پیپلز پارٹی نے خیبرپختونخوا میں گورنر راج لگنے سے روکا، بلاول بھٹو

چیئرمین پاکستان پیپلزپارٹی بلاول بھٹو نے کہا ہے کہ پیپلز پارٹی نے خیبرپختونخوا میں گورنر راج لگنے سے روکا۔

بلاول بھٹو نے کہا کہ تحریک انصاف انتہا پسندی کی سیاست چھوڑ کر جمہوری طرز عمل اختیار کرے، خیبرپختونخوا میں گورنر راج یا ایمرجنسی کا نفاذ نہیں چاہتے، یہ آخری آپشن ہونا چاہیے۔

کراچی میں اسپورٹس کمپلیکس کے افتتاح کے بعد میڈیا سے گفتگو کرتے ہوئے بلاول بھٹو زرداری نے کہا کہ وہ کراچی میں ایک اور منصوبے کا افتتاح کرنے کے لیے موجود ہیں، جبکہ اس سے قبل تھرپارکر میں تھرکول بلاک ٹو کے تیسرے حصے کا افتتاح کیا گیا۔

انہوں نے کہا کہ بعض سیاسی قوتیں کراچی کے نوجوانوں کو کریمنل بنانا چاہتی ہیں، لیکن پیپلزپارٹی نوجوانوں کے ہاتھوں میں قلم دیکھنا چاہتی ہے۔ پیپلزپارٹی منفی سیاست کے بجائے مثبت سیاست پر یقین رکھتی ہے جبکہ بعض دوسری جماعتیں انتہا پسندی اور نفرت کی سیاست کو فروغ دینا چاہتی ہیں۔