غیر ملکی خواتین سے زیادتی کیس میں اہم پیش رفت، 3 ملزمان کا ڈی این اے میچ

لاہور کے علاقے ڈیفنس میں غیر ملکی خواتین کے مبینہ اغواء اور اجتماعی زیادتی کے ہائی پروفائل کیس میں تفتیش کے دوران اہم پیش رفت سامنے آئی ہے۔

تفتیشی ذرائع کے مطابق ایک غیر ملکی خاتون سے مبینہ زیادتی کے معاملے میں تین ملزمان کے ڈی این اے نمونے فرانزک تجزیے میں میچ کر گئے ہیں۔ذرائع کا کہنا ہے کہ ڈی این اے میچ ہونے والے ملزمان میں نواز کا نام سرِفہرست ہے۔ ابتدائی تفتیش کے مطابق ملزم نواز پر الزام ہے کہ اس نے سب سے پہلے غیر ملکی خاتون کو مبینہ زیادتی کا نشانہ بنایا، جبکہ اس کے بعد اس کے اکسانے پر دیگر دو ملزمان، ساجد اور سکندر، بھی مبینہ طور پر اس جرم میں شامل ہوئے۔تفتیشی ذرائع کے مطابق پولیس نے مجموعی طور پر آٹھ ملزمان کے ڈی این اے نمونے فرانزک لیبارٹری بھجوائے تھے، جن میں سے تین کے نمونے متاثرہ خاتون کے شواہد سے میچ کر گئے ہیں، جبکہ دیگر ملزمان کے ڈی این اے نمونوں کا فرانزک تجزیہ تاحال جاری ہے۔

دوسری جانب پولیس اس مقدمے کے دیگر پہلوؤں پر بھی تحقیقات کر رہی ہے۔ اس سے قبل ڈی آئی جی آپریشنز لاہور نے تصدیق کی تھی کہ غیر ملکی خواتین کے مبینہ اغواء میں استعمال ہونے والی گاڑی کی بھی شناخت کر لی گئی ہے، جس کے بعد تحقیقات کا دائرہ مزید وسیع کر دیا گیا ہے۔پولیس حکام کا کہنا ہے کہ فرانزک رپورٹ اور دیگر شواہد کی روشنی میں مقدمے کی تفتیش کو آگے بڑھایا جا رہا ہے، جبکہ تمام حقائق سامنے آنے کے بعد قانون کے مطابق مزید کارروائی عمل میں لائی جائے گی۔