اقبال کے نام خط، ملک کی حالت بتانے کے لیے،تحریر: انمول اعوان

بسم اللہ الرحمن الرحیم

محترم علامہ محمد اقبال صاحب!

السلام علیکم ورحمۃ اللہ

امید ہے کہ آپ جنت کی پرسکون فضاؤں میں سکون سے ہوں گے۔ میں آپ کو یہ خط آج کے پاکستان سے لکھ رہی ہوں، اس پاکستان سے جس کا خواب آپ نے دیکھا تھا، جس کی خاطر آپ نے قوم کو خودی کا درس دیا تھا، جسے آپ نے شاہین کی پرواز سے تعبیر کیا تھا۔

میرے پیارے شاعر مشرق پاکستان! آج میں آپ کو یہ بتانے بیٹھی ہوں کہ آپ کے خواب کا پاکستان کیسا ہے۔ سچ کہوں تو یہ خط لکھتے ہوئے میرا دل بوجھل ہے، ہاتھ کانپ رہے ہیں، کیونکہ جو کچھ میں آپ کو بتانے جا رہی ہوں، وہ سن کر آپ کا دل بھی دکھے گا۔

آپ نے جس قوم کو کہا تھا کہ اٹھ کہ اب بزم جہاں کا اور ہی انداز ہے، وہ قوم آج بھی سو رہی ہے۔ آپ نے کہا تھا کہ خودی کو کر بلند اتنا کہ ہر تقدیر سے پہلے خدا بندے سے خود پوچھے بتا تیری رضا کیا ہے، آج ہم نے خودی کو بلند کرنے کے بجائے دوسروں پر انحصار کرنا سیکھ لیا ہے۔ ہم ہر چیز کے لیے دوسروں کی طرف دیکھتے ہیں، اپنی محنت پر یقین کم اور قسمت پر زیادہ کرنے لگے ہیں۔

اقبال صاحب! آپ نے تو کہا تھا کہ نوجوان ہماری قوم کا سرمایہ ہیں، لیکن آج ہمارا نوجوان مایوسی کا شکار ہے۔ تعلیم ہے تو روزگار نہیں، ڈگریاں ہیں تو منزل نہیں۔ نوجوان ڈگری لے کر نوکری کے لیے در در بھٹکتا ہے، اور جب اسے کچھ نہیں ملتا تو وہ باہر جانے کے خواب دیکھنے لگتا ہے۔ جو نوجوان اس ملک کو بنانے والے تھے، وہی آج اس ملک کو چھوڑنے کی سوچ رہے ہیں۔ کیا یہ لمحہ فکریہ نہیں؟

آپ کے پاکستان میں آج سچ کی قیمت کم اور جھوٹ کا بازار گرم ہے۔ جسے آپ نے کہا تھا کہ صداقت، عدالت، شجاعت، سخاوت، وہ آج کتابوں میں تو ملتی ہے، عملی زندگی میں کم نظر آتی ہے۔ لوگ ایک دوسرے کو گرانے میں لگے ہیں، اٹھانے میں نہیں۔ نفرت پھیلانا آسان اور محبت بانٹنا مشکل ہو گیا ہے۔

تعلیم کا حال یہ ہے کہ سکول تو بہت ہیں، لیکن تربیت کم ہے۔ بچے نمبر تو لے آتے ہیں، لیکن کردار کہیں پیچھے رہ جاتا ہے۔ آپ نے تو علم کو روشنی کہا تھا، آج علم صرف نوکری کا ذریعہ بن کر رہ گیا ہے۔ استاد کا احترام کم ہو گیا ہے، اور کتاب سے دوستی ختم ہوتی جا رہی ہے۔ موبائل نے کتاب کی جگہ لے لی ہے، اور سوشل میڈیا نے سوچنے سمجھنے کی صلاحیت چھین لی ہے۔

اقبال صاحب! سب کچھ برا بھی نہیں ہے۔ آپ مایوس نہ ہوں۔ آج بھی اس ملک میں ایسے نوجوان ہیں جو آپ کے خواب کو زندہ رکھے ہوئے ہیں۔ آج بھی بیٹیاں تعلیم حاصل کر رہی ہیں، آج بھی نوجوان لکھ رہے ہیں، بول رہے ہیں، سوچ رہے ہیں۔ آج بھی مسجدوں میں اذانیں گونجتی ہیں، آج بھی اس مٹی سے محبت کرنے والے لوگ موجود ہیں۔ آج بھی جب ملک پر کوئی مشکل آتی ہے تو پوری قوم ایک ہو جاتی ہے۔ یہی ہماری اصل طاقت ہے۔

میں آپ کو یہ خط اس لیے لکھ رہی ہوں کہ آپ کی فکر آج بھی ہمیں راستہ دکھاتی ہے۔ ہمیں آج بھی آپ کے شاہین کی ضرورت ہے، جو اونچی پرواز کرے، جو گر کر بھی ہار نہ مانے۔ ہمیں آج بھی آپ کی خودی کی ضرورت ہے، جو ہمیں غلامی سے نکال کر خودداری سکھائے۔

اقبال صاحب! آپ دعا کریں کہ ہم آپ کے خواب کو شرمندہ نہ کریں۔ ہم پھر سے جاگ جائیں، پھر سے سوچیں، پھر سے محنت کریں۔ ہم اس پاکستان کو وہ پاکستان بنائیں جس کا آپ نے خواب دیکھا تھا، ایک ایسا پاکستان جہاں انصاف ہو، علم ہو، محبت ہو اور انسانیت ہو۔

آپ کی فکر کی ایک ادنیٰ چاہنے والی

انمول اعوان