مرکزی چوک ظاہر پیر میں ٹریفک کا گھن چکر،تحریر: رئیس عنایت اللہ چاچڑ

ظاہر پیر کا مرکزی چوک شہر کا وہ اہم مقام ہے جہاں دن بھر ٹریفک کا غیر معمولی دباؤ رہتا ہے۔ مرکزی چوک سے چار اہم سڑکیں مختلف سمتوں میں نکلتی ہیں، جن میں چاچڑاں روڈ، خانپور روڈ، پرانا کے ایل پی روڈ اور ریلوے لائن پھاٹک روڈ شامل ہیں۔ ان چاروں راستوں سے آنے اور جانے والی گاڑیوں، موٹر سائیکلوں، رکشوں اور دیگر ٹرانسپورٹ کے باعث بالخصوص صبح اور شام کے اوقات میں مرکزی چوک پر ٹریفک کا گھن چکر پیدا ہو جاتا ہے۔ شہریوں، مسافروں اور کاروباری افراد کو روزانہ اس صورتحال کا سامنا کرنا پڑتا ہے۔ مرکزی چوک کی موجودہ صورتحال کو دیکھا جائے تو سب سے نمایاں مسئلہ ٹریفک کی روانی کا ہے۔ چاروں اطراف سے آنے والی ٹریفک کے لیے کوئی واضح مرکزی تقسیم یا باقاعدہ رہنمائی موجود نہ ہونے کے باعث اکثر گاڑیاں اپنی اپنی سمت میں گزرنے کی کوشش کرتی ہیں، جس سے چوک میں بے ترتیبی پیدا ہوتی ہے۔ معمولی سی بے احتیاطی بھی ٹریفک جام، راستہ رکنے یا کسی ناخوشگوار واقعے کا سبب بن سکتی ہے۔ خاص طور پر کاروباری اوقات میں جب شہری خریداری کے لیے نکلتے ہیں تو صورتحال مزید مشکل ہو جاتی ہے۔ اس مسئلے کا ایک قابلِ غور حل مرکزی چوک کے درمیان مناسب ڈیزائن اور سائز کا ٹریفک آئی لینڈ قائم کرنا ہے۔ اگر چوک کے وسط میں باقاعدہ ٹریفک آئی لینڈ بنایا جائے تو چاروں اطراف سے آنے والی ٹریفک کو ایک واضح راستہ اور سمت فراہم کی جا سکتی ہے۔ اس کے ساتھ سڑکوں پر واضح لائنیں، ٹریفک سائن بورڈز اور ضرورت کے مطابق دیگر حفاظتی انتظامات کیے جائیں تو ٹریفک کی روانی میں نمایاں بہتری لائی جا سکتی ہے۔ ٹریفک آئی لینڈ کو اس انداز میں تعمیر کیا جا سکتا ہے کہ یہ ٹریفک کے نظم و ضبط کے ساتھ ساتھ شہر کی خوبصورتی میں بھی اضافہ کرے۔ مرکزی چوک کے مسئلے کو مزید سنگین بنانے والی ایک اہم وجہ سڑکوں کے اطراف تجاوزات بھی ہیں۔ صبح سے شام تک مختلف مقامات پر ریڑھیوں، عارضی اسٹالز، دکانوں کے باہر سامان رکھنے اور دیگر تجاوزات کے باعث سڑک کا قابلِ استعمال حصہ محدود ہو جاتا ہے۔ پہلے ہی ٹریفک کے دباؤ کا شکار مرکزی شاہراہ جب تجاوزات کی وجہ سے مزید سکڑتی ہے تو گاڑیوں کے گزرنے میں دشواری بڑھ جاتی ہے اور ٹریفک کا دباؤ چوک کے اطراف تک پھیل جاتا ہے۔ ضرورت اس امر کی ہے کہ متعلقہ انتظامیہ، میونسپل ادارے اور ٹریفک پولیس مشترکہ طور پر مرکزی چوک کا تفصیلی جائزہ لیں۔ صرف چند دن کی کارروائی یا عارضی طور پر تجاوزات ہٹانے کے بجائے مستقل بنیادوں پر ایسا نظام بنایا جائے جس سے سڑکوں کے کنارے دوبارہ تجاوزات قائم نہ ہوں۔ تاجروں اور ریڑھی بانوں کے لیے مناسب متبادل جگہ مقرر کی جائے تاکہ روزگار بھی متاثر نہ ہو اور عوامی راستے بھی کھلے رہیں۔ ظاہر پیر کی بڑھتی ہوئی آبادی، کاروباری سرگرمیوں اور روزمرہ آمدورفت کے پیش نظر مرکزی چوک کو موجودہ ضرورت کے مطابق منظم کرنا وقت کی اہم ضرورت بن چکا ہے۔ آج اگر اس مسئلے کو سنجیدگی سے حل کر لیا جائے تو مستقبل میں ٹریفک کے بڑھتے ہوئے دباؤ سے پیدا ہونے والی مشکلات کو بڑی حد تک کم کیا جا سکتا ہے۔ شہریوں کی جانب سے مطالبہ کیا جا رہا ہے کہ مرکزی چوک ظاہر پیر کے درمیان ٹریفک آئی لینڈ قائم کیا جائے، مناسب روڈ مارکنگ اور ٹریفک سائن بورڈز نصب کیے جائیں، جبکہ صبح و شام کے اوقات میں ٹریفک کی روانی برقرار رکھنے کے لیے مؤثر انتظامات کیے جائیں۔ ساتھ ہی تجاوزات کے خاتمے کے لیے مستقل حکمتِ عملی اختیار کی جائے تاکہ مرکزی چوک نہ صرف ٹریفک کے مسائل سے محفوظ ہو بلکہ ظاہر پیر کی شناخت کے ایک خوبصورت اور منظم مرکزی مقام کے طور پر بھی سامنے آئے۔ یہ صرف ٹریفک کا مسئلہ نہیں بلکہ شہری سہولت، محفوظ سفر اور شہر کے بہتر مستقبل کا معاملہ ہے۔ بروقت منصوبہ بندی اور عملی اقدامات سے ظاہر پیر کے مرکزی چوک کو ایک منظم، محفوظ اور خوبصورت شاہراہ میں تبدیل کیا جا سکتا ہے۔