کراچی،میٹرک امتحانات،وزیر کا دورہ،طلبا نقل کرتے پکڑے گئے

میٹرک بورڈ کے جاری امتحانات کے دوران لیاری کے ایک اسکول میں بڑے پیمانے پر نقل کا انکشاف ہوا ہے۔ وزیر بورڈ سندھ اسماعیل راہو نے اچانک اسکول کا دورہ کیا تو امتحانی نظام کی سنگین بے ضابطگیاں سامنے آئیں۔

دورے کے دوران متعدد طلبہ و طالبات کو موبائل فون اور نقل کے دیگر مواد کے ساتھ رنگے ہاتھوں پکڑا گیا۔ چھوٹے چھوٹے کلاس رومز میں ایک ہی ڈیسک پر دو دو طالبات کو بٹھا کر امتحان دینے کی اجازت دی گئی تھی، جس پر انتظامی غفلت واضح نظر آئی۔مزید انکشاف اس وقت ہوا جب ایک اسپیشل روم میں صرف چار طالبات کو موبائل فون اور دیگر نقل کے مواد کے ساتھ پرچہ حل کرتے ہوئے پایا گیا۔ وزیر بورڈ نے موقع پر ہی طلبہ کی کاپیاں چیک کیں تو حیران کن طور پر تمام پرچوں کے جوابات حرف بہ حرف ایک جیسے نکلے۔

وزیر بورڈ سندھ اسماعیل راہو نے موقع پر موجود سینٹر سپرنٹنڈنٹ سے وضاحت طلب کی تاہم وہ تسلی بخش جواب دینے میں ناکام رہے۔اسماعیل راہو نے سخت برہمی کا اظہار کرتے ہوئے ہدایت دی کہ بورڈ انتظامیہ فوری طور پر متعلقہ امتحانی سینٹر کو منسوخ کرے اور سینٹر سپرنٹنڈنٹ کو برطرف کیا جائے۔