باغی رائیٹرز فورم کے اراکین کی شاعری، 27 ستمبر

مرے قلم سے نکلے ہیں، غم کے ہر اک افسانے

جو ٹوٹے خوابوں کو پھر سے اڑان دی، وہ شاعر ہوں

ندیم یعقوب گوہر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ُاجڑ گیا ہے تو کیوں کر نصیبِ شہر سے پوُچھ

وہ جی رہا ہے تو کیسے غریبِ شہر سے پوُچھ

یہ سرخ کس کی صداقت کا خون پی کے ہوٸی

نہ پوچھ مجھ سے خدارا صلیبِ شہر سے پوچھ

یہ زخمی روحیں ہیں محروم کیوں شفا سے بھی

یہ پوچھنا ہے تو اپنے طبیبِ شہر سے پوچھ

وہ جو بھی کہتا ہے اس پر وہ کیوں نہیں قاٸم

مجھے سنانے سے کیا ہے خطیب شہر سے پوچھ

یہ دشمنی کی روایت کی حد کہاں تک ہے

مجھے نہ پوچھ یہ جا کر حبیبِ شہر سے پوچھ

جو چھین لیتے ہیں روزی بہ زورِ جبر و جفا

وہ کون لوگ ہیں جا کر حسیبِ شہر سے پوچھ

اداس اداس ہیں آنگن لہو لہو گلیاں

کیوں نوحے ہر سُو بچھے ہیں نقیبِ شہر سے پوچھ

(عارف پرویز نقیب)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

امید ، سیدہ الماس فاطمہ

یہ جو دل کے کسی کونے میں

ایک دھیمی سی آنچ سلگتی ہے،

یہ کوئی وہم نہیں،

نہ ہی کوئی عارضی دلاسا ہے۔

یہ اس مٹی کی پکار ہے،

جو خزاں کے موسم میں بھی

بہار کا خواب دیکھنا نہیں چھوڑتی۔

جب رات اپنے پورے عروج پر ہو،

اور اندھیرا راستوں کو نگلنے لگے،

تب یہ ایک ننھی سی کرن بن کر

افق پر نمودار ہوتی ہے۔

یہ ہمیں بتاتی ہے کہ:

شکستہ پنکھ اڑان کا خاتمہ نہیں،

اور گرا ہوا ہر آنسو

مایوسی کی دلیل نہیں ہوتا۔

امید...

تاریک راتوں کے سینے میں

صبحِ نو کا ایک خاموش وعدہ ہے،

جو ہر گرتے ہوئے حوصلے کو

تھام کر کہتا ہے:

"ابھی سفر باقی ہے..."

،۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

تیری خوشبو کا مرے دل میں پتہ رکھا ہے

شکر مولا کا مجھے تجھ سے ملا رکھا ہے

بے وفا لوٹ کے آ، دیکھ محبت میری

آنسوؤں سے بھی ترا عکس بنا رکھا ہے

میں نے اک شہر ہمیشہ کے لیے چھوڑ دیا

لیکن اک شہر کو آنکھوں میں بسا رکھا ہے

اک مرے اٹھنے سے دل بیٹھ گیا رندوں کا

جام ہاتھوں میں مرے ہوش ربا رکھا ہے

بے بسی دیکھ نہ پائے کوئی اک دوجے کی

اس لیے شہر کا ہر دیپ بجھا رکھا ہے

میں نے ہر چیز لٹا دی ہے مگر آج تلک

تیرے گیسو کے لیے پھول بچا رکھا ہے

کارنامہ ہے محبت میں یہ میرا حمزہ

حوصلہ ڈوبنے والوں کا بڑھا رکھا ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

از قلم : صومی عباسی

نکل پڑی جو کبھی غموں کے ہجوم سے،

لوگوں کے کاموں میں بھی ہاتھ بٹاؤں گی۔

سانپ بن کر جو بھی ڈستے رہے مجھے،

اُن کو ہر وار کا مزا چکھاؤں گی۔

خود کو بچا لیا جو منافقوں سے کبھی،

اپنے لیے بھی ایک گھر بناؤں گی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

زیست

از قلم: مبراء عبدالقیوم

زیست اک خواب ہے،

تعبیر بھی ہوتی ہے

کبھی آسان،

کبھی مشکل بھی ہوتی ہے

کبھی آنکھوں میں سجے خواب سنہرے بن کر

کبھی پلکوں پہ

کوئی اشک بھی ہوتی ہے

کبھی رستے میں بچھے

پھول محبت بن کر

کبھی قدموں میں

کوئی خار بھی ہوتی ہے

کبھی اپنوں کی ہنسی

دل کو سکوں دیتی ہے

کبھی اپنوں سے ہی

دل پارہ پارہ ہوتا ہے

کبھی خاموشی میں

اک درد بیاں ہوتا ہے

کبھی لفظوں میں کوئی راز چھپا ہوتا ہے

یہ جو لمحے ہیں،

انہیں تھام کے رکھنا دل میں

وقت گزرے تو یہی یاد کا حصہ ہوں گے

زندگی نام نہیں

صرف خوشی پانے کا

غم بھی آتے ہیں تو

جینے کا سلیقہ دیتے ہیں

رات کتنی بھی گھنی ہو،

یہ یقیں رکھنا تم

صبح کا سورج اندھیروں کو مٹا دیتا ہے

زیست چلنے کا نام ہے،

رکنے کا نام نہیں ہے

گر شکست آئے

تو ہارے کا نام نہیں ہے

جو ملا،

شکر کیا؛

جو نہ ملا،

صبر کیا

یوں ہی انسان نے

جینا بھی سیکھ لیا،

ہنسنا بھی سیکھ لیا ہے

زیست اک خوبصورت سا سفر ہے شاید

ہر قدم اپنے

نئے رنگ دکھاتا ہے ہمیں

ہم مسافر ہیں،

سو چلتے ہی رہیں گے ایسے

کوئی منزل،

کوئی رستہ،

کوئی خواب لیے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

ڈھلتی شام نے سورج سے کہا، دھیرے سے

ہم بھی اک روز اسی طرح گزر جائیں گے

وقت کے ہاتھ میں رہتا نہیں کچھ بھی آخر

رنگ و بو، حسن کے منظر بھی بکھر جائیں گے

چہچہاتے ہوئے شاخوں پہ جو بیٹھے ہیں ابھی

شام ہوتے ہی یہ پنچھی بھی گھر جائیں گے

ہم غلط تھے کہ اِک درد کو دائم جانا

زخم گہرے بھی کسی روز تو بھر جائیں گے

جن کے لہجے میں ابھی عہدِ وفا بولتا ہے

کڑے وقت میں وعدوں سے مکر جائیں گے

وقت آنے پہ ہی کھلتی ہے حقیقت سب کی

کتنے چہرے ہیں جو چہروں سے اتر جائیں گے

زندگی تجھ سے گلہ بھی ہے، چاہت بھی بہت

تیرے ہوتے ہوئے تجھ سے بچھڑ جائیں گے

زندگی اپنی ہی شرطوں پہ گزاری میں نے

میں گزر جاؤں گا، مرے قصے ٹھہر جائیں گے

ہم برے ہیں تو اچھوں سے گریزاں ہیں ابھی

عین ممکن ہے کہ کل ہم بھی سدھر جائیں گے

اپنے حصے میں کہاں عمرِ خضر ہے، آزادؔ

چند سانسوں کے لیے آئے ہیں، مر جائیں گے

سید آزاد گیلانی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

از قلم: رئیس عنایت اللہ چاچڑ

دل میں اک درد سا رہتا ہے، کہاں جائے کوئی

ہم کو اس شہر میں اپنا بھی کہاں پائے کوئی

رات خاموش ہے، آنکھوں میں نمی ہے لیکن

دل کی آواز کو آ کر ذرا سن پائے کوئی

ہم نے ہر موڑ پہ رشتوں کو نبھایا لیکن

کون بچھڑے ہوئے لوگوں کو بھلا پائے کوئی

وقت کی دھوپ نے سب رنگ چرا لیے ہیں

پھر سے یادوں میں وہ موسم بھی کہاں آئے کوئی

ہم تو خاموش کھڑے دیکھتے رہتے ہیں اسے

جس کو چاہیں وہ کبھی لوٹ کے آ جائے کوئی

دل کے زخموں کو چھپانا بھی ہنر ہے شاید

کاش اس درد کی گہرائی سمجھ پائے کوئی

رئیسؔ ہم نے تو محبت میں فقط اتنا کہا

دل نہ توڑے کبھی، دل اپنا بھی لگائے کوئی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہجر کے دہشت کدے کا وہ مکیں کیسے ہوا

جانِ محفل تھا مگر گوشہ نشیں کیسے ہوا

کون سی مجبوریوں کے ہاتھوں جانے بک گیا

ورنہ وہ خوش پوش یوں بے آستیں کیسے ہوا

چھوڑ جانا اس کے وصف و فکر میں شامل نہ تھا

عشق میں وہ اس قدر باریک بیں کیسے ہوا

جس کا ہر اک لفظ تھا میزان میں بھاری پڑا

سوچتا ہوں آج وہ حرفِ نہیں کیسے ہوا

وہ نقیبِ زندگی ، تھا جس کو دعویِٰ وفا

پھر زمانے میں نجانے بے یقیں کیسے ہوا

(عارف پرویز نقیب۔ کراچی)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کون مجھے دیکھے

سید ضیغم حسین عابدی

کوئی زندہ بھی نہیں بچا، جو پلٹ کر مجھے دیکھے

میں اس ویران گھر کو دیکھوں، یہ گھر مجھ کو دیکھے

میں شہر بھر کی ٹھوکروں میں راستے کا پتھر ہوں

کوئی کیوں اپنے قدم روک کر آخر مجھے دیکھے

سبھی گزرے ہیں میرے پاس سے، پہچان کر بھی

کوئی تو ٹھہر کر میری آنکھ کا منظر مجھے دیکھے

آج وہ شخص بھی مجھ سے منہ موڑ کر گزر گیا

جسے امید تھی کبھی وہ مڑ کے آ کر مجھے دیکھے

میں مر بھی جاؤں تو شاید یہی عالم رہے گا

نہ کوئی قبر پہ آئے، نہ کوئی مڑ کر مجھے دیکھے

عجیب لوگ ہیں، زندہ ہوں تو پہچانتے نہیں

خدا جانے مری موت کے بعد کون مجھے دیکھے

ضیغمؔ اس شہر میں تنہائی کا عالم یہ ہے

میں خود کو دیکھتا رہتا ہوں، کوئی کب مجھے دیکھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

ندیم یعقوب گوہر

محبت میں حدوں سے پھر گزرنا بھی ضروری تھا

بچھڑنے سے ذرا پہلے سنورنا بھی ضروری تھا

​انا کی جنگ میں ہم جیت کر بھی مات کھا بیٹھے

بلندی مل چکی تھی پر اترنا بھی ضروری تھا

ہم زندگی سمجھے، وہی قاتل نکلا اپنا

مگر اس شخص کے ہاتھوں مکرنا بھی ضروری تھا

وفا کی راہ میں تم ہی اکیلے تو نہیں بکھرے

ہمارے واسطے تھوڑا بکھرنا بھی ضروری تھا

​کبھی وہ مان جاتا تھا، کبھی وہ روٹھ جاتا تھا

اسے پانے کی خاطر سو بار مرنا بھی ضروری تھا

​ہمارے ظرف کی شاید یہی اک انتہا ٹھہری

کہ اس کی بے وفائی پر مکرنا بھی ضروری تھا

​محبت کے پرندوں کو رہائی مل ہی جانی تھی

مگر صیاد کے ہاتھوں بچھڑنا بھی ضروری تھا

​اگرچہ وہ میرا اپنا تھا، پر غیروں کی باتوں میں

وہ آ کر اپنے وعدوں سے مکرنا بھی ضروری تھا

​فصیلِ شہر پر دستک جو دی تھی ہم نے نادانی میں

تو پھر دیوار و در کا بھی لرزنا بھی ضروری تھا

​ہزاروں خواب آنکھوں کی دہلیز پر سجایا تو لیے

مگر ان خوابوں کا اب تو بکھرنا بھی ضروری تھا

درِ مے خانہ پر جا کر ملے جب تم سے اے گوہر

تو اپنی پارسائی سے مکرنا بھی ضروری تھا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

( طنز و مزاح)

عنوان: مہنگائی

از قلم: فائزہ شہزاد

کیا حال دل سناؤں لوگو

کیا دُکھ درد سناؤں لوگو

زندگی بنی اِک عذاب ہے

نہ روٹی ہے نہ کباب ہے

کیا کھائیں کیا پیئیں

کس کس کو بتاؤں لوگو

بجلی ہے نہ گیس ہے

بل بھی ہزاروں کاہے

کہاں سے بھروں کیا کروں

کہیں ڈاکہ ڈالوں لوگو

بیٹا بھی ہے نا خوش

نہ ہے نوکری نہ چھوکری

غصّے میں ہر دم رہتا ہے

کہاں سے خوشیاں لاوں لوگو

بیٹی بھی ہے آج کل اُداس

شوہر بھی ہے پریشان

بچے ہیں الگ بیزار

کس کس کو سمجھاؤں لوگو

اپنا دماغ بھی ہے گم

سنائی بھی دیتا ہے کم

دل بھی گھبرا رہا ہے

چولہا کیسے جلاؤں لوگو

مہنگائی نے ایسا مارا ہے

بس صرف اِک یہی سہارا ہے

جو گلُک میں چار پیسے ہیں

اُنہیں کیسے بچاؤں لوگو

مہینے کے آخری دن ہیں

اور یہ پیغام آیا ہے مُجھ کو

ساسو ماں آ رہی ہے کل

اب جان کیسے چھڑاوں لوگو

جان کا وبال ہے یہ مہنگائی

بال بھی لے گئی یہ مہنگائی

رنگ روپ اور سارا حُسن

کیسے واپس لاوں لوگو

ساری دُنیا ہو گئی ہے غریب

غریب سے بڑھ کر ہو گئی ہےعجیب

کوئی رِشتہ نہیں کسی سے رہا

پیسے سے کیسے خریدوں لوگو

دُکھ درد کے مارے ہیں سب یہاں

نہ کوئی بندہ نہ کوئی بندہ نواز

تنہائی ہے اور خاموش ہیں لب

کہاں سے خزانہ لاوں لوگو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل ۔۔۔

از قلم ۔ سید آزاد گیلانی

نکتے ہم بھی اٹھائیں گے، ذرا وقت آنے دو

آپ بھی جان جائیں گے، ذرا وقت آنے دو

مری مصلحت کو کمزوری سمجھنے والو

آپ خود شور مچائیں گے، ذرا وقت آنے دو

ہم سے ٹکراؤ گے، خود اپنا پتہ پوچھو گے

ہم تمہیں رستہ دکھائیں گے، ذرا وقت آنے دو

ابھی ہم شہر کے دستور سے باہر ہیں، مگر

اپنا دستور بنائیں گے، ذرا وقت آنے دو

آنکھ میں خواب ابھی ہم نے دبا رکھے ہیں

ان کو تعبیر میں لائیں گے، ذرا وقت آنے دو

جنہیں حسرت ہے ہمیں نیچا دکھانے کی میاں

ہم انہیں آئینہ دکھائیں گے، ذرا وقت آنے دو

بات اتنی ہے کہ ہم وقت کے پابند نہیں، آزادؔ

وقت کو اپنا بنائیں گے، ذرا وقت آنے دو

۔۔۔۔۔۔۔۔۔۔۔۔۔۔۔۔۔۔۔۔۔۔

صنف: غزل

از قلم: سائرہ علی

چلو محبت میں یہ راہ بھی اپنا کر دیکھتے ہیں،

کچھ دن اُس بے وفا کو بھلا کر دیکھتے ہیں!

ہر دم جو نم رہتی ہیں آنکھیں اُن کی یاد میں،

ان آنسوؤں کو کہیں چھپا کر دیکھتے ہیں۔

اُن کی یادیں، اُن کی باتیں، فرصت نہیں دیتیں؛

خود کو کہیں اور الجھا کر دیکھتے ہیں۔

میری وفا نہ کبھی سمجھ سکے گا وہ ستمگر،

بات یہ پھر سے خود کو سمجھا کر دیکھتے ہیں۔

پاگل کہتا ہے زمانہ مجھ کو تیری چاہت میں،

فسانہ یہ محبت زمانے کو سنا کر دیکھتے ہیں!

دل کا فیصلہ یہ دل ہی نہ مانے گا،

آج اس دل کو پتھر بنا کر دیکھتے ہیں۔

خود سے کر چکے ایسے وعدے ہزار، سائرہ!

آج پھر خود سے دھوکہ کھا کر دیکھتے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نذرانۂ عقیدت بحضورِ اہل بیتِ اطہارؑ

جو کر سکا تمیز نہ سید ، یزید میں

اس جیسا کم نصیب کوئی اس جہاں میں ہے ؟

نازاں ہوں مجھ کو رشک ہے کہ میرا نام بھی

زہرا بتول و حیدر کے خانداں میں ہے

اصغر کی ایک ٹھوکر زم زم و حوض کوثر

جا ڈوب مر فرات تو کس گماں میں ہے

پیاسی سکینہ ہے تو زینب ہے بے ردا

آؤ دیکھو غازی کی وفا کس امتحاں میں ہے ؟

کیا تزکرہ بتول و سکینہ ہو کہ زینب

کوئی ایسا پاک دامن دونوں جہاں میں ہے ؟

عون و محمد جا چکے اکبر بھی اب تیار ہیں

تو ہی بتا یہ حوصلہ کسی اور ماں میں ہے ؟

شام غریباں آئی جلنے لگے جو خیمے

قاسم کا لاشہ بھی آہ و فغاں میں ہے

ہر آنکھ اشک بار ہے ہر قلب نوحہ گر

ابن علی کا غم تو غم جاوداں میں ہے ۔

کلام۔ سید عبید الرحمٰن آزاد گیلانی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

از قلم: سائرہ علی

کترا کے زندگی سے، گزر جاؤں کیا کروں؟

رسوائیوں کے خوف سے، مر جاؤں کیا کروں؟

میں کیا کروں کہ تیری انا کو سکوں ملے،

گر جاؤں، ٹوٹ جاؤں، بکھر جاؤں کیا کروں؟

پھر آ کے لگ رہے ہیں، پروں پر ہوا کے تیر،

پرواز اپنی روک لوں، ڈر جاؤں کیا کروں؟

تنہائیوں کے بیچ میں، گھری ہوئی ہوں میں،

آواز کس کو دوں، کدھر جاؤں کیا کروں؟

کیا حکم آپ کا ہے، میرے واسطے حضور!

جاری سفر رکھوں کہ، ٹھہر جاؤں کیا کروں؟

کب تک سنوں بہار میں، خوشبو کی دستکیں؟

کیوں اے غمِ حیات، سنور جاؤں کیا کروں؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

اک بجھے دل کی تھی دعا صاحب

کون سنتا مِری صدا صاحب

دل کی حالت خدا ہی جانے ہے

کس سے کرتی بھلا گلہ صاحب

غم نے ہر سو مجھے ہے گھیر رکھا

صبر کر دے مجھے عطا صاحب

عمر بھر ہے سکوں کو ڈھونڈا بس

مل نہ پایا کوئی سرا صاحب

میں نے ہر درد کو چھپا رکھا

کون سمجھے ہے دل دکھا صاحب

جس کو اپنا کہا وہ دور ہوا

کس سے مانگوں میں پھر وفا صاحب

ردا فاطمہ اعوان ۔گجرانوالہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مرنے دیتے ہیں نہ جینے کا مزہ دیتے ہیں

خواب انسان کو سولی پہ چڑھا دیتے ہیں

ہاتھ آسانی سے آ جائیں تو دنیا والے

چاند تاروں کو بھی مٹی میں ملا دیتے ہیں

میں نے بچوں کی طرح لاڈ اٹھائے اس کے

خیر بچے بھی کہاں سارے صلہ دیتے ہیں ۔

چھوڑ سکتے ہیں نہ اب انکو نبھانا ممکن

کچھ تعلق ہمیں بیمار بنا دیتے ہیں

اپنے رستوں کی سہولت کیلئے پیڑ تو کیا ؟

لوگ تعمیر ھوئے گھر بھی گرا دیتے ہیں

ہم محبت کے چراغوں کو بچائیں کس سے

روشنی کے ہی طلب گار بجھا دیتے ہیں

ڈاکٹر نازیہ ندیم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

از قلم: فاطمہ زہراء

دل کو ہر حال میں بہلانا تو ہے

زخم گہرا بھی ہو چھپانا تو ہے

جو بچھڑ جائے اسے روک نہیں سکتا کوئی

اس کی یادوں میں مسکرانا تو ہے

ٹوٹ کر بھی تو بکھرنا نہیں عادت اپنی

خود کو پھر خود ہی بنانا تو ہے

کوئی سمجھے نہ اگر دردِ دلِ تنہائی

خامشی سے اپنا وقار بچانا تو ہے

جس نے چھوڑا ہے اسے چھوڑ کے آگے بڑھنا

اپنے قدموں کو بڑھانا تو ہے

رات کتنی بھی سیاہ ہو تو سحر آئے گی

دل کو اس بات پہ یقین دلانا تو ہے

ہم نے مانا کہ ناقدروں سے بھری ہے دنیا

ہم نے پھر بھی محبت سے آزمانا تو ہے

زہراؔ اب کس سے کریں درد کی فریاد یہاں

دردوں سے نباہ کرکے جینا تو ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

"تم ہو"

محمد سبحان شوق

میرے تخیل میں گماں میں تم ہو

میرے قلم کی ہر سطر میں تم ہو

مصرع ہو اول ہر غزل کا میرے

ہر شعر ثانی کی گرہ میں تم ہو

پڑھتا ہوں جب کوئی کتاب اکثر

لگتے ہے سب الفاظ دل کو بھانے

لفظوں میں حرُفوں میں زبر میں تم ہو

لگتا ہے ہر منظر کشی میں تم ہو

احساس میں جذبو میں غم میں تم ہو

ہر آس میں امید بر میں تم ہو

میری تمنا میں طلب میں تم ہو

بھٹکے ہوئے مجنوں کی رہ میں تم ہو

محمل میں صحرا میں لیلہ میں تم ہو

رانجھے کی الفت ہیر خُم میں تم ہو

فرہاد کی شیریں سخن میں تم ہو

عشاق کے دل میں جگر میں تم ہو

تم ہو گلستانِ چمن کی رانی

رونق چمن کی انجمن میں تم ہو

پھولو میں کلیوں میں ثمر میں تم ہو

غنچوں میں شاخوں میں شجر میں تم ہو

گل کی مہک میں دلکشی میں تم ہو

نوخیز کلیوں کی چٹک میں تم ہو

سوسن میں لالا میں سمن میں تم ہو

نرگس میں رانی میں کنول میں تم ہو

نازک گلابو کی ادا میں تم ہو

موسم بہاراں کی ندا میں تم ہو

صر صر میں پروا میں صبا میں تم ہو

برکھا میں میگھا میں ابر میں تم ہو

بارش میں بوندو کی کھنک میں تم ہو

ہر دلنشیں موسم کی بس میں تم ہو

ٹھنڈی ہوا کے ہر سحر میں تم ہو

باران مٹی کی مہک میں تم ہو

رنگِ فضا کی شبنمی میں تم ہو

سورج کی وہ پہلی شفق میں تم ہو

خاموشی میں غُل میں سکوں میں تم ہو

مہتاب کی کرنو میں ضو میں تم ہو

تاریک رستو میں شریک میرے

میری حیاتِ رہبری میں تم ہو

جلوا نما ہر داستان میں تم

ہر داستانِ زندگی میں تم ہو

یہ عشق میرا اس مقام پر ہے

سمجھا ہوں تم کتنی مثالو سے اب

اس سے بڑی تو بات ہی نہیں ہے

یہ اتفاقاً ختم بات تم پر

اس نظم کے عنوان میں بھی تم ہو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مزاحیہ غزل ۔۔۔

رَن مُرِیدی کے قَرِینے۔

شہر میں جب سے مہنگی چینی ہوتی جاتی ہے

پڑوسن اپنی بھی اُتنی کمینی ہوتی جاتی ہے

کبھی جھاڑو کبھی برتن کہیں بچے سنبھالے ہے

حیاتِ شوہر اب تو مشینی ہوتی جاتی ہے

نشے کی لت لگی ان کو یہ ہیں اقبال کے شاہیں

تب ہی پرواز ان کی زمینی ہوتی جاتی ہے

لڑائی میاں بیوی کی جو پہلے اک تماشہ تھی

ہمارے شہر میں اب وہ سنگینی ہوتی جاتی ہے

کمائی شوہرِ مسکین کی سب اڑتی جاتی ہے

مگر بیگم کی لائف میں رنگینی ہوتی جاتی ہے

گماں تھا ہم کو کہ رن مریدی کرنی پڑتی ہے

مگر یہ بات اب تو یقینی ہوتی جاتی ہے

محبت جنگ میں تبدیل ہو کر بوجھ ہے آزاد

عداوت میاں بیوی کی دیرینی ہوتی جاتی ہے

سید آزاد گیلانی ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

محمد شاہد نسیم

وطن کی خاک میری جان ہے، ایمان ہے

وطن پر جان دینا ہی ہماری شان ہے

نہ طوفاں سے ڈرے ہیں، نہ آندھی سے کبھی

وطن کی پاسبانی ان کا عزمِ جاودان ہے

خدا رکھے سلامت تا قیامت پاک فوج کو

اسی کے دم سے قائم ملک میں امن و امان ہے

لہو دے کر جوانوں نے چمن آباد رکھا ہے

شہیدوں کی قربانی کا یہ روشن نشان ہے

سلام اُن جانبازوں کو، سلام اُن شہیدوں کو

جنہیں جان سے بھی عزیز پاکستان ہے

جہاں میں آج لہراتا ہے پرچمِ پاکستان

یہ سب شہیدوں کی قربانی کا احسان ہے

شاہدؔ اُن کی وفاؤں کو سلامِ دل سے کرتا ہے

وطن سے عشق ہی جن کا اصل ترجمان ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

تم تیر و تبر اور نہ تلوار نکالو

'جب توپ مقابل ہو تو اخبار نکالو'

قدموں میں خود اپنے ہی سمٹ جائے گا ظالم

تم دل سے ذرا خوف کے آثار نکالو

ہر سمت یہاں جھوٹ کی ہے آج نمائش

سچائی کا پھر کوئی نیا وار نکالو

منصب کا نشہ عقل نہ کھا جائے، تم اپنا

تاریخ کے اوراق سے معیار نکالو

جو لوگ چراغوں کو بجھانے پہ تلے ہوں

تم علم کی شمعیں سرِ بازار نکالو

الفاظ کی تزئین بہت خوب ہے لیکن

لہجے سے بھی کچھ درد اور آزار نکالو

دستار بچانی ہے تو کردار سے اپنے

بہتر یہ ہے گن گن کے سبھی خار نکالو

طوبیٰؔ یہ زمانہ بھی بدلتا ہے یقیناً

اب شعر کوئی تم بھی تو شہکار نکالو

یاسمین اختر طوبیٰ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چہچہائیں گی شام کو چڑیاں

گیت گائیں گی شام کو چڑیاں

کاگ گر اٌن کے پی گیا انڈے

غل مچائیں گی شام کو چڑیاں

گھونسلا اس لۓ نہیں توڑا

آئیں جائیں گی شام کو چڑیاں

جب اُڑا لیں گی اپنے بچوں کو

یاد آئیں گی شام کو چڑیاں

پر بھگو کر وہ پانی مِیں اپنے

پھڑپھڑائیں گی شام کو چڑیاں

سائباں گھر کی ہر طرف رکھا

پر سکھائیں گی شام کو چڑیاں

دو نوالے تھے ایک چھوڑ دیا

آکے کھائیں گی شام کو چڑیاں

رکھ لے کچھ تو بچا کے اے ساجد

کچھ تو کھاٸیں گی شام کو چڑیاں

پروفیسر سہیل ساجد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عنوان: امید

ازقلم:سیدہ الماس فاطمہ

یہ جو دل کے کسی کونے میں

ایک دھیمی سی آنچ سلگتی ہے،

یہ کوئی وہم نہیں،

نہ ہی کوئی عارضی دلاسا ہے۔

یہ اس مٹی کی پکار ہے،

جو خزاں کے موسم میں بھی

بہار کا خواب دیکھنا نہیں چھوڑتی۔

جب رات اپنے پورے عروج پر ہو،

اور اندھیرا راستوں کو نگلنے لگے،

تب یہ ایک ننھی سی کرن بن کر

افق پر نمودار ہوتی ہے۔

یہ ہمیں بتاتی ہے کہ:

شکستہ پنکھ اڑان کا خاتمہ نہیں،

اور گرا ہوا ہر آنسو

مایوسی کی دلیل نہیں ہوتا۔

امید...

تاریک راتوں کے سینے میں

صبحِ نو کا ایک خاموش وعدہ ہے،

جو ہر گرتے ہوئے حوصلے کو

تھام کر کہتا ہے:

"ابھی سفر باقی ہے..."

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔