سینیٹ کا ویڈیولنک اجلاس : سینیٹرز آپس میں کیا باتیں کرتے رہے ،اندر کی کہانی ، دلچسپ باتیں

اسلام آباد : سینیٹ کا ویڈیولنک اجلاس ، اہم ممبران کی اہم گفتگو،سینیٹرز آپس میں کیا باتیں کرتے رہے ، اطلاعات کے مطابق ڈ پٹی چیئرمین سینیٹ و دیگر اراکین نے بھی کہا ہے کہ کرو نا وبا کے باعث غیر معمولی صورت حال کا سامنا ہے،ایوان بالا کا اجلاس ضروری ہو گیا ہے، تمام صورتحال پر سیر حاصل بحث ہونی چاہئے ،ٹھوس لائحہ عمل اختیار کرنے میں مدد ملے گی جبکہ اپوزیشن نے موجود ہ حالات میں سینیٹ کا اجلاس بلائے جانے کا پر زور مطالبہ کرتے ہوئے کہاہے کہ اگر حکومت اجلاس نہیں بلاتی تو اپوزیشن کے پاس ریکوزیشن کے ذریعے بھی اجلا س طلب کرنے کا آپشن موجود ہے ۔

جمعرات کو ڈپٹی چیئرمین سینیٹ سلیم مانڈوی والا کی صدارت میں ویڈیو لنک ویبینارکے ذریعے غیر رسمی اجلاس منعقد ہواجس میں کرو نا وائرس کے باعث پیدا ہونے والی صورتحال، عوام کو درپیش مسائل، ایوان بالا کے اجلاس اور اہم امور پر تبادلہ خیال کیاگیا ۔سینیٹر ز مشاہد حسین سید، فیصل جاوید، رخسانہ زبیری، عثمان کاکڑ، رانا مقبول ، میاں عتیق شیخ، امام دین شوقین، سراج الحق، ولید اقبال ، مہر تاج روغانی، حاصل بزنجو ، لیفٹیننٹ جنرل ریٹائرڈ صلاح الدین ترمزی، پرویز رشید ، ڈاکٹر آصف کرمانی ، سکندر مندھرو، کلثوم پروین، ذیشان خانزادہ، غوث محمد نیازی ، مولانا عبدالغفور حیدری اور ستارہ ایازنے شرکت کی ۔ڈپٹی چیئرمین سینیٹ سلیم مانڈوی والا و اراکین سینیٹ نے اپیل کی کہ عوام کرو نا پر قابو پانے کے حوالے سے ایس او پیز پر سختی سے عمل کریں۔

سینیٹ اجلاس کے انعقاد کے حوالے سے ویڈیو کانفرنسنگ کی استعداد کا بھی جائزہ لیا گیا۔ ڈپٹی چیئرمین سینیٹ سلیم مانڈوی والا نے کہاکہ موجودہ حالات کو سامنے رکھتے ہوئے جدید ٹیکنالوجی سے استفادہ کرنا ہو گا۔ اس دوران اراکین نے کہاکہ قواعد وضوابط اور اس ویڈیو کانفرنس کی روشنی میں سینیٹ اجلاس بلانے کے لئے اقدامات کرنے کی ضرورت ہے۔ڈپٹی چیئرمین سینیٹ و اراکین نے کہاکہ کرو نا وبا کے باعث غیر معمولی صورت حال کا سامنا ہے۔ اراکین نے کہاکہ ایوان بالا کا اجلاس ضروری ہو گیا ہے جبکہ اس دوران ڈپٹی چیئرمین سینیٹ نے کہاکہ تمام صورتحال پر سیر حاصل بحث ہونی چاہئے ۔ٹھوس لائحہ عمل اختیار کرنے میں مدد ملے گی۔ اپوزیشن سینیٹر ز نے کہاکہ اگر حکومت اجلاس نہیں بلاتی تو اپوزیشن کے پاس ریکوزیشن کے ذریعے بھی اجلا س طلب کرنے کا آپشن موجود ہے