بلیک میلنگ پر شادی سے قبل خودکشی کرنے کا سوچ رہی تھی، مومنہ اقبال

معروف پاکستانی اداکارہ مومنہ اقبال نے رکنِ پنجاب اسمبلی ثاقب چدھڑ پر ہراسانی اور بلیک میلنگ کے سنگین الزامات عائد کرتے ہوئے انکشاف کیا ہے کہ شادی سے 12 روز قبل شدید ذہنی دباؤ کا شکار تھی اور خودکشی کرنے کا سوچ رہی تھی۔

اداکارہ نے حالیہ انٹرویو میں شادی سے قبل پیش آنے والے شدید ذہنی دباؤ کے بارے میں گفتگو کی،انہوں نے دعویٰ کیا ہے کہ ثاقب چدھڑ کی جانب سےانہیں مسلسل ہراساں کیاگیا اور مبینہ طور پر ان کی نجی تصاویر اور دیگر ذاتی نوعیت کامواد سوشل میڈیا پر وائرل کرنےکی دھمکیا ں دی گئیں،ان مسلسل دھمکیوں اور ذہنی دباؤ کے باعث انہیں اپنی عزت اور نجی زندگی کے حوالے سے شدید خوف کا سامنا کرنا پڑا-

اداکارہ نے بتایا کہ ثاقب چدھڑ ان کے گھر رشتہ لے کر آئے تھے۔ اس موقع پر ان کے والد نے حتمی فیصلہ کرنے سے قبل کچھ وقت مانگا تھا۔

تاہم، چند ماہ بعد ہی اداکارہ کو ثاقب چدھڑ کی پہلی بیوی کی جانب سے پیغامات موصول ہونا شروع ہو گئے، جس سے ان پر یہ حقیقت کھلی کہ رکنِ اسمبلی پہلے سے شادی شدہ ہیں۔

مومنہ اقبال کے مطابق، اس تمام دباؤ اور تنازع کو ہوا دینے کا ایک مقصد یہ بھی تھا کہ ان کے منگیتر حمزہ یہ سب دیکھ کر ان کا ساتھ چھوڑ دیں، ثاقب چدھڑ کی توقعات کے برعکس، ان کے منگیتر حمزہ نے اس کڑے وقت میں ان کا بھرپور ساتھ دیا اور مشکل ترین حالات میں بھی ان کے قدم سے قدم ملا کر کھڑے رہے،اس مشکل صورتحال کا سامنا کرنے کے لیے مجھے حوصلہ اور طاقت فراہم کی۔