لاہور میں منشیات فروشوں کا منظم نیٹ ورک بے نقاب، 24 کلو ہیروئن، 7 ڈرونز برآمد

لاہور میں پولیس نے منشیات فروشوں کے ایک منظم نیٹ ورک کے خلاف بڑی کارروائی کرتے ہوئے باٹا پور کے گاؤں ڈھیال میں چھاپہ مار کر 24 کلو گرام ہیروئن برآمد کرلی۔ کارروائی کے دوران ایک خاتون سمیت دو ملزمان کو گرفتار کر لیا گیا۔

پولیس حکام کے مطابق برآمد کی گئی ہیروئن کی مالیت تقریباً 3 کروڑ 60 لاکھ روپے بتائی جا رہی ہے۔ چھاپے کے دوران ملزمان کے قبضے سے 7 ڈرونز بھی برآمد ہوئے، جس سے اس نیٹ ورک کے جدید ذرائع استعمال کرنے کے شواہد سامنے آئے ہیں۔حکام کا کہنا ہے کہ ملزمان کے قبضے سے بھاری مقدار میں اسلحہ بھی برآمد کیا گیا، جس میں ایک ایس ایم جی رائفل، ایک ایم-4 رائفل، 3 نائن ایم ایم پستول، 6 میگزینز، 377 گولیاں اور 800 سے زائد کارتوس شامل ہیں۔پولیس کے مطابق گرفتار ملزمان سے تفتیش جاری ہے تاکہ منشیات کی سپلائی چین، سہولت کاروں اور اس نیٹ ورک سے وابستہ دیگر افراد تک رسائی حاصل کی جا سکے۔ حکام کا کہنا ہے کہ شہر میں منشیات فروشوں اور جرائم پیشہ عناصر کے خلاف کارروائیاں مزید تیز کی جائیں گی۔