شناخت سے آگے ہے اہلیت،تحریر: سید آزاد گیلانی

دنیا میں کوئی انسان اپنی جائے پیدائش، مذہب، رنگ یا نسل کا انتخاب خود نہیں کرتا، لیکن اپنی پہچان بنانے کا اختیار ضرور رکھتا ہے۔ آپ کسی بھی ملک میں پیدا ہوئے ہوں، کسی بھی قوم یا مذہب سے تعلق رکھتے ہوں، اگر آپ کے اندر صلاحیت، محنت اور اپنے مقصد سے سچی لگن ہے تو ایک وقت ایسا ضرور آتا ہے جب دنیا کو آپ کی قابلیت تسلیم کرنا پڑتی ہے۔راستے میں رکاوٹیں آتی ہیں، تعصب کا سامنا بھی کرنا پڑتا ہے اور بعض اوقات آپ کے کام کے بجائے آپ کے نام اور شناخت کو موضوعِ بحث بنا دیا جاتا ہے، مگر یہ سب کچھ کسی انسان کی صلاحیتوں کو ہمیشہ کے لیے دبا نہیں سکتا۔ محنت کا سفر کبھی بے معنی نہیں ہوتا، البتہ اس کا اعتراف ہونے میں وقت لگ سکتا ہے۔اور آپ کہہ اہلیت و قابلیت آپ کی پہلی پہچان بن جاتی ہے ۔تاریخ گواہ ہے کہ دنیا میں مقام ان لوگوں نے بنایا ہے جنہوں نے حالات کو اپنی راہ کی دیوار نہیں بننے دیا۔

آج میں ایک ایسی ہی شخصیت کا ذکر کرنا چاہتا ہوں جس نے امریکی سیاست میں ایک نئی تاریخ رقم کی ہے۔ یہ شخصیت ہیں ڈاکٹر عبدالرحمان محمد السید جو ریاست مشی گن سے امریکی سینیٹ کے لیے منتخب ہونے والے پہلے مسلمان بن گئے ہیں۔ بظاہر یہ ایک انتخابی کامیابی ہے، لیکن اس کے پس منظر میں ایک طویل تعلیمی سفر، پیشہ ورانہ تجربہ، سیاسی جدوجہد اور اپنی شناخت سے آگے بڑھ کر عوامی اعتماد حاصل کرنے کی کہانی موجود ہے۔

عبدالرحمان السید 31 اکتوبر 1984 کو امریکی ریاست مشی گن کے شہر روچسٹر ہلز میں پیدا ہوئے۔ ان کے والد محمد السید مصر سے تعلق رکھتے تھے اور تعلیم کے سلسلے میں امریکہ آئے تھے۔ یوں عبدالرحمان کا تعلق ایک ایسے خاندان سے ہے جس کی جڑیں مصر میں ہیں، لیکن ان کی پیدائش، پرورش اور عملی زندگی امریکہ ہی میں گزری۔ انہوں نے ابتدائی تعلیم مقامی امریکی تعلیمی اداروں سے حاصل کی اور بعد ازاں مشی گن یونیورسٹی کا رخ کیا ۔ جہاں 2007 میں حیاتیات اور سیاسیات میں گریجویشن مکمل کیا۔ ان کی تعلیمی قابلیت کا اندازہ اس بات سے لگایا جا سکتا ہے کہ انہیں معروف روڈز اسکالرشپ کے لیے منتخب کیا گیا۔ اس اعزاز کے تحت انہوں نے آکسفورڈ یونیورسٹی برطانیہ سے صحت عامہ میں ڈاکٹریٹ کی ڈگری حاصل کی۔ اس کے بعد کولمبیا یونیورسٹی سے 2014 میں میڈیکل کی تعلیم مکمل کی۔

ان کی زندگی کا انتخاب صرف ڈاکٹر بننے تک محدود نہیں رہا۔ انہوں نے صحت عامہ اور وبائی امراض کے شعبے میں تحقیق اور عملی کام کو اپنی ترجیح بنایا۔ ان کے نزدیک کسی معاشرے کی ترقی کا اندازہ صرف اس کی عمارتوں، سڑکوں اور معاشی وسائل سے نہیں لگایا جا سکتا، بلکہ یہ بھی دیکھنا ضروری ہے کہ وہاں رہنے والے عام شہری کو علاج، صحت اور زندگی کی بنیادی سہولتیں کس حد تک میسر ہیں۔

2015 میں انہیں ڈیٹرائٹ کے محکمہ صحت کی سربراہی سونپی گئی۔ یہ شہر اس وقت مالی بحران اور انتظامی مشکلات سے گزر رہا تھا۔ عبدالرحمان نے وہاں صحت عامہ کے نظام کو بہتر بنانے اور شہریوں کو بنیادی طبی سہولتوں تک رسائی دینے کے لیے کام کیا۔ بعد میں وہ وین کاؤنٹی کے محکمہ صحت، انسانی اور ویٹرنز سروسز کے ڈائریکٹر بھی رہے۔ اس دوران بچوں کی صحت، طبی سہولتوں کی فراہمی، نشے کے باعث ہونے والی اموات میں کمی اور عام شہریوں کے طبی مسائل ان کی ترجیحات میں شامل رہے۔ انہوں نے طبی قرضوں کے بوجھ میں کمی اور بچوں کو صحت کی بنیادی سہولتیں فراہم کرنے جیسے منصوبوں پر بھی کام کیا۔

ان کی شخصیت کا ایک اہم پہلو یہ ہے کہ وہ صحت کو محض ایک طبی مسئلہ نہیں سمجھتے بلکہ اسے عام آدمی کے معاشی اور معاشرتی حالات سے جوڑ کر دیکھتے ہیں۔ ان کی گفتگو اور سیاسی مؤقف میں عام شہری کے اخراجات، علاج کی سہولت، رہائش اور بڑے سرمایہ داروں کے سیاسی اثر و رسوخ جیسے معاملات نمایاں رہے ہیں۔ ان کا خیال ہے کہ حکومت کی پالیسیوں کا مرکز عام شہری ہونا چاہیے اور ریاستی وسائل سے فائدہ اٹھانے کا حق صرف صاحبِ حیثیت طبقے تک محدود نہیں رہنا چاہیے۔

سیاست میں ان کا سفر بھی خاصا دلچسپ ہے۔یہ کوئی راتوں رات پلیٹ میں رکھ کر دی گئی کامیابی نہیں ، 2018 میں انہوں نے ریاست مشی گن کی گورنر شپ کے لیے ڈیموکریٹک پارٹی کے انتخابی مقابلے میں حصہ لیا، مگر کامیابی حاصل نہ کر سکے۔ اس ناکامی کے بعد انہوں نے خود کو سیاست سے الگ نہیں کیا۔ اپنی آواز کو عوامی مسائل کے لیے استعمال کرتے رہے، کتاب لکھی، پوڈکاسٹ کے ذریعے لوگوں تک اپنے خیالات پہنچائے اور صحتِ عامہ کے موضوعات پر کام جاری رکھا۔ 2026 میں امریکی سینیٹ کی نشست کے لیے میدان میں اترے۔ پہلے ڈیموکریٹک پارٹی کے اندرونی انتخاب میں کامیابی حاصل کی اور پھر 3 نومبر 2026نکو ہونے والے عام انتخابات میں ری پبلکن امیدوار مائیک راجرز کو شکست دے دی۔ اس طرح وہ امریکی سینیٹ کے لیے منتخب ہونے والے پہلے مسلمان بن گئے۔ وہ جنوری 2027 میں اپنی ذمہ داریاں سنبھالیں گے۔

یہ معلومات یقیناً اخبارات، نیوز چینلز اور سوشل میڈیا کے ذریعے بہت سے لوگوں تک پہنچ چکی ہوں گی، اس لیے میں یہاں انتخابی مقابلے کے ایک ایسے پہلو کی طرف توجہ دلانا چاہتا ہوں جس پر بات کرنا ضروری ہے۔ عبدالرحمان السید کی انتخابی مہم کے دوران ان کی مذہبی شناخت بھی زیر بحث رہی۔مخالفین نے مذہبی کارڈ کھیلنے کی پوری کوشش کی ، بعض مخالفین نے ان کے مسلمان ہونے اور ان کے نظریاتی پس منظر کو انتخابی بحث کا حصہ بنایا۔ ان پر اخوان المسلمون ( Muslim Brotherhood) سے تعلق کے الزامات بھی لگائے گئے، جن کی انہوں نے تردید کی۔ بعض بیانات میں ان کے مذہب اور امریکی معاشرے سے ان کی وفاداری کو بھی سوال بنایا گیا۔ یوں انتخابی مقابلے میں ان کی پالیسیوں کے ساتھ ان کی مذہبی شناخت بھی ایک موضوع بن گئی۔

میں یہاں کسی سیاسی رہنما کو تنقید کا نشانہ بنانا مقصود نہیں سمجھتا۔ امریکہ ایک بڑی جمہوری طاقت ہے، مگر سیاسی مقابلوں میں الزامات، مبالغے اور مخالف کی کردار کشی جیسے رویے وہاں بھی دیکھنے کو ملتے ہیں۔ ہمارے ہاں اکثر یہ سمجھا جاتا ہے کہ سیاسی تعصب اور منفی مہم صرف ہمارے معاشرے کا مسئلہ ہء، حالانکہ دنیا کی بڑی جمہوریتیں بھی ان رویوں سے مکمل طور پر محفوظ نہیں۔

تاہم اس انتخابی نتیجے کا ایک اہم پہلو یہ ہے کہ عبدالرحمان کی کامیابی کو صرف مذہبی تعصب کے خلاف عوامی ردعمل قرار دینا بھی درست نہیں ہوگا۔ یہ ایک سیاسی اور سماجی مقابلہ تھا، جس میں ووٹروں کے لیے صحت کی سہولتیں، مہنگائی، روزمرہ اخراجات، رہائش اور عام خاندانوں کے معاشی مسائل بھی اہم تھے۔ عبدالرحمان السید نے اپنی انتخابی مہم میں انہی معاملات کو مرکز بنایا۔ سب کے لیے طبی سہولتوں کی فراہمی، عام شہریوں کے معاشی بوجھ میں کمی اور سیاست میں بڑے سرمایہ داروں کے اثر و رسوخ کو محدود کرنا ان کے اہم انتخابی نکات تھے۔ ان کی کامیابی میں ان کے سیاسی مؤقف، انتخابی حکمتِ عملی، عوامی رابطے اور ووٹروں کے اعتماد نے اپنا کردار ادا کیا۔

یہی وہ مقام ہے جہاں اس واقعے کو محض ایک مسلمان کے امریکی سینیٹ تک پہنچنے کی خبر سے آگے بڑھ کر دیکھنے کی ضرورت ہے۔ کسی بھی جمہوری معاشرے میں امیدوار کی مذہبی شناخت اس کے تعارف کا حصہ تو ہو سکتی ہے، مگر اس کی اہلیت کا مکمل پیمانہ نہیں بن سکتی۔ عبدالرحمان السید مسلمان ہیں، ان کے والدین کا تعلق مصر سے ہے، لیکن اب وہ امریکی سینیٹ میں صرف مسلمانوں یا مصری نژاد شہریوں کی نمائندگی نہیں کریں گے بلکہ ریاست مشی گن کے تمام شہریوں کے منتخب نمائندے ہوں گے۔ یہی جمہوریت کی اصل ذمہ داری بھی ہے کہ عوامی عہدہ سنبھالنے والا شخص اپنی پوری آبادی کے حقوق اور مسائل کو اہمیت دے۔

اس واقعے میں ہمارے لیے، خصوصاً بیرون ملک مقیم پاکستانیوں اور دیگر تارکین وطن کے لیے، ایک بہت اہم سبق موجود ہے۔ ہم اکثر اپنے لوگوں کی کامیابیوں پر فخر تو کرتے ہیں، مگر کبھی یہ سوچنے کی زحمت نہیں کرتے کہ ان کامیابیوں کے پیچھے کتنی محنت، تعلیم اور مستقل مزاجی ہوتی ہے۔ کسی دوسرے ملک میں جا کر صرف اپنی شناخت کا حوالہ دینا کافی نہیں ہوتا۔ وہاں اپنے علم، کردار، پیشہ ورانہ مہارت اور عملی خدمات سے جگہ بنانا پڑتی ہے۔ آپ جہاں بھی رہتے ہیں، جس معاشرے کا حصہ ہیں، اس کی تعمیر و ترقی میں اپنا کردار ادا کریں۔ اپنی صلاحیتوں کو بہتر بنائیں، اپنے شعبے میں مہارت حاصل کریں اور اپنے عمل سے یہ ثابت کریں کہ آپ بھی اس معاشرے کے لیے ایک مفید فرد ہیں۔

پاکستانی نوجوانوں کے لیے بھی اس کامیابی میں ایک پیغام ہے۔ دنیا کے کسی بھی حصے میں رہنے والا پاکستانی اپنی قابلیت سے ملک کا نام روشن کر سکتا ہے۔ ضروری نہیں کہ آپ سیاست دان بنیں یا کسی بڑے منصب تک پہنچیں۔ ایک اچھا ڈاکٹر، انجینئر، سائنس دان، استاد، محقق، ادیب یا کاروباری شخص بھی اپنے کام سے وطن کی پہچان بن سکتا ہے۔ اصل ضرورت اس بات کی ہے کہ ہم اپنے نوجوانوں کو محض خواب دکھانے کے بجائے انہیں علم، محنت اور ہنر کے ذریعے ان خوابوں کی تعبیر حاصل کرنے کا راستہ بھی دکھائیں۔

میرے نزدیک عبدالرحمان السید کی کامیابی یہ دعویٰ نہیں کرتی کہ دنیا سے مذہبی یا نسلی تعصب ختم ہو گیا ہے۔ تعصب آج بھی موجود ہے اور شاید مستقبل میں بھی اس کا مکمل خاتمہ آسان نہ ہو، لیکن یہ کامیابی ضرور بتاتی ہے کہ تعصب کسی انسان کی صلاحیتوں کا آخری فیصلہ نہیں کر سکتا۔ مخالفت کے باوجود آگے بڑھا جا سکتا ہے، اپنی محنت سے لوگوں کا اعتماد حاصل کیا جا سکتا ہے اور اپنی شناخت کو کمزور کیے بغیر اپنی اہلیت منوائی جا سکتی ہے۔

آخر میں بات صرف اتنی ہے کہ انسان کی پہچان اس کے نام، مذہب، رنگ یا جائے پیدائش سے شروع ضرور ہو سکتی ہے، مگر وہیں ختم نہیں ہو جانی چاہیے۔ اصل اہمیت اس کے کردار، علم، صلاحیت اور معاشرے کے لیے اس کی خدمات کی ہے۔ آپ دنیا کے کسی بھی کونے میں پیدا ہوئے ہوں، اگر آپ میں سیکھنے کا شوق، محنت کا حوصلہ اور اپنے مقصد سے وفاداری ہے تو آپ کی کامیابی کسی سرحد کی محتاج نہیں۔ دنیا کو آپ کی قابلیت تسلیم کرنے میں دیر ہو سکتی ہے، مگر مسلسل محنت اور سچی لگن کے راستے ہمیشہ کے لیے بند نہیں کیے جا سکتے۔

شناخت آپ کا تعارف ہو سکتی ہے، مگر آپ کی اہلیت ہی آپ کی اصل پہچان بنتی ہے۔

نوٹ: اس کالم کی تیاری میں ڈاکٹر عبدالرحمان السید کے خاندانی پس منظر، تعلیمی سفر، پیشہ ورانہ خدمات اور انتخابی کامیابی سے متعلق معلومات کے لیے ایسوسی ایٹڈ پریس، رائٹرز، سی بی ایس نیوز اور الجزیرہ کی رپورٹس سے مدد لی گئی ہے۔