fbpx

شہباز گل نے بہت بڑی غلطی کی ہے، انکا بیان قابل قبول نہیں ہے. سینیٹر فیصل جاوید

پاکستان تحریک انصاف کے رہنما اور سینیٹر فیصل جاوید خان نے بھی چیئرمین تحریک انصاف عمران خان کے چیف آف اسٹاف کے بیان کو بڑی غلطی قرار دے دیا ہے اور کہا کہ شہباز گل نے بہت بڑی غلطی کی ہے، انکا بیان قابل قبول نہیں ہے. ۔

گزشتہ روزچیئرمین تحریک انصاف عمران خان نے نجی ٹی وی کو ایک انٹرویو کے دوران اعتراف کیا تھا کہ شہباز گل کا بیان غلط تھا اور ان کے بیان سے فوج میں اکسانے کا تاثر گیا، لہذا انہیں یہ بیان نہیں دینا چاہیے تھا۔

بعد ازاں پی ٹی آئی سندھ کے صدر علی زیدی نے بھی شہباز گل کے بیان کو غلط قرار دیتے ہوئے کہا کہ شہباز گل نے غلط بات کی لیکن آصف زرداری اور نواز شریف نے بھی بیانات دیے تھے، ان کو کیوں جیلوں میں نہیں ڈالا جا رہا ہے یا ڈالا گیا؟

جبکہ آج سینیٹ اجلاس میں پی ٹی آئی رہنما فیصل جاوید خان نے بھی اظہار خیال کرتے ہوئے کہا کہ شہباز گل نے بہت بڑی غلطی کی ہے، اور ان کا بیان قابل قبول نہیں ہے۔

سینیٹر فیصل جاوید خان نے مزید کہا کہ شہباز گل کے خلاف ضرور قانونی کارروائی کی جائے لیکن قانون سب کے لیے برابر ہونا چاہیے، ان پر جو تشدد کیا گیا اس کی مذمت کرتے ہیں، جس طرح سے شہباز گل کے ساتھ سلوک گیا ہے اس ہاؤس کو اس کی بھی مذمت کرنی چاہیے۔

واضح‌رہے کہ شہباز گل نے ملک کے ایک نجی نیوز چینل پر افواج پاکستان سے متعلق بات کی تھی جس کے بعد ان کے خلاف بغاوت پر اکسانے کے الزام میں مقدمہ درج کیا گیا تھا،جبکہ 9 اگست کو پی ٹی آئی رہنما شہباز گِل کو گرفتار کیا گیا تھا. تاہم بعدازاں عدالت نے شہباز گل کے جسمانی ریمانڈ میں توسیع کی درخواست مسترد کرتے ہوئے انہیں اڈیالہ جیل بھجوادیا تھا۔