سعودی ولی عہد نے حوثیوں کیخلاف اسرائیل سے انٹیلی جنس معاونت مانگ لی

اسرائیلی اخبار نے دعویٰ کیا ہے کہ سعودی ولی عہد محمد بن سلمان نے حوثیوں کی جانب سے باب المندب کی بندش رکوانے کے لیے اسرائیل سے انٹیلی جنس معاونت طلب کی ہے۔

اسرائیلی اخبار کے مطابق محمد بن سلمان نے اسرائیل اور دیگر خلیجی ممالک سے براہِ راست جبکہ امریکی سینٹرل کمانڈ کے ذریعے بالواسطہ رابطے کرکے معاونت طلب کی۔رپورٹ میں کہا گیا ہے کہ انصاراللہ کے خلاف براہِ راست حملوں سے امریکا کے انکار نے سعودی عرب کو مشکل صورتحال سے دوچار کردیا ہے۔ حوثیوں کی پیش قدمی کے باعث باب المندب کے قریب اہم علاقوں پر دباؤ بڑھ گیا ہے جبکہ سعودی عرب کے توانائی اور برآمدی راستوں کو بھی خطرات لاحق ہیں۔ حالیہ کشیدگی کے دوران سعودی عرب نے امریکی مدد طلب کی، تاہم واشنگٹن نے براہِ راست حملوں کے بجائے انٹیلی جنس اور اہداف کی نشاندہی میں معاونت پر آمادگی ظاہر کی ہے۔اسرائیلی اخبار کے دعوے پر سعودی حکام کی جانب سے تاحال کوئی ردعمل سامنے نہیں آیا۔