پی ٹی آئی لانگ مارچ، اسلام آباد میں سیکیورٹی سخت، اجتماعات پر پابندی عائد

تحریک انصاف (پی ٹی آئی) نے 27 ستمبر کو ہونے والا لانگ مارچ مؤخر کرنے کا فیصلہ کرلیا ہے، ذرائع کے مطابق اب لانگ مارچ 5 اکتوبر کو کیا جائے گا۔

اس سے قبل پی ٹی آئی خیبر پختونخوا کے سیکریٹری اطلاعات شوکت یوسفزئی نے کہا تھا کہ لانگ مارچ ختم کرنے کا کوئی فیصلہ نہیں کیا گیا اور تحریک انصاف مارچ کے لیے مکمل طور پر تیار ہے۔شوکت یوسفزئی کا کہنا تھا کہ لانگ مارچ پُرامن ہوگا اور اس میں سرکاری وسائل استعمال نہیں کیے جائیں گے۔ وفاقی حکومت مذاکرات کرے تو لانگ مارچ سے متعلق کوئی فیصلہ ہوسکتا ہے، تاہم کچھ حاصل کیے بغیر لانگ مارچ ختم نہیں کیا جائے گا۔انہوں نے کہا کہ تحریک انصاف کو کنٹینرز ہٹا کر راستے کھلوانے کی ضرورت نہیں، جہاں راستہ بند کیا جائے گا، وہیں دھرنا دیا جائے گا۔

اسلام آباد: سیاسی جماعتوں کی جانب سے لانگ مارچ اور دھرنوں کے اعلانات کے بعد وفاقی پولیس نے مختلف انتظامی و سیکیورٹی اخراجات کے لیے وزارت داخلہ سے ایک ارب روپے مانگ لیے۔

ذرائع کے مطابق وفاقی پولیس کی جانب سے وزارت داخلہ سے مانگی گئی رقم میں 1200 سے زائد کنٹینرز کے کرائے اور اضافی پولیس نفری کی رہائش کے اخراجات شامل ہیں۔ذرائع کا کہنا ہے کہ 29 ہزار سے زائد پولیس اہلکاروں کے کھانے اور ریت کی بوریوں کی خریداری کے اخراجات بھی اسی رقم میں شامل ہیں۔وفاقی پولیس کے مطابق مذکورہ رقم سے آنسو گیس کے شیل، نئی آنسو گیس گنز اور پیٹرول کے اخراجات بھی پورے کیے جائیں گے۔

اسلام آباد: پاکستان تحریک انصاف (پی ٹی آئی) کے ممکنہ لانگ مارچ کے پیش نظر فیض آباد میں تمام ہوٹلز بند کرا دیے گئے۔

پولیس ذرائع کے مطابق فیض آباد اڈے کے اطراف موجود تمام ہوٹلز بند کرا دیے گئے ہیں، جبکہ ریسٹورینٹس اور دکانداروں کو بھی آج شام تک کاروبار بند کرنے کی ہدایات جاری کی گئی ہیں۔پولیس ذرائع کا کہنا ہے کہ فیض آباد میں مسافر خانے اور ٹرانسپورٹ اڈے بھی آج رات تک بند رکھنے کی ہدایات دی گئی ہیں۔

خیال رہے کہ پی ٹی آئی نے 27 ستمبر کو اسلام آباد مارچ کا اعلان کر رکھا ہے۔ وفاقی وزرا کی جانب سے بھی کہا گیا ہے کہ پی ٹی آئی کارکنوں کو اسلام آباد آکر امن و امان کی صورتحال خراب کرنے کی اجازت نہیں دی جائے گی۔دوسری جانب مقامی انتظامیہ کی جانب سے بھی سیکیورٹی اور دیگر انتظامات کیے جا رہے ہیں۔ راولپنڈی اور اسلام آباد آنے والے اہم راستوں پر کنٹینرز لگا کر راستے بند کیے جانے کا سلسلہ جاری ہے۔

پشاور: پولیس نے 23 ستمبر کو لانگ مارچ کے لیے جانے والی غلیلوں سے بھری گاڑی کو تحویل میں لے لیا۔

پولیس ذرائع کے مطابق قانون نافذ کرنے والے اداروں نے احتجاجی سامان نذرِ آتش کرنے کے بعد گاڑی کے ڈرائیور کو گرفتار کر لیا، جبکہ گاڑی بھی قبضے میں لے لی گئی۔

اسلام آباد: پاکستان تحریک انصاف کے احتجاج کے پیش نظر دیگر صوبوں سے پولیس اہلکاروں کی اسلام آباد آمد کا سلسلہ جاری ہے۔

ذرائع کے مطابق اب تک مختلف صوبوں سے 15 ہزار پولیس اہلکار اسلام آباد پہنچ چکے ہیں، جنہیں شہر کے مختلف اسکولز اور کالجز میں ٹھہرایا گیا ہے۔ذرائع کا کہنا ہے کہ پی ٹی آئی احتجاج کے پیش نظر رینجرز بھی سکیورٹی پر تعینات ہوگی، جبکہ ریڈ زون کی سکیورٹی رینجرز اور فوج کے حوالے کیے جانے کا امکان ہے۔ضلعی انتظامیہ کے مطابق کسی بھی احتجاجی مظاہرین کو اسلام آباد میں داخلے کی اجازت نہیں دی جائے گی۔