حکومت اور جماعت اسلامی کے درمیان مذاکرات کا فائنل راؤنڈ آج ہوگا

حکومت اور جماعت اسلامی کی سب کمیٹی کے درمیان مذاکرات کا فائنل راؤنڈ آج اسلام آباد میں منعقد ہو رہا ہے,اس اہم ترین اجلاس کی میزبانی نائب وزیراعظم و وزیرِ خارجہ سینیٹر اسحاق ڈار کریں گے-

اجلاس سے قبل اپنے اہم بیان میں نائب امیر جماعت اسلامی پاکستان لیاقت بلوچ نے کہا کہ حکومت اب پیٹرولیم لیوی میں کمی اور عوام کو ریلیف فراہم کرنے کے لیے عملی اقدامات کرے، کیونکہ مہنگا تیل، مہنگی بجلی و گیس اور مسلسل ٹیکسوں کا بوجھ عوام کے لیے اب بالکل ناقابلِ برداشت ہو چکا ہے۔

لیاقت بلوچ نے قومی معیشت کی تباہی پر تشویش ظاہر کرتے ہوئے کہا کہ سرکاری محکموں میں رائج کرپشن کا کینسر قومی معیشت کے لیے سب سے بڑا روگ بن چکا ہے, پیٹرولیم مصنوعات پر عائد لیوی کے مکمل خاتمے اور ایل این جی و گیس امپور ٹ پر قابض مافیا کے خاتمے سے ہی معیشت کا پہیہ دوبارہ رواں دواں ہو سکتا ہے۔

نائب امیر جماعت اسلامی نے اس عزم کا اعادہ کیا کہ جماعت اسلامی کی عوام کو حقیقی ریلیف دلانے اور ان کے حقوق کے لیے جاری جدوجہد ان شاء اللہ رنگ لائے گی اور حکومت کو عوامی مفاد میں فیصلے کرنے پر مجبور کرے گی۔