حوثیوں کا مکہ اور مدینہ پر میزائل حملہ، ملبہ مسجد الحرام سے چند کلو میٹر دور گرا, سعودی سول ڈیفنس

سعودی عرب کے محکمہ شہری دفاع نے یمن کے حوثیوں کی جانب سے مکہ اور مدینہ کے علاقوں کی طرف داغے گئے دو بیلسٹک میزائلوں کو فضا میں تباہ کرنے کا دعویٰ کیا ہے۔

سعودی حکام کے مطابق تباہ شدہ میزائلوں کا ملبہ مکہ مکرمہ میں مسجد الحرام سے تقریباً 20 کلومیٹر دور وادی المغمس سمیت مختلف مقامات پر گرا۔

محکمہ شہری دفاع نے ہفتے کی شب سوشل میڈیا پلیٹ فارم ایکس پر ایک بیان میں کہا کہ مکہ اور مدینہ کے علاقوں میں شہری دفاع نے دہشت گرد حوثی ملیشیا کی جانب سے داغے گئے دو بیلسٹک میزائلوں کو روکنے کے نتیجے میں گرنے والے ملبے سے نمٹنے کے لیے کارروائی شروع کر دی۔

سعودی سول ڈیفنس کے مطابق میزائلوں کا ملبہ طائف کی وادی جلیل، جدہ کے النزہ محلے اور رابغ کے مستورہ مرکزمیں بھی گرا حکام کی جانب سےان واقعات میں ممکنہ جانی یز مالی نقصان سے متعلق تفصیلا ت فراہم نہیں کی گئیں۔

دوسری جانب حوثیوں نے مکہ مکرمہ اور مدینہ منورہ کو نشانہ بنانے کے الزامات کو بے بنیاد قرار دیتے ہوئے مسترد کردیا ہے،میزائلوں اور ڈرون کو تباہ کیے جانے کے واقعے سے متعلق سعودی حکام کے بیان اور حوثیوں کےمؤقف میں اختلاف سامنے آیا ہے، تاہم فراہم کردہ معلومات میں حملوں کے ہدف اور ان سے ہونے والے ممکنہ نقصان کی مزید تفصیلات موجود نہیں ہیں۔