وزیراعظم کی ذیابیطس کی روک تھام کے لیے حکمت عملی کی ہدایت
وزیراعظم محمد شہباز شریف نے ذیابیطس کی روک تھام کے لیے جامع اور مؤثر حکمتِ عملی مرتب کرنے کی ہدایت کی ہے۔
وزیراعظم نے کہا ہے کہ ذیابیطس جیسے بڑھتے ہوئے صحت کے چیلنج سے نمٹنے کے لیے علاج کے ساتھ ساتھ بیماری کی روک تھام پر خصوصی توجہ دینا وقت کی اہم ضرورت ہے۔ وزیراعظم سے ذیابیطس کے علاج کے بین الاقوامی اور قومی طبی ماہرین کے وفد نے ملاقات کی ہے۔وزیراعظم نے نوجوانوں، بالخصوص کالجوں اور جامعات کے طلبہ میں صحت مند طرزِ زندگی کو فروغ دینے کے لیے مؤثر اقدامات اٹھانے کی ہدایت کرتے ہوئے کہا کہ متوازن غذا، باقاعدہ جسمانی سرگرمی اور صحت مند معمولاتِ زندگی اپنانے کے حوالے سے عوامی آگاہی کو قومی سطح پر فروغ دیا جائے۔انہوں نے کہا کہ ٹیلی ویژن، ریڈیو، ڈیجیٹل پلیٹ فارمز اور دیگر ذرائع ابلاغ کے ذریعے ذیابیطس سے بچاؤ، بروقت تشخیص اور صحت مند طرزِ زندگی سے متعلق معلومات عام کی جائیں۔ وزیراعظم نے ذیابیطس کی روک تھام کے لیے قومی ترجیحات کے مطابق واضح پالیسی اور قابلِ عمل منصوبہ بندی کو ناگزیر قرار دیتے ہوئے کہا کہ اس ضمن میں متعلقہ ادارے تحقیق، آگاہی اور احتیاطی تدابیر کے حوالے سے مربوط حکمتِ عملی مرتب کریں۔ ذیابیطس کے بڑھتے ہوئے چیلنج سے مؤثر انداز میں نمٹنے کے لیے علاقائی اور بین الاقوامی تعاون کو فروغ دینا ضروری ہے۔ طبی وفد کے شرکاء نے ذیابیطس اور دیگر امراض کی روک تھام کے حوالے سے حالیہ اقدامات اور پالیسی کے نفاذ کی تعریف کرتے ہوئے پاکستان میں ذیابیطس کی روک تھام اور عوام کے لیے آگاہی مہم میں تعاون کے عزم کا اظہار کیا۔ وفد کے شرکاء نے گفتگو کرتے ہوئے کہا کہ پاکستانی طبی ماہرین پوری دنیا میں ذیابیطس اور دیگر امراض کے علاج اور روک تھام کے لیے انتہائی اہم خدمات سر انجام دے رہے ہیں۔ ماہرین کا وفد پاکستان میں اینڈوکرائنولوجی سیمینار میں شرکت کے لیے موجود ہے ۔وفد میں صدر بین الاقوامی اینڈوکرائنولوجی سوسائٹی ڈاکٹر سید عباس رضا کی قیادت میں مختلف ممالک کے طبی ماہرین شامل تھے۔
