باغی رائیٹرز فورم کے اراکین کی شاعری،30 ستمبر

معراجِ محبت

(نعتیہ کلام)

ہومیو ڈاکٹر نازیہ ندیم نازی

رسولِ پاک کی عظمت، ہے عرش و فرش پہ بسا

وہ رہبرِ دو جہاں ہیں، ان کی شان ہے یکتا

ہر اک سوال کا ان سے ہی کامل جواب ملا

جو میں نے مانگنا چاہا، وہ مجھ کو فوراً عطا

نبی کی راہ پہ چلنا ہی زندگی کی وفا

وگرنہ منزلِ عقبیٰ میں ہو گی سب سے بڑی خطا

مدینے والے کی ہر بات قلب و جاں نے سنی

کہ ان کا ہر اک اشارہ شریعتوں کا بنا

فلک کو چھو کے بھی دیکھا تو ان سا کوئی نہیں

نہیں ہے ثانی جہاں میں، وہ ذات میں ہیں جدا

یہ سارا عالمِ فانی ہے ان کے نور سے جاری

ہے ان کی ذات پہ فخر اور ان کا رتبہ عطا

حضور کی ہر حدیث اور ہر بیانِ پاک

ہے ہر مریضِ جگر کے لیے دوا کا کہا

نازی کی زندگی کا حاصل ہے بس یہی تو آرزو

کہ ان کی مدح کروں اور بخش دیں وہ میری ہر خطا

................................................................

سوچوں مِیں تیغ ہاتھ مِیں کشکول کس لۓ

اندازِ اقتدار مِیں ہے جھول کس لٸے

کیوں اپنی مصنوعات تَو دیتا ہے سستے دام

سوچو خریدی تو نے پھر اس مول کس لٸے

ہر چیز اپنے دیس میں افراط سے ہے جب

مہنگائی کا یہ بج رہا ہے ڈھول کس لۓ

قانون کے جنازے پہ مقتول نے کہا

اب ہرطرف یہ خار ہیں انمول کس لۓ

تم نے تَو میرے جسم پہ خنجر چلایا تھا

مرقد پہ ننگے پاؤں ہے اب بول کس لٸے

پیسے تَو پورے لیتے ہو اشیاٸے صرف کے

اور جھول سے بھرا ہوا یہ تول کے لٸے

تم نے کیا ہے قتل جب اس بے قصور کا

بے تاب کیوں ہو امن کے اس خول کے لٸے

سوچو کبھی تو آج تک ساجد کہ شہر میں

بِگڑا ہٌوا ہے پیار کا ماحول کس لٸے

پروفیسرسہیل ساجد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اقبال ترے خواب کی تعبیر بتاؤں

بہکے ہوئے افکار ہیں اجڑا ہے چمن یوں

قرآں بھی بنا رکھا ہے دہشت کا صحیفہ

مذہب کو بنا ڈالا ہے نفرت کا حوالہ

مکتب میں خطر ناک ہے علمأّ کا وطیرہ

بدلا ہے مساجد کو بھی اب قتل گہوں میں

کرتے ہیں یہاں نعرہءتکںیر لگا کر

بازاروں میں شہروں میں یہ دین دار دھماکے

بے جرم یہاں مرتے ہیں انسان بچارے

جنگل کا ہے قانون ستم گر ہے حکومت

اقبال یہاں کوئی بھی اب کل نہیں سیدھی

خوں رنگ سیاست ہے تو تہذیب ہے ننگی

تعبیر ہوئی آ ج ترے خواب کی الٹی.

حسرت ہے یہ شبنم کی کوئی معجزہ دیکھوں

اندر سے میں انسان بدلتا ہوا دیکھوں

شبنم مرزا لاھور

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

ردا فاطمہ اعوان

گوجرنوالہ_کوٹ بولا

ہم ازل سے رہے سیاہ نصیب

غم رہا ہے فقط پناہ نصیب

جس کو چاہا وہ دور ہوتا گیا

کس کو ہوتی ہے ایسی چاہ نصیب

ہم نے کی ہر جگہ پہ لو روشن

پھر بھی ہوئی نہ صبحِ گاہ نصیب

اپنے ہی لوگ وار کرتے رہے

کس کو ہوتی ہے یار کی راہ نصیب

عمر بھر لب پہ اک دعا ہی رہی

کاش ہو کوئی تو گواہ نصیب

دل نے ہر درد مسکرا کے سہا

کب ہوئی درد کو ہے پناہ نصیب

ہم نے مانگا نہ تاج و تخت کبھی

دل کو ہو صرف ایک آہ نصیب

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

اہل ستم ہیں چار سو

کیسے بچے گی آبرو

فصل بہار حسن سے

سبز ہے دشت ارزو

کوئی نہ مل سکا کہیں

تیری طرح کا ہو بہو

کون مزاج اشنا

کس سے کروں میں گفتگو

اہل وفا کہیں کہیں

اہل ہوس ہیں چار سو

دونوں اسیر مصلحت

پورا وفا میں میں نہ تو

بھولا کبھی نہ عمر بھر

وصل کنار ابجو

نیزے پہ سر بلند تھا

راہ وفا میں سر خرو

لاکھوں حسین ہی مگر

میرا ہے انتخاب تو

اختر چیمہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بھول

ازقلم: نیہا علی

قلمی نام: اللہ کی لاڈلی

تجھ سے وابستہ ہوئی تو خود کو سنورنا بھول سی گئی

تیری یادوں میں رہی تو غم سے گزرنا بھول سی گئی

تجھے کیا لکھتی، یار! میں خود کو ہی لکھنا بھول سی گئی

تیری باتوں میں ایسی کھوئی کہ کچھ کہنا بھول سی گئی

تیرے ہجر نے یوں توڑا کہ میں ہنسنا بھول سی گئی

تیری چاہت میں ایسی ڈوبی کہ اب ابھرنا بھول سی گئی

تیری یادوں کا چراغ دل میں جلاتی رہی مگر

اپنے حصے کی خوشی میں خود کو بھرنا بھول سی گئی

تجھے چاہا تو زمانے سے بیگانہ ہو گئی

تیرے بعد کسی اور پہ مرنا بھول سی گئی

کبھی خود سے بھی ملاقات کیا کرتی تھی میں

تجھ میں کھو کر اپنی ذات سے ملنا بھول سی گئی

تو ملا تو لگا زندگی مکمل ہو گئی

تو گیا تو میں دعائیں بھی مانگنا بھول سی گئی

اب بھی دل کے کسی کونے میں تیرا نام ہے مگر

میں ترے بعد کسی نام پہ ٹھہرنا بھول سی گئی

نیہا! یہ کیسی محبت تھی تیری، اے دلِ ناداں

کہ جسے چاہا اسے پانا، خود کو سنبھالنا بھول سی گئی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آخری محبت

آخری محبت کو

آخری جو خط لکھا

آخری دعاؤں پر اشک تھے امڈ آئے

دل پہ بوجھ بھاری تھا اک حصار طاری تھا

ہم تو مر گئے ہوتے وار اتنا کاری تھا

سانس لڑکھڑاتی تھی آس ڈگمگاتی تھی

آخری محبت کو

آخری جو خط لکھا

آنکھ سے رواں چشمے

کاغذوں پہ گرتے تھے

لفظ پھر نکھرتے تھے بارشوں میں گل جیسے

دل خموش تھا گویا

آتشیں پہاڑوں سے

زلزلوں کی آمد کا غلغلہ لگایا ہو

میڈیائی فتنے نے

گاڈ تخت پر بیٹھا مسکرائے جاتا تھا

صفدر بھٹی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

از قلم :صومی عباسی

دیکھو، اپنے حالات سے خود لڑنے والی لڑکی،

تم پر ہی اب سب امیدیں لگا بیٹھی ہے۔

وقت کو جیسے مٹھی میں قید کر لیا تھا اُس نے،

وقت کو گزرتا دیکھ کر، خود کو گزار بیٹھی ہے۔

اپنے ارمانوں کو دل میں چھپا کر چپ چاپ،

تمام خواہشوں سے کنارہ کر بیٹھی ہے۔

دلوں کے بھید بھلا کون یہاں جان سکا ہے،

بس رب جانتا ہے، وہ کس درد سے خود کو گزار بیٹھی ہے۔

نہ شکوہ لبوں پر، نہ کسی سے کوئی گلہ،

وہ اپنے نصیب کی ہر بات پہ سر جھکا بیٹھی ہے۔

عجب حوصلہ ہے اس خاموش سی صومی کا،

ٹوٹ کر بھی وہ خود کو سنبھال بیٹھی ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جستجو (نثری نظم)

ندیم یعقوب گوہر

تھکن کے بوجھ تلے

پاؤں رکے نہیں،

آگہی کی پیاس

مجھے انجانے راستوں پر لیے پھرتی ہے

میں خود کو پانے نکلا تھا

اور

کائنات کے بھید میں کھو گیا ہوں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

دل مرا آپ کا ہوا صاحب

عشق میں مبتلا ہوا صاحب

تیری زلفوں کے پیچ و خم میں کہیں

میرا دل لاپتا ہوا صاحب

زلفِ جاناں کا جب طلسم کھلا

عشق، رازِ خدا ہوا صاحب

اپنی یادوں کی سلطنت میں دیکھ

دیکھ دل بادشہ ہوا صاحب

تیرے ابرو کے خم کا کیا کہنا

دلِ عاشق فدا ہوا صاحب

عشق کی راہ میں قدم رکھا

ہر نفس رہنما ہوا صاحب

تیرے احسانِ بے کراں کے سبب

دل بھی اہلِ عطا ہوا صاحب

حسنِ مطلق کے اک تصور سے

ذہن روشن ضیا ہوا صاحب

حمزہ ارشد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

محمد سبحان شوق

آتا نہیں ہے مجھ کو انداز دلبرانہ

سکھلاو دلگی کے یہ آداب عاشقانہ

ہوتے ہی جارہے ہیں سب راز آپ افشاں

حیرت سے تک رہا ہے مجھ کو تو یہ زمانہ

دل کی یہ آرزو ہے چوکھٹ ملے یہ تیری

تو نے بنایا میرا انداز والہانہ

خاموش تھی فضا بھی ساکت تھے چاند تارے

کہنے لگی تھی خوشبو افسانۂ شبانہ

شب بھر کھلے رہے ہیں یادو کے سب دریچے

آیا نہ خواب بن کر وہ ماہِ دلبرانہ

میں تو مرید عاشق در حاضری میں تڑپا

کھلتا نہیں ہے مجھ پر ان کا یہ آستانہ

پاگل بنا رہی ہیں ان کی ادا عداوت

برپا ہے شور میرا میں ہو گیا بے گانہ

ہر سانس میں بسا ہے خوشبوئے وصلِ جاناں

مہکا ہوا ہے دل کا ویران آشیانہ

منزل نصیب ہو گی اک روز اے مرے دل

رکھ حوصلہ ہمیشہ رکھ عزمِ مخلصانہ

چاہت عطا ہو تیری مدحت کروں مسلسل

دیدار تم کرا دو اے حُسن دلبرانہ

برسوں کی تشنگی کو اک دید نے مٹایا

آنکھوں نے پی لیا ہے وہ جام جاودانہ

رخصت ہے آن پہنچی مرتا ہے شوق تیرا

پہلو میں بیٹھ جاو ہے یہ عرض عاجزانہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

المیہ ۔۔!!

عافیہ بمقابلہ ملالہ

۔

چھوڑ دو قصہِ عافیت دوستو

ہم تو شہوت پرستی کے شیدائی ہیں

بھول جاؤ اُسے وہ جو زنداں میں ہے

ہم ملالائی ہیں ہم ملالائی ہیں

چند پیسے لیے بیچ دی بیٹیاں

اور سودا کیا اپنے ایمان کا

بے وفا بے شرم اور ہرجائی ہیں

ہم ملالائی ہیں ہم ملالائی ہیں

بولو کیسے کریں ہم بیاں دوستو

ظلم کی جبر کی قہر کی داستاں

ہم مگن عشرتِ رنگ و رعنائی ہیں

ہم ملالائی ہیں ہم ملالائی ہیں

مانگتے رب سے ہیں عافیت ہم مگر

"عافیہ" کو بھلائے ہوئے ہیں زبیر

ہم محافظ نہیں ہم تو سودائی ہیں

ہم ملالائی ہیں ہم ملالائی ہیں

شاعر

زبیر احمد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عنوان: غزل

شاعرہ: سیدہ الماس فاطمہ

شہر: کراچی

پھر اس دل کو گزرا زمانہ ملا ہے

مجھے وہ پرانا فسانہ ملا ہے

جو بچھڑا تھا ہم سے وہ اپنا ہی گھر تھا

مگر اب تو بس اک بہانہ ملا ہے

وہ ہنسنا ہنسانا، وہ ملنا ملانا

محبت کا کیسا خزانہ ملا ہے

جدا کیوں ہوا وہ، یہ معلوم کب تھا

دلِ زار کو اک فسانہ ملا ہے

بہائے ہیں آنسو جو یادوں میں اس کی

ہمیں درد کا آشیانہ ملا ہے

کہاں کھو گیا وہ جو دیوانہ میرا

مجھے اب تو بس اک بیگانہ ملا ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کچھ لوگ بچھڑ کر بھی کہاں دور گئے ہیں

وہ دل میں اتر جائیں تو پھر دل سے نہیں جاتے

ــــــــــــــــــــــــــــــــ

ہم نے خاموشی میں بھی تجھ کو پکارا ہے بہت

تو نے آواز نہ سنی، یہ الگ بات ہے

ــــــــــــــــــــــــــــــــ

وہ شخص ملا تھا تو لگا زندگی مل گئی

بچھڑا تو یوں لگا کہ کوئی خواب تھا میرا

ــــــــــــــــــــــــــــــــ

عجیب شخص تھا، ہنستا رہا زمانے میں

اور اپنے درد کو تنہائیوں میں رکھتا رہا

ــــــــــــــــــــــــــــــــ

اب کسی سے بھی محبت کا تقاضا نہ کریں

دل نے سیکھا ہے شکستہ ہو کے سنبھلنا آخر

ــــــــــــــــــــــــــــــــ

کبھی فرصت ملے تو خود سے بھی مل لینا

یہ دنیا تو ہمیشہ تمہیں مصروف رکھے گی

از قلم: رئیس عنایت اللہ چاچڑ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

محمد سبحان شوؔق

میرؔ کے شہرِ سخن میں جو صدا باقی ہے

نوشہؔ کی فکر کا اب تک وہ دیا باقی ہے

ذوقؔ کے لفظوں میں ہے رنگ سُخن کی خشبو

اور مومنؔ کی اداوں کا مزا باقی ہے

دردؔ کے سوز سے روشن ہیں دلوں کے گوشے

دردؔ کی بزم میں بھی حرفِ دعا باقی ہے

اور معلوم ہے ہوتا یہ ظفرؔ سے ہم کو

تاج جاتا ہے مگر حرفِ وفا باقی ہے

داغؔ کے رنگِ تغزل کی قسم اے ساقی

عشق کی بزم میں اب تک یہ فضا باقی ہے

اور حالیؔ نے جو راہیں کی سخن سے روشن

اس پہ چلنے کا ابھی عزمِ رسا باقی ہے

طنز پنہاں تھا یوں اکبرؔ کہ سُخن میں ایسا

آج بھی شہر میں آئینہ نما باقی ہے

فکر اقبالؔ کی تاثیر ابھی زندہ ہے

بامِ افلاک پہ شاہیں کی صدا باقی ہے

جگرؔ و فانیؔ کی دنیا بھی عجب دنیا ہے

درد کم ہے مگر احساسِ وفا باقی ہے

فیضؔ و ناصرؔ سے ہے آباد یہ دل کا گلشن

میرؔ انیسؔ کا بھی مرثیہ نوا باقی ہے

جوشؔ و سوداؔ کہ بھی افکار کا چرچا ہیں سب

اہلِ معنی میں وہی ذوقِ عطا باقی ہے

ؔشوق یہ ورثۂ استادِ سخن ہے مجھ کو

دل میں یہ حرفِ محبت کی ضیا باقی ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

از قلم: مبراء عبدالقیوم

رات گہری ہے مگر دل کا نشاں باقی ہے

خاک میں آج بھی اک شعلۂ جاں باقی ہے

وقت نے چھین لیے مجھ سے کئی پیارے مگر

دل کے آنگن میں ابھی گزرا سماں باقی ہے

دھوپ میں لاکھ جلایا ہے مجھے راہوں میں

میرے سینے میں ابھی عزم جواں باقی ہے

جن چراغوں کو ہواؤں نے بجھا ڈالا تھا

ان کے ملبے میں بھی اک نور نہاں باقی ہے

رات جس قدر گہری ہو سحر تو ہوگی

میرے دل میں ابھی امید اماں باقی ہے

ٹوٹ کے بکھری نہیں دنیا ابھی تک فرحت

اس کے ان ابھی جینے کا گماں باقی ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عجائبات

تعمیر ملک و قوم کا یارا نہ کر سکے

وہ گل کھلائے جن کا ازالہ نہ کر سکے

ہر پل منافقانہ سیاست رہی عزیز

بیداریء ضمیر گوارا نہ کر سکے

وعدہ رفاہ عامہ کا مفقود ہو گیا

ذاتی مفاد منزل مقصود ہو گیا

دنیا کمندیں ڈالتی جاتی ہے چرخ پر

ہم کچھ تمیز ادنی و اعلیٰ نہ کر سکے

بے جا انا کے خول میں سمٹے رہے سدا

علم و ہنر کی شان دوبالا نہ کر سکے

آئین خسروی کا کچھ ادراک چاہیے

ذہن رسا و قامت افلاک چاہیے

اس بد نصیب قوم کو وہ رہنما ملے

جو پاسداریء لب گویا نہ کر سکے

محدود جن کی فکر و نظر کی بساط تھی

وہ سر زمین پاک کو اجلا نہ کر سکے

نسبت کسی کو قائد و اقبال سے نہیں

ہمسر ہوئے ہیں ذرے بھی خورشید کے کہیں

بے جا تعصبات میں کھوئے رہے سدا

روشن چراغ رشد و ہدایت نہ کر سکے

ملت کو دے سکے نہ اخوت کا درس حق

خلق نبی کی زندہ روایت نہ کر سکے

کیا کیا بنام مذہب و ملت ستم ہوا

کیا کیا نہ باب ظلم تھا جو کہ رقم ہوا

یونہی نہیں ہے طوق ملامت گلے پڑا

بر وقت کوئی فیصلہ اچھا نہ کر سکے

لعنت ہے ایسے فیصلہ سازوں کی سوچ پر

گھر پھونک کے بھی جو کہ اجالا نہ کر سکے

ناسور پالنے کا اب انجام دیکھیے

دھرتی لہو لہو ہے بہر گام دیکھیے

ہے عہد نارسائی مقدر بنا ہوا

محروم ہو گئے ہیں ہر اک آن بان سے

ہر روز بے گناہوں کا بہتا رہا لہو

رحمت برستی کیسے بھلا آسمان سے

کیا کیا چراغ علم و فراست کے بجھ گئے

چپ چاپ ہم تماشا مگر دیکھتے رہے

روز ازل سے اپنا سفینہ بھنور میں ہے

اب تک کوئی نجات کا ساحل نہیں ملا

حسرت نوید منزل مقصود کی رہی

دل کے چمن کا کوئی بھی غنچہ نہیں کھلا

اچھے دنوں کی اس میں مدت گزر گئی

بستی خیال و خواب کی یونہی اجڑ گئی

سارے جہاں کے ہم ہیں مسیحا بنے ہوئے

اپنے دکھوں کا جب کہ مداوا نہ کر سکے

باطل تصورات میں الجھے رہے سدا

ہم کوئی انقلاب بھی برپا نہ کر سکے

ایسے تہی ضمیر سے ہر فرد ہو گیا

احساس شرم، عرق ندامت بھی کھو گیا

بے رحم احتساب کا ڈالے گا ڈول کون

ننگی ہے اس حمام میں اشرافیہ تمام

رسیا ہے عیش کی تو مفادات کی اسیر

بے کس وطن میں عدل کا عنقا ہے انصرام

روشن ضمیر کوئی اگر رہنما ملے

ملت کا چاک چاک گریباں جبھی سلے

اک ہولناک ظلمت پیہم کے باوجود

کچھ اہتمام جشن چراغاں نہ کر سکے

دھندلا گئے ہیں اوج ثریا کے سارے خواب

ہم کوئی کار ہائے نمایاں نہ کر سکے

جب تک نہ آگہی کا اجالا نصیب ہو

کیسے طلوع صبح تمنا قریب ہو

سب اہل اختیار ہی مجرم وطن کے ہیں

جن کی انا سے گلشن ملت ہوا تباہ

جو رہ سکے نہ اپنی حدود و قیود میں

آئین سے کسی نے بھی رکھی نہ رسم و راہ

باہم رہے ہیں دست و گریباں کہ الاماں

اس کشمکش میں ہو گیا برباد گلستاں

احوال چیرہ دستیء اہل ہوس نہ پوچھ

فصل فساد و فتنہ بہرگام ہے بہت

اے کاش! کوئی سیل حوادث کو روک دے

ارض وطن پہ یورش آلام ہے بہت

ایسا سحاب رحمت پروردگار ہو

فصل بہار اور گلوں پر نکھار ہو

اختر چیمہ-

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نعت سرور کائنات

حضور آپ کا جو بھی غلام ہو جائے

وہ کیوں نہ اہل حرم کا امام ہو جائے

میں دوجہان کی دولت نثار کر ڈالوں

اگر نصیب مودت کا جام ہو جائے

بہار گلشن ہستی کا خود طواف کرے

اگر حضور کا نافذ نظام ہو جائے

قسم خدا کی یہ دنیا ہی خلد بن جائے

نبی کے عشق کی دولت جو عام ہو جائے

مجھے یقیں ہے کہ اس پر بہشت واجب ہے

قبول جس کا درود و سلام ہو جائے

حضور منزل مقصود تک رسائی ہو

ہو اک اشارہء ابرو تو کام ہو جائے

میں کائنات کی شاہی کو مار دوں ٹھوکر

اگر علی کے ملنگوں میں نام ہو جائے

کچھ اس لیے بھی درود و سلام پڑھتا ہوں

مری نجات کا کچھ انتظام ہو جائے

گماں یہ ہوتا ہے اکثر سلام پڑھتے ہوئے

کہ جیسے مجھ سے خدا ہم کلام ہو جائے

قسم خدا کی فرشتے اترنے لگتے ہیں

نبی کے ذکر کا جب اہتمام ہو جائے

یہی اثاثہ وسیلہ ہے میری بخشش کا

کہ ذکر آقا بصد احترام ہو جائے

جو نقش پائے محمد کو چوم لے اختر

گنہگار بھی قدسی مقام ہو جائے

اختر چیمہ- پاکستان

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

طلوعِ صبح کی باقی کوئی دلیل نہ ہو

مرے خدا کہیں یہ شام بھی طویل نہ ہو

کئی دنوں سے نہ پتھر نہ خار ہیں رہ میں

مَیں سوچتا ہٌوں کہ دشمن کہیں علیل نہ ہو

یہاں کے لوگ بھی ترسے ہٌوٸے ہیں پانی کو

وہ شہر کیا ہے جہاں کوٸی بھی سبیل نہ ہو

وہاں کے لوگ تخفظ مِیں ہو نہیں سکتے

جہاں پہ گھر ہو تو گھر کی کوٸی فصیل نہ ہو

میں اپنی جان کو خطرے مِیں دیکھتا ہٌوں تب

مرے وجود میں ألہام کی دلیل نہ ہو

سبھی یہ کہتے ہیں لکھی ہے موت سب کے لٸے

دعائیں مانگتے ہیں زندگی قلیل نہ ہو

جمال کا بھی ہے دشمن یہاں کا رسم و رواج

جہاں میں یوسفِ کنعاں سا بھی جمیل نہ ہو

یہ اقتدار کی کرسی تو چند روزہ ہے

حریص تم سا اے ساجد کوٸی عقیل نہ ہو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

صنف۔۔۔ آزاد نظم

عنوان ۔۔۔

محبت ایسا جذبہ ہے

از قلم ۔۔۔ سید آزاد گیلانی

محبت ایسا جذبہ ہے

کہ جس میں ماند پڑ جائیں

سبھی جذبے، سبھی رشتے

یہ خود ایک ایسا رشتہ ہے

جس کے سائے میں

پروان چڑھتے ہیں

سبھی بندھن، سبھی رشتے

وہی رشتے

جو بن جاتے ہیں

ایسی داستاں اکثر

جو بھولی بھی نہیں جاتی

پرانی بھی نہیں ہوتی

کہ اس میں امر ہو جائیں

ہر اک ساعت، سبھی لمحے

محبت سوچ ہے ایسی

کہ جو سوچی نہیں جاتی

مگر یہ سوچی جاتی ہے

جہاں تک سوچ کی حد ہے

کہ اس میں سوچ کی حد بھی

بہت محدود ہوتی ہے

ہر اک جانب نظر آئیں

فقط انداز دلبر کے

ادائیں جانِ جاناں کی

سبھی باتیں، سبھی لہجے

محبت ایک بارش ہے

یہ جب برسے تو یوں برسے

سمندر سے بھی بڑھ جائے

یہ اپنی بیکرانی میں

جہاں قطرہ نہیں رکھتا

کوئی معنی کوئی وقعت

مگر پھر بھی گنی جائیں

محبت کی سبھی بوندیں

محبت ایک موسم ہے

جو روح میں ٹھہر جاتا ہے

کہ پھر بھاتا نہیں کچھ بھی

کوئی موسم کوئی رت بھی

سبھی بیزار کرتے ہیں

اس موسم کے آنے تک

فقط اک آس رہتی ہے

اور اس میں بیت جاتے ہیں

کئی عمریں، کئی عرصے

محبت ایسا جذبہ ہے۔۔۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تماشا

یہ ایک طویل نظم ہے جس کے تین حصے لکھے جا چکے ہیں۔ پہلا حصہ احباب کی بصارتوں کی نذر

(پہلی فصل)

اک تماشہ دیکھو گے

آؤ میں دکھاتا ہوں

آدمی کی اصلیت آپ کو بتاتا ہوں

عرش پر بھی آدم تھا فرش پر بھی آدم ہے

وہ بنا تھا مٹی سے یہ مگر غلاظت سے

جو بنایا مٹی سے

اس کو تو ملائک نے سجدہ ریزیاں کی تھیں

جو مگر غلاظت سے

اس کی کیا بتاؤں میں

پھیلتی غلاظت جب بد بوئیں تو اٹھتی ہیں

ذہن کو یوں چڑھتی ہیں ہوش جاتے رہتے ہیں

پھر زوال آتے ہیں

اور کیا سناؤں میں

آدمی مسلماں بھی آدمی ہے کافر بھی

آدمی کرسچن بھی آدمی یہودی بھی

ایک ہی قبیلہ ہے

ایک ہی ہے خالق بھی ایک ہی ہے مالک بھی

ایک ہی پدر مادر

سارے مختلف لیکن عقل بھی جسامت بھی

مختلف زبانیں ہیں مختلف عقیدے بھی

اب تو بانٹ ڈالا ہے آدمی نے خالق بھی

جب خدا نے فرمایا وہ جو اک شجر سا ہے

دیکھنا کہ بھولے بھی اس کے پاس مت جانا

پر فتن کے دھوکے میں دیکھ یار مت آنا

عزتیں لٹاؤ گے جان سے بھی جاؤ گے

عصمتوں کا دشمن ہے وہ ثمر تُو مت کھانا

جاؤ اب جدھر مرضی خوب کھانا ہینا تم

تم تمہاری بیوی بھی بس مرا کہا سننا

اک عیار دشمن تھا ساتھ ہو لیا ان کے

دشمنی پرانی تھی اب نئی کہانی تھی

دام میں لیا اُن کو پھل کھلا دیا اُن کو

ستر کھل گئے فوراً

آدمی بھی ننگے ہیں عورتیں بھی ننگی ہیں

کاش ہم سمجھ پاتے

مصلحت خدائی کو بے دری جدائی کو

ہم مگر کہ آدم تھے ہم تو غفلتوں میں تھے

ہم کو ہوش کیا آتا

ڈوبتے ابھرتے تھے طمع کے سمندر میں

جس طرف دھکیلے تھا

قہرِ ناخدا ہم کو

کر دیا جدا ہم کو

تارِ عشق مستی سے اپنی یار ہستی سے

اور اب بھٹکتے ہیں راستوں کی گردش میں

پاؤں ڈگمگاتے ہیں دھول آنکھ بھرتی ہے

وہم ذہن ڈستا ہے کچھ نظر نہیں آتا

دوڑ میں لگے ہیں سب

کس طرف کو جانا ہے کچھ سمجھ نہیں آتا

راہ بر بھی رہرو بھی

بے لگام وحشی ہیں دندناتے پھرتے ہیں

دوزخی بھی کانوں کو ہاتھ اب لگاتے ہیں

آدمی ہوا پاگل دیکھئے ادھر صاحب

سر کشی بغاوت کا

وسوسہ جو ڈالا تھا مہربان نے دل میں

اس کی سب کرامت ہے

دیکھئے ندامت ہے

کچھ ذرا بھی چہروں پر ؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل

ابھی باقی ہے

از قلم: مبراء عبدالقیوم

رات گہری سہی، دل میں یقیں باقی ہے

خاک میں آج بھی اک شعلۂ جاں باقی ہے

وقت نے چھین لیے مجھ سے کئی پیارے مگر

دل کے آنگن میں ابھی حسین یاد باقی ہے

دھوپ نے لاکھ جلایا ہے مجھے راہوں میں

میرے اندر ابھی اک سایۂ جاں باقی ہے

زخم کھا کر بھی میں نے ہار نہیں مانی ہے

میرے سینے میں ابھی عزمِ جواں باقی ہے

جن چراغوں کو ہواؤں نے بجھا ڈالا تھا

ان کے ملبے میں بھی اک نورِ نہاں باقی ہے

میں نے خاموشی کو کمزوری نہیں سمجھا

میرے لہجے میں ابھی حرفِ بیاں باقی ہے

راہ مشکل ہے تو کیا، حوصلہ کم تو نہیں

میرے قدموں میں ابھی شوقِ رواں باقی ہے

رات جتنی بھی گہری ہو، سحر تو آئے گی

میرے دل میں ابھی یہ امیدِ اماں باقی ہے

فرحتؔ ٹوٹ کے بکھری تو نہیں ہے دنیا

اس کے اندر ابھی جینے کا گماں باقی ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ردا فاطمہ اعوان

گوجرنوالہ_کوٹ بولا

روز و شب یوں نہ اذیّت میں گزارے کوئی

قہقہے لب پہ ہوں، دل بھی نہ ہارے کوئی

زندگی درد میں جیسے ہے گزاری ہم نے

کاش تیری ہی خوشی کو بھی سہارے کوئی

میرا بچپن بھی، جوانی بھی بھٹکتے گزری

چند ایام مرے بھی تو سنوارے کوئی

قصّۂ درد ہیں اور قہقہے لب پر جاری

ایسے زخموں کو نہ دل میں بھی اتارے کوئی

کوئی شکوہ، کہ شکایت، یا رہوں بالکل چپ

رات کو خواب مرے بھی تو نکھارے کوئی

جب سے بچھڑا ہے وہ، بے چین ہے دل کی دھرتی

حسرتِ خواب ہے، آنکھوں میں اُتارے کوئی

ڈھلتے سورج کی شعاعوں کو بسا کر دل میں

ایسی شاموں کو ردا یوں نہ گزارے کوئی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تیرے گڈیاں پٹولے نی، مائیں میں چھڈ جانیں

تیرے ویہڑے دیاں رونقاں، مائیں میں چھڈ جانیں

چُوڑیاں تے پٹولے نی، نالے ریشمی ڈورے

مائیں تیرے پیار دے، کدوں مُکسن دورے

تیرے گڈیاں پٹولے نی، مائیں میں چھڈ جانیں

اپنے دل دے ٹکڑے نوں، مائیں میں چھڈ جانیں

پھل وی تیرے باغاں دے، خوشبو تیرے ویہڑے دی

یاد تیری نال وسدی، ہر اک سانجھ سویرے دی

تیرے گڈیاں پٹولے نی، مائیں میں چھڈ جانیں

ہاسے اپنے نیناں دے، مائیں میں چھڈ جانیں

رب رکھے تیری چھاں نوں، رب رکھے تیرا ویہڑا

واپس آ کے مائیں نئیں، وسنا تیرے ویہڑے

تیرے گڈیاں پٹولے نی، مائیں میں چھڈ جانیں

اپنی مٹی، اپنی ماں نئی بھل سکدی نی مائیں

جان محمد رمضان

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ اک معصوم سا بچہ ۔

جو میں بھی ہوں تم بھی ہو ۔

کہیں رک کیوں گیا ہے

کچھ انجان باتیں کہتے کہتے

کچھ انجان سی باتیں سناتے سناتے

یہی زیست کے ہیں پل

الجھ جاتے ہیں یونہی

کبھی کچھ بات کہتے کہتے

کبھی کچھ سنتے سناتے

بڑی عجیب سی ہے دنیا

بڑی عجیب سی ہیں یادیں

جو صرف میری ہیں

کبھی کھو کر ان یادوں میں

کبھی چڑیوں کی چہچہاہٹ

کبھی کانوں میں رس گھولتی ہوئ آوازیں

کچھ کہی کچھ ان کہی باتیں

جو میری ہیں بس میری ہیں

کیوں ری زینب کس سوچ میں گم ہو

کہیں وہ معصوم سا بچہ کہیں تم تو نہیں ہو

کلثوم افتخار

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔