لبنانی وزیر داخلہ 2 روزہ سرکاری دورے پر پاکستان پہنچ گئے
وفاقی وزیر داخلہ محسن نقوی کی خصوصی دعوت پر لبنان کے وزیر داخلہ احمد الحجار 2 روزہ سرکاری دورے پر پاکستان پہنچ گئے ہیں۔
لبنان کے وزیر داخلہ احمد الحجار اپنے اعلیٰ سطحی وفد کے ہمراہ جیسے ہی اسلام آباد ایئرپورٹ پہنچے تو وزیر مملکت برائے داخلہ طلال چوہدری نے ان کا باضابطہ استقبال کیا، اس موقع پر چیف کمشنر اسلام آباد اور انسپکٹر جنرل (آئی جی) اسلام آباد پولیس بھی ایئرپورٹ پر موجود تھے، جنہوں نے معزز مہمان کو پاکستان آمد پر خوش آمدید کہا۔
لبنانی وزیر داخلہ یہ دورہ وفاقی وزیر داخلہ محسن نقوی کی خصوصی دعوت پر کر رہے ہیں۔ 2 روزہ قیام کے دوران لبنان کے وزیر داخلہ پاکستان کی اعلیٰ سیاسی و حکومتی قیادت اور بالخصوص وفاقی وزیر داخلہ محسن نقوی سے تفصیلی ملاقاتیں کریں گے، دورے کے دوران لبنانی وزیر داخلہ دونوں ممالک کے درمیان باہمی تعاون اور امن و امان کے شعبوں میں تعلقات کو مضبوط بنانے کے لیے پاکستانی قیادت سے اہم ملاقاتیں کریں گے۔
ان ملاقاتوں کا بنیادی محور پاکستان اور لبنان کے درمیان دوطرفہ تعلقات کی استواری، سیکیورٹی، بارڈر مینجمنٹ اور داخلہ امور سے متعلق باہمی تعاون کو فروغ دینا ہوگا،دونوں برادر ممالک کے درمیان آئندہ کی حکمتِ عملی اور مشترکہ اقدامات پر بھی اہم بات چیت کی جائے گی۔
