کے ذریعے کاروباری لین دین کا ریکارڈ محفوظ ہوسکتا ہے اور کسی دکاندار کو روزانہ کی فروخت کا حساب رکھنے کے لیے رجسٹروں اور کاغذی پرچیوں پر مکمل انحصار نہیں کرنا پڑے گا خریدار کو جیب میں بھاری رقم رکھنے کی ضرورت کم ہوگی اور چوری یا نقد رقم گم ہونے کے امکانات بھی کسی حد تک گھٹ سکتے ہیں بیرون شہر سفر کرنے والے افراد کے لیے بھی یہ سہولت اہم ہوسکتی ہے کہ انہیں ہر چھوٹی بڑی خریداری کے لیے نقد رقم کا انتظام نہ کرنا پڑے حکومت کے لیے اس نظام کا ایک بڑا فائدہ یہ ہے کہ کاروباری سرگرمیوں کا باقاعدہ ریکارڈ دستیاب ہوگا جس سے ٹیکس نظام کی بہتری اور معیشت کے حقیقی حجم کا اندازہ لگانے میں مدد مل سکتی ہے اس وقت پاکستان کو جس مالیاتی بحران اور محصولات کی کمی کا سامنا ہے وہاں دستاویزی معیشت کی اہمیت اپنی جگہ مسلم ہے مگر سوال یہ ہے کہ کیا معیشت کو دستاویزی بنانے کی ذمہ داری صرف اس غریب دکاندار پر بھی ڈال دی جائے گی جس کی پوری روزانہ کی آمدنی چند ہزار روپے سے زیادہ نہیں ہوتی ایک بڑے کاروباری ادارے کے لیے ڈیجیٹل ادائیگی کا نظام اختیار کرنا شاید کوئی غیر معمولی مسئلہ نہ ہو اس کے پاس کمپیوٹر موجود ہے اکاؤنٹنٹ موجود ہے بینکنگ کا عملہ موجود ہے اور کاروباری معاملات کو سنبھالنے کے لیے باقاعدہ انتظامی ڈھانچہ بھی موجود ہے مگر ایک چھوٹے دکاندار کی دنیا بالکل مختلف ہے ایک ایسا شخص جو صبح اپنی دکان کھولتا ہے شام تک گاہکوں کا انتظار کرتا ہے اور دن کے اختتام پر گھر کا راشن بچوں کی فیس اور بجلی کا بل ادا کرنے کے لیے چند سو یا چند ہزار روپے بچاتا ہے اس کے لیے ڈیجیٹل نظام کی سہولت کے ساتھ کچھ نئے اخراجات اور ذمہ داریاں بھی پیدا ہوسکتی ہیں اسے موبائل فون درکار ہوگا انٹرنیٹ یا کسی متبادل رابطے کی سہولت چاہیے ہوگی بینک یا موبائل والٹ کا اکاؤنٹ کھلوانا ہوگا اور اسے اس نظام کے استعمال کی بنیادی تربیت بھی حاصل کرنا ہوگی اگر ان سہولتوں کے حصول میں فیس ٹیکس اکاؤنٹ کی پابندیاں یا دیگر اخراجات شامل ہوگئے تو یہ سہولت اس کے لیے ایک اضافی بوجھ بن سکتی ہے اس لیے حکومت کو یہ سمجھنا ہوگا کہ ایک بڑے سپر اسٹور اور فٹ پاتھ پر بیٹھے ہوئے سبزی فروش کو ایک ہی انتظامی پیمانے سے نہیں ناپا جاسکتا۔

اب ذرا اس ریڑھی بان کا تصور کیجیے جو کراچی کی کسی سڑک کے کنارے صبح سے شام تک سبزیاں فروخت کرتا ہے اس کے پاس شاید کوئی اسمارٹ فون نہیں نہ بینک اکاؤنٹ ہے اور نہ ہی اسے موبائل بینکنگ کے استعمال کا علم ہے اس کی آمدنی کا انحصار روزانہ کی فروخت پر ہے اور وہ اپنی کمائی سے ہی اگلے دن کا مال خریدتا ہے اگر اس سے کہا جائے کہ اب ہر گاہک سے ڈیجیٹل ادائیگی وصول کرو اور اس مقصد کے لیے QR کوڈ رکھو تو اس کا سوال بالکل فطری ہوگا کہ جس شخص کے پاس موبائل فون خریدنے کی استطاعت نہیں وہ اس نظام کا حصہ کیسے بنے گا کیا حکومت اسے مفت QR کوڈ دے گی کیا اسے بینک اکاؤنٹ کھلوانے میں مدد فراہم کی جائے گی کیا اسے انٹرنیٹ کی سہولت ملے گی اور کیا اس کی معمولی آمدنی پر کوئی اضافی چارج بھی عائد ہوگا یہ سوال محض ایک ریڑھی بان کا نہیں بلکہ پاکستان کے ان لاکھوں افراد کا ہے جو رسمی بینکنگ نظام سے ابھی تک پوری طرح منسلک نہیں ہوسکے کسی بھی جدید معاشی منصوبے کی کامیابی اسی وقت ممکن ہے جب اس میں ان لوگوں کے لیے بھی جگہ موجود ہو جو ٹیکنالوجی کے دروازے تک پہنچنے کی استطاعت نہیں رکھتے اس تبدیلی کا ایک دوسرا رخ بھی ہے جس پر کاروباری طبقے کو سنجیدگی سے غور کرنا ہوگا جب ہر لین دین ڈیجیٹل ریکارڈ کا حصہ بنے گا تو کاروبار کی اصل آمدنی اور اخراجات کو چھپانا پہلے کی نسبت مشکل ہوسکتا ہے اس سے ٹیکس نیٹ وسیع کرنے میں مدد ملے گی اور وہ کاروباری ادارے جو باقاعدگی سے ٹیکس ادا کرتے ہیں انہیں غیر دستاویزی کاروبار کے مقابلے میں زیادہ منصفانہ مسابقت کا موقع مل سکتا ہے لیکن دوسری طرف ایک خدشہ یہ بھی ہے کہ اگر ڈیجیٹل لین دین کو کاروبار کی مجموعی آمدنی تصور کرکے ہر رقم پر بلاامتیاز ٹیکس یا دیگر مالیاتی ذمہ داریاں عائد کردی گئیں تو چھوٹے کاروباری افراد مشکلات میں گھر سکتے ہیں کاروبار کی فروخت اور کاروبار کا منافع دو مختلف چیزیں ہیں ایک دکاندار روزانہ ایک لاکھ روپے کی فروخت کرسکتا ہے مگر اس میں سے مال کی خریداری دکان کا کرایہ بجلی ملازمین کی اجرت اور دیگر اخراجات نکالنے کے بعد اس کے ہاتھ میں بہت معمولی منافع بچتا ہے لہٰذا محض بینک اکاؤنٹ میں آنے والی رقم کو کاروباری منافع سمجھ لینا ایک سنگین انتظامی غلطی ہوگی حکومت کو اس فرق کو سمجھتے ہوئے ٹیکس نظام کو آسان شفاف اور کاروبار کی حقیقی استطاعت کے مطابق بنانا ہوگا۔

عام شہری کے لیے بھی اس تبدیلی کے فوائد اور خدشات دونوں موجود ہیں ایک ملازم جس کی تنخواہ بینک اکاؤنٹ میں آتی ہے ایک طالب علم جو اپنے گھر سے رقم وصول کرتا ہے یا ایک خاندان جو یوٹیلیٹی بل ادا کرنے کے لیے بینک کی قطار میں کھڑا ہوتا ہے ان سب کے لیے ڈیجیٹل ادائیگی ایک آسان راستہ بن سکتی ہے لیکن پاکستان میں ہر شہری کے پاس اسمارٹ فون نہیں اور ہر گھر میں مستقل انٹرنیٹ بھی دستیاب نہیں دیہی علاقوں میں رہنے والے افراد بزرگ شہری ناخواندہ افراد اور وہ لوگ جو ٹیکنالوجی سے مانوس نہیں ہیں اس تبدیلی کے دوران خاص مشکلات کا سامنا کرسکتے ہیں ایک بزرگ خاتون جو برسوں سے نقد رقم کے ذریعے سودا سلف خریدتی رہی ہے اس سے یہ توقع رکھنا کہ وہ اچانک موبائل ایپ کے ذریعے ہر ادائیگی کرنا سیکھ لے گی زمینی حقیقت سے آنکھیں بند کرنے کے مترادف ہوگا اسی طرح اگر کسی شہری کا موبائل فون خراب ہوجائے بیٹری ختم ہوجائے انٹرنیٹ بند ہوجائے یا اس کا بینک اکاؤنٹ کسی تکنیکی وجہ سے عارضی طور پر غیر فعال ہوجائے تو کیا اس کی روزمرہ زندگی رک جائے گی کیا وہ اس وقت بھی اپنی ضرورت کی اشیا خرید سکے گا یا اسے صرف اس لیے واپس کردیا جائے گا کہ اس کے پاس ادائیگی کا ڈیجیٹل ذریعہ موجود نہیں ایک اور اہم مسئلہ سائبر جرائم اور مالیاتی فراڈ کا ہے پاکستان میں موبائل فون اور انٹرنیٹ کے استعمال کے ساتھ جعلی کالز فشنگ لنکس جعلی بینک پیغامات اور اکاؤنٹس سے رقم نکلوانے کے واقعات بھی سامنے آتے رہتے ہیں جب معیشت کا بڑا حصہ ڈیجیٹل ہوجائے گا تو سائبر مجرموں کے لیے بھی نئے راستے پیدا ہوسکتے ہیں ایک ناخواندہ دکاندار کو جعلی ادائیگی کا اسکرین شاٹ دکھا کر سامان لے جانا یا کسی جعلی QR کوڈ کے ذریعے رقم کسی دوسرے اکاؤنٹ میں منتقل کروانا ایسے خطرات ہیں جنہیں نظر انداز نہیں کیا جاسکتا خریدار بھی محفوظ نہیں ہوگا کیونکہ موبائل فون گم ہونے اکاؤنٹ ہیک ہونے غلط اکاؤنٹ میں رقم منتقل ہونے یا کسی جعلی ایپ کے ذریعے مالی نقصان اٹھانے کے امکانات موجود رہیں گے اس لیے ڈیجیٹل معیشت کے ساتھ مضبوط سائبر سکیورٹی فوری شکایت کے نظام رقم کی واپسی کے واضح ضابطوں اور مالیاتی آگاہی کی ضرورت بھی اتنی ہی اہم ہے جتنی خود ڈیجیٹل ادائیگی کی سہولت اس سارے معاملے میں ایک بنیادی سوال شہری کی مالی رازداری کا بھی ہے نقد رقم کے ذریعے خریداری کرتے ہوئے ہر چھوٹی چیز کا کوئی مرکزی ڈیجیٹل ریکارڈ نہیں بنتا مگر جب ہر ادائیگی ایک نظام کے ذریعے ہوگی تو کسی شہری کے اخراجات خریداری کے معمولات اور مالیاتی سرگرمیوں کا ایک وسیع ریکارڈ وجود میں آسکتا ہے یہ معلومات مالیاتی منصوبہ بندی اور معاشی تحقیق کے لیے مفید ہوسکتی ہیں مگر ان کا تحفظ بھی ریاست کی ذمہ داری ہے عام شہری کو یہ یقین ہونا چاہیے کہ اس کی ذاتی مالیاتی معلومات غیر متعلقہ افراد یا اداروں تک نہیں پہنچیں گی اور ان کا استعمال واضح قانونی ضابطوں کے تحت ہوگا ڈیجیٹل معیشت کا مطلب یہ نہیں ہونا چاہیے کہ شہری اپنی ہر چھوٹی بڑی خریداری کے ساتھ اپنی نجی زندگی کے تمام دروازے بھی کھول دے ریاست کو شفافیت صرف شہری سے نہیں بلکہ اپنے نظام سے بھی مطلوب ہونی چاہیے۔

اب ایک ایسے شخص کی طرف آئیے جو روزانہ اجرت پر کام کرتا ہے کسی ورکشاپ میں مزدوری کرتا ہے یا گھر گھر کام کرکے اپنی روزی کماتا ہے اسے اگر نقد اجرت کے بجائے ڈیجیٹل ادائیگی کی پیشکش کی جائے تو یہ بظاہر ایک آسان سہولت ہے مگر اس کے لیے ضروری ہے کہ اس کے پاس رقم وصول کرنے کا کوئی ذریعہ بھی ہو اگر اس کے پاس بینک اکاؤنٹ نہیں تو کیا اسے بغیر پیچیدہ شرائط کے اکاؤنٹ کھولنے کی سہولت دی جائے گی اگر اس کے پاس اسمارٹ فون نہیں تو کیا وہ کسی سادہ موبائل فون کے ذریعے رقم وصول اور استعمال کرسکے گا اور اگر وہ کسی دور دراز علاقے میں رہتا ہے جہاں بینک یا ایجنٹ دستیاب نہیں تو اپنی رقم نقد کیسے حاصل کرے گا حکومت کو ایسے افراد کے لیے کم خرچ بنیادی اکاؤنٹس بلامعاوضہ یا کم خرچ QR سہولت موبائل والٹس تربیتی مراکز اور دیہی علاقوں میں نقد رقم نکالنے کے مناسب مراکز فراہم کرنا ہوں گے اس کے ساتھ یہ بھی ضروری ہے کہ ڈیجیٹل اکاؤنٹ کھلوانے کا عمل آسان ہو اور کسی شہری کو محض شناختی دستاویزات یا تکنیکی پیچیدگیوں کی وجہ سے بنیادی مالیاتی سہولت سے محروم نہ رکھا جائے یہاں حکومت کے لیے ایک نہایت اہم اصول وضع کرنا ضروری ہے کہ ڈیجیٹل ادائیگی کا ذریعہ مہیا کرنا اور نقد ادائیگی کا حق ختم کرنا ایک بات نہیں جب تک ملک کے تمام شہریوں کو قابل اعتماد انٹرنیٹ بینکنگ سہولت موبائل فون مالیاتی آگاہی اور فوری شکایت کے نظام تک یکساں رسائی حاصل نہیں ہوجاتی اس وقت تک نقد رقم کو روزمرہ زندگی سے باہر نکالنے کی کوئی بھی کوشش معاشرے کے کمزور طبقات کے لیے مشکلات پیدا کرسکتی ہے حکومت کو چاہیے کہ وہ چھوٹے دکانداروں اور ریڑھی بانوں کو کسی جرمانے یا خوف کے ذریعے نہیں بلکہ سہولت تربیت اور مالی معاونت کے ذریعے اس نظام میں شامل کرے کم آمدنی والے کاروبار کے لیے ابتدائی عرصے میں اکاؤنٹ اور لین دین کی لاگت کم سے کم رکھی جائے ڈیجیٹل ادائیگیوں پر غیر ضروری کٹوتیوں سے تحفظ دیا جائے اور بجلی یا انٹرنیٹ کی بندش کی صورت میں متبادل انتظام بھی موجود ہو اس کے علاوہ ایسے افراد کے لیے نقد ادائیگی کا راستہ برقرار رکھا جائے جو حقیقی طور پر ڈیجیٹل نظام تک رسائی نہیں رکھتے۔

پاکستان کو ڈیجیٹل معیشت کی ضرورت ضرور ہے مگر اسے یہ بھی یاد رکھنا ہوگا کہ ٹیکنالوجی کا مقصد انسان کی زندگی آسان بنانا ہے نہ کہ انسان کو ٹیکنالوجی کا محتاج کردینا ترقی یافتہ ممالک کے معاشی ماڈل کو اپنانے سے پہلے اپنی معاشرتی حقیقتوں کو سمجھنا ضروری ہے ہمارے ہاں آج بھی ایسے گھرانے موجود ہیں جہاں ایک موبائل فون پورے خاندان کے استعمال میں ہوتا ہے ایسے بزرگ موجود ہیں جو بینک کی قطار کو موبائل ایپ پر ترجیح دیتے ہیں اور ایسے محنت کش بھی ہیں جن کے لیے روزانہ کی اجرت میں سے موبائل انٹرنیٹ کا خرچ نکالنا بھی ایک اضافی بوجھ ہے اگر حکومت نے ان تمام طبقات کو ساتھ لے کر یہ سفر شروع کیا تو ڈیجیٹل ادائیگی واقعی معاشی ترقی کا ذریعہ بن سکتی ہے لیکن اگر سہولت فراہم کرنے سے پہلے پابندیوں اور جرمانوں کا راستہ اختیار کیا گیا تو یہی نظام معاشرے کے کمزور ترین افراد کے لیے ایک نئی معاشی رکاوٹ بن سکتا ہے۔

بالآخر سوال یہ نہیں کہ پاکستان کو ڈیجیٹل ہونا چاہیے یا نہیں بلکہ اصل سوال یہ ہے کہ پاکستان کا ہر شہری اس تبدیلی میں کس مقام پر کھڑا ہوگا کیا ایک بڑے تجارتی مرکز کا مالک اور سڑک کنارے بیٹھا ہوا سبزی فروش دونوں اس نظام سے یکساں فائدہ اٹھا سکیں گے کیا ایک بینک اکاؤنٹ رکھنے والا شہری اور ایک ایسا مزدور جس نے کبھی بینک کا دروازہ نہیں دیکھا دونوں کے لیے یکساں سہولت پیدا ہوگی کیا حکومت ڈیجیٹل ادائیگیوں کے ساتھ شہری کی رازداری اور مالی تحفظ کی ضمانت بھی دے سکے گی ترقی کا سفر اسی وقت قابل اعتبار ہوتا ہے جب اس میں کسی کو پیچھے چھوڑنے کی قیمت ادا نہ کرنی پڑے پاکستان کو نقد سے ڈیجیٹل معیشت تک کا سفر ضرور طے کرنا چاہیے مگر اس سفر میں ریڑھی بان کی روزی مزدور کی اجرت بزرگ کی سہولت اور غریب کے چند سو روپے بھی اتنے ہی اہم ہونے چاہییں جتنے کسی بڑے کاروباری ادارے کے کروڑوں روپے کیونکہ کسی ملک کی معاشی ترقی کا اصل پیمانہ اس کے بینکوں میں موجود دولت نہیں بلکہ اس کے عام شہری کی زندگی میں پیدا ہونے والی آسانی۔