بالی ووڈ لیجنڈری اداکار امیتابھ بچن نے کورونا ریلیف میں 2 کروڑ روپے عطیہ دے دیا۔

باغی ٹیوی : انڈین ایکسپریس کے مطابق امیتابھ بچن کو بھارت میں کورونا کی دوسری لہر کے دوران عطیات نہ دینے پر تنقید کا نشانہ بنایا جا رہا تھا اور حال ہی میں انہوں نے اپنے ایک بلاگ میں اس بات کا ذکر بھی کیا کہ کس طرح ان کے خاندان کو تنقید کا نشانہ بنایا جا رہا ہے۔

رپورٹ کے مطابق بگ بی اگرچہ پہلے بھی فلاحی کاموں میں بڑھ چڑھ کر حصہ لیتے رہے ہیں اور انہوں نے مقروض کسانوں کا قرض اتارنے سمیت کورونا کی وبا کے دوران طبی رضاکاروں کے لیے حفاظتی لباس کے لیے بھی فنڈز فراہم کیے تھے۔

تاہم اب انہوں نے ملک میں وبا کی دوسری بدترین لہر سے نمٹنے کے لیے دارالحکومت نئی دہلی کی حکومت کو 2 کروڑ کا عطیہ دے دیا۔

رپورٹ میں بتایا گیا کہ اگرچہ امیتابھ بچن نے واضح طور اس بات کی تصدیق نہیں کی کہ انہوں نے کورونا ریلیف فنڈ میں کتنا عطیہ دیا تاہم معلوم ہوا ہے کہ انہوں نے 2 کروڑ روپے کا عطیہ دیا۔

T 3900 – Privileged to be a part of the concert .. and the fight for India .. pic.twitter.com/vlyhKVc6QG

— Amitabh Bachchan (@SrBachchan) May 9, 2021

علاوہ ازیں امیتابھ بچن عالمی کورونا ویکسین فنڈ کے ورچوئل میلے کا حصہ بھی رہے، جس میں امریکی صدر جوبائیڈن، برطانوی شہزادہ ہیری اور کئی معروف ہولی وڈ شخصیات نے آن لائن خطاب کیا اور لوگوں سے کورونا سے نمٹنے کے لیے غریب ممالک کو ویکسین کی فراہمی کے لیے عطیات دینے کی اپیل کی۔

اسی حوالے سے خبر رساں ادارے اے پی نے بتایا کہ عالمی فلاحی تنظیم کے تعاون سے ہونے والے مذکورہ پروگرام میں 30 کروڑ 20 لاکھ امریکی ڈالر کے عطیات جمع کیے گئے اور اس پروگرام کی تقریب میں شریک ہونے والے تمام افراد نے ویکسین لگوا رکھی تھی۔

رپورٹ کے مطابق دنیا میں کورونا کی وبا پھیلنے کے بعد مذکورہ تقریب میں پہلی مرتبہ بہت بڑی تعداد میں لوگ شریک ہوئے تاہم تمام افراد وہ تھے، جنہوں نے کورونا سے تحفظ کی ویکسین لگوا رکھی تھی۔

مذکورہ پروگرام کو یکم مئی کو ریکارڈ کیا گیا تھا اور اسے 10 مئی کو امریکا کے مختلف چینلز پر نشر کیا گیا اور امیتابھ بچن نے بھی اسی پروگرام میں اپنی اور شہزادہ ہیری کی تقریر کی ویڈیو ٹوئٹ کی۔

امیتابھ بچن کے علاوہ معروف گلوکارہ لتا منگیشکر نے بھی ریاست مہاراشٹر کی حکومت کو کورونا سے تحفظ کے انتظامات کے لیے 7 لاکھ روپے کے عطیات دیئے۔

علاوہ ازیں اداکار ریتک روشن نے بھی بھارتی 12 لاکھ روپے تک کی رقم عطیہ کی علاوہ ازیں پوڈکاسٹ میزبان جے شری نے بھی بھارت کے لیے شروع کیے گئے ریلیف فنڈ میں پیسے جمع کرائے جس میں دیگر شخصیات نے بھی فنڈز جمع کروائے ہیں اور مذکورہ فنڈز کو بھارت میں آکسیجن کی قلت اور ویکسین کی فراہمی سمیت دیگر انتظامات پر خرچ کیا جائے گا۔

دوسری جانب اداکارہ لارا دتا اور شیمال ولابھجی کی جانب سے شروع کی گئی (آئی بریتھ انڈیا) مہم میں بھی متعدد شوبز شخصیات نے فنڈز جمع کروائے اور مذکورہ مہم کے ذریعے اب تک ساڑھے تین کروڑ روپے سے زائد کے فنڈز جمع کیے گئے۔

بھارتی میڈیا کے مطابق انڈیا فنڈز مہم کے سلسلے میں 9 مئی کو ایک ورچوئل میوزیکل تقریب بھی منعقد کی گئی تھی، جسے مختلف سوشل میڈیا پلیٹ فارمز پر نشر کیا گیا تھا اور اب تک مذکورہ فنڈ میں ایک ہزار سے زائد افراد نے عطیات جمع کروائے ہیں۔

مذکورہ فنڈ مہم کے علاوہ بھی متعدد شوبز شخصیات الگ الگ اور انفرادی طور پر کورونا کی جنگ سے نمٹنے کے لیے حکومت اور فلاحی اداروں کو عطیات فراہم کر رہے ہیں گزشتہ ہفتے سلمان خان نے بھی فلم انڈسٹری کے 40 ہزار ورکرز کو نقد رقم دینے کا سلسلہ شروع کیا تھا اداکار سونو سود بھی ریاست مدھیہ پردیش کے ایک پورے گاؤں کو لاک ڈاؤن کے خاتمے تک کھانا فراہم کریں گے-

سلمان خان کے علاوہ اکشے کمار اور اجے دیوگن نے بھی گزشتہ ہفتے کورونا سے نمٹنے کے لیے ایک ،ایک کروڑ روپے کے عطیات دیئے تھے، علاوہ ازیں انوشکا شرما اور ویرات کوہلی نے بھی وبا سے نمٹنے کے لیے فنڈز مہم شروع کر رکھی ہے جبکہ سشمیتا سین نے بھی اسپتالوں میں آکسیجن مہیا کی-

بھارتی فلم انڈسٹری کے نامور فلمساز یش راج فلمز پروڈکشن کے سربراہ اور معروف اداکارہ رانی مکھر جی کے شوہر ادیتیا چوپڑا نے بھی فلم انڈسٹری کی 30 ہزار ملازمین کو کورنا ویکسین لگوانے کا اعلان کیا جبکہ جان ابراہم نے اپنے تمام سوشل میڈیا اکاؤنٹس این جی اوز کے حوالے کر دیئے جن سے حاصل ہونے والی آمدنی کورونا فنڈ میں استعما ل کی جائے گی-

نئی دہلی اسپتالوں میں آکسیجن کی کمی، سشمیتا سین مدد کے لئے سامنے آگئیں