نظام کی تباہی کے ذمہ دار بھی سیاست دان، اور اب نظام کی ری سیٹ کا مطالبہ بھی سیاست دانوں کی طرف سے،تجزیہ:شہزاد قریشی
نقطہ نظر
نظام کولیپس کس نے کیا؟ اب ری سیٹ کا مطالبہ کرنے والے اپنی سیاسی ذمہ داری کب قبول کریں گے؟
پاکستان کا نظام نہیں، سیاست دانوں کی سیاسی سوچ ری سیٹ کرنے کی ضرورت ہے!
تجزیہ : شہزاد قریشی
پاکستان میں آج کل ’’سسٹم کولیپس‘‘ اور ’’سسٹم ری سیٹ‘‘ کی اصطلاحات بہت سننے کو مل رہی ہیں۔ سوال یہ ہے کہ آخر یہ نظام کس نے تباہ کیا؟ کیا یہ نظام خود بخود ناکام ہوا یا اس کی ناکامی کے پیچھے ان لوگوں کا بھی ہاتھ ہے جو برسوں سے اقتدار کی سیاست کرتے آئے ہیں؟ میری نظر میں پاکستان کے موجودہ سیاسی بحران کا ایک بنیادی پہلو یہ ہے کہ سیاسی جماعتوں نے ایک دوسرے کو برداشت کرنے، جمہوری روایات کو مضبوط بنانے، پارلیمنٹ کو بااختیار کرنے اور اداروں کو آئینی حدود میں رکھنے کے بجائے اقتدار کی کشمکش کو اپنی سیاست کا محور بنائے رکھا۔ جب حکومت میں ہوں تو نظام درست دکھائی دیتا ہے، جب اپوزیشن میں ہوں تو پورا نظام ناقص اور ناکام قرار پاتا ہے۔ یہی وہ سیاسی تضاد ہے جس نے ریاستی نظام پر عوام کے اعتماد کو متاثر کیا ہے۔ اقتدار کے حصول کے لیے سیاسی محاذ آرائیاں، ایک دوسرے کی حکومتوں کو گرانے کی کوششیں، انتخابی نتائج پر مسلسل تنازعات، ذاتی مفادات کو قومی مفادات پر ترجیح دینا اور پارلیمنٹ کو قومی مسائل کے حل کے بجائے سیاسی جنگ کا میدان بنانا، یہ سب وہ عوامل ہیں جنہوں نے نظام کو کمزور کرنے میں اپنا کردار ادا کیا ہے۔ دلچسپ بات یہ ہے کہ اب اسی سیاسی ماحول میں کبھی ’’سسٹم کولیپس‘‘ کی بات ہوتی ہے، کبھی ’’سسٹم ری سیٹ‘‘ کا مطالبہ سامنے آتا ہے اور کبھی سیاسی ری سیٹ کی ضرورت محسوس کی جاتی ہے۔ وفاقی وزیر داخلہ محسن نقوی نے جولائی 2026 میں موجودہ نظام کو ناکام قرار دیتے ہوئے اس کی بنیادی اصلاحات کی بات کی، جبکہ ستمبر میں واضح کیا کہ ری سیٹ کا مطلب نظام کو توڑنا نہیں بلکہ آئینی حدود میں رہتے ہوئے اس کی خامیاں درست کرنا ہے۔ 11 نومبر کو بلاول بھٹو زرداری نے بھی سیاسی ری سیٹ اور حکومت و اپوزیشن کے درمیان تعاون کی ضرورت پر زور دیا۔ لیکن اصل سوال اپنی جگہ موجود ہے: اگر نظام میں خرابیاں ہیں تو ان خرابیوں کو پیدا کرنے اور برقرار رکھنے میں اپنا کردار ادا کرنے والوں کا احتساب کون کرے گا؟ کیا ہر نئی حکومت سابقہ حکومت کی پالیسیوں کو دفن کرکے نیا تجربہ شروع کرے گی؟ کیا ہر سیاسی جماعت اپنی ناکامیوں کا ملبہ دوسری جماعت پر ڈال کر خود کو بری الذمہ قرار دیتی رہے گی؟ کیا جمہوریت کا مطلب صرف اقتدار حاصل کرنا ہے یا عوام کے سامنے جواب دہ ہونا بھی جمہوریت کا بنیادی تقاضا ہے؟ پاکستان کو کسی ایسے ری سیٹ کی ضرورت نہیں جس میں صرف چہرے بدل جائیں، اقتدار کے نئے فارمولے بن جائیں اور سیاسی مفادات کے مطابق نظام کی نئی تشریح شروع ہو جائے۔ پاکستان کو ایک ایسے قومی سیاسی معاہدے کی ضرورت ہے جس میں آئین کی بالادستی، پارلیمنٹ کا احترام، اداروں کی آئینی حدود، شفاف انتخابی عمل، مضبوط بلدیاتی نظام، قانون کی یکساں حکمرانی اور عوامی مسائل کا عملی حل یقینی بنایا جائے۔یاد رکھیے، کمپیوٹر کا ری سیٹ بٹن دبانے سے پرانی غلطیاں ختم ہوسکتی ہیں، لیکن ریاستیں اس طرح نہیں چلتیں۔ ریاستوں کی اصلاح کے لیے سیاسی بلوغت، قومی مفاہمت، مستقل پالیسیوں اور اپنے اعمال کی ذمہ داری قبول کرنے کا حوصلہ درکار ہوتا ہے۔ میرا بنیادی سوال یہی ہے کہ جو سیاسی قوتیں برسوں سے نظام کا حصہ رہی ہیں، وہ پہلے یہ بتائیں کہ انہوں نے اس نظام کو مضبوط بنانے کے لیے کیا کیا؟ کیونکہ نظام کو کمزور کرنے میں کردار ادا کرنے والے اگر خود ہی اس کے نجات دہندہ بن کر سامنے آجائیں تو عوام سوال ضرور کریں گے۔ پاکستان کسی نئے سیاسی تجربے کا نہیں، ایک مستحکم آئینی، جمہوری اور جواب دہ نظام کا متقاضی ہے۔ ملک کو ری سیٹ کرنے سے پہلے سیاست دانوں کو اپنی سیاسی سوچ، رویوں اور ترجیحات کو ری سیٹ کرنا ہوگا۔
مزید پڑھیں





