اسٹاک ایکسچینج میں تیزی، 100 انڈیکس 1400 پوائنٹس سے زائد بڑھ گیا

کارپوریٹ نتائج اور ادارہ جاتی سرمایہ کاری میں مسلسل دلچسپی کے باعث پاکستان اسٹاک ایکسچینج (پی ایس ایکس) میں بھرپور خریداری کا رجحان برقرار رہا جس کے نتیجے میں بینچ مارک کے ایس ای 100 انڈیکس 1400 پوائنٹس سے زائد اضافے کے ساتھ بند ہوا۔

تفصیلات کے مطابق اسٹاک مارکیٹ میں کاروبار کا آغاز زبردست تیزی کے ساتھ ہوا، ٹریڈنگ کے دوران 100 انڈیکس 167,500 پوائنٹس کی سطح کے قریب پہنچ گیا، تاہم دوپہر کے وقت اس میں کچھ کمی ہوئی۔

بعدازاں سہ پہر کے سیشن میں انڈیکس میں دوبارہ تیزی دیکھی گئی۔ کاروبار کے اختتام پر بینچ مارک کے ایس ای 100 انڈیکس 1,456.68 پوائنٹس (0.88 فیصد) کے اضافے سے 167,193.43 پوائنٹس پر بند ہوا۔

یاد رہے کہ بدھ کو اسٹاک ایکسچینج میں بحالی کا سلسلہ جاری رہا اور کاروباری سیشن کے آخری حصے میں خریداری کے رجحان نے مارکیٹ کو سہارا دیا۔ بڑے شعبوں میں وسیع پیمانے پر حصص کی قیمتوں میں اضافے نے مارکیٹ کی تیزی میں اہم کردار ادا کیا۔ گزشتہ روز بینچ مارک کے ایس ای 100 انڈیکس 1,269.55 پوائنٹس یا 0.77 فیصد اضافے کے ساتھ 165,736.76 پوائنٹس پر بند ہوا۔

عالمی منڈیوں میں جمعرات کو ایشیائی حصص کی قیمتوں میں پہلے ہونے والا اضافہ ختم ہو گیا، کیونکہ اے آئی سے متعلق کمپنیوں کے مالی نتائج پر سرمایہ کاروں کے ردِعمل میں نمایاں اختلاف دیکھا گیا۔ اس صورتحال نے دن کے بعد ایمیزون اور انٹیل کے متوقع نتائج کی اہمیت مزید بڑھا دی۔ الفابیٹ کے بھاری نقد اخراجات کے باعث آفٹر آورز ٹریڈنگ میں اس کے حصص کی قیمت 10 فیصد گرگئی جس سے کمپنی کی مارکیٹ ویلیو میں تقریباً 400 ارب ڈالر کی کمی واقع ہوئی۔

اس کے نتیجے میں نیسڈیک فیوچرز 1 فیصد نیچے آ گئے۔ اس کے برعکس مائیکروسافٹ نے توقعات سے بہتر نتائج پیش کیے۔ کمپنی کا نقد بہاؤ بھی اندازوں سے بہتر رہا جس کے باعث اس کے حصص کی قیمت میں 3 فیصد اضافہ ہوا۔ گزشتہ رات امریکی فیڈرل ریزرو نے توقعات کے مطابق شرحِ سود برقرار رکھی، تاہم کمیٹی کے دو ارکان نے شرح سود میں اضافے کے حق میں ووٹ دیا۔

فیڈرل ریزرو کے چیئرمین کیون وارش نے پریس کانفرنس کے دوران مہنگائی کے مستقبل کے حوالے سے زیادہ پُراعتماد مؤقف اختیار کیا جس کے نتیجے میں امریکی ٹریژری بانڈز میں تیزی دیکھی گئی۔ تاہم اصل امتحان کمپنیوں کے مالی نتائج سے متعلق تھا۔ سام سنگ الیکٹرانکس نے جمعرات کو بتایا کہ اے آئی کے چپس کی مضبوط طلب کے باعث تیسری سہ ماہی میں اس کا آپریٹنگ منافع تقریباً نو گنا بڑھ کر ریکارڈ سطح پر پہنچ گیا۔

اس کے باوجود سام سنگ کے حصص کی قیمت 4 فیصد سے زیادہ گرگئی جس سے جنوبی کوریا کے وسیع تر کوسپی انڈیکس پر بھی دباؤ پڑا اور اس میں 2.6 فیصد کمی ریکارڈ کی گئی۔ اس سے ایک روز قبل انڈیکس میں تقریباً 7 فیصد اضافہ ہوا تھا۔

جاپان کے علاوہ ایشیا پیسیفک خطے کے حصص پر مشتمل ایم ایس سی آئی کے وسیع ترین انڈیکس میں 0.7 فیصد کمی ہوئی جب کہ جاپان کے نکئی انڈیکس کا ابتدائی اضافہ کم ہوکر 0.3 فیصد رہ گیا۔

چین کی سرزمین پر درج بڑی کمپنیوں کے حصص پر مشتمل بلیو چِپ انڈیکس میں 0.9 فیصد کمی ہوئی جب کہ ہانگ کانگ کے ہینگ سینگ انڈیکس میں 0.2 فیصد اضافہ ریکارڈ کیا گیا۔