اے دسمبر، مجھے نہ جانے کیوں تیرا انتظار ہوتا ہے،تحریر: سمیرا اکرام
نقطہ نظراصل بات یہ نہیں ہے کہ مجھے تیرا انتظار ہوتا ہے۔ اصل بات یہ ہے کہ تو میرا انتظار کرتا ہے۔
پورا سال تو ایک کونے میں بیٹھا رہتا ہے، اپنے چھوٹے سے تھیلے میں سردی، دھند، لمبی راتیں اور ادھوری باتیں سمیٹ کر۔ جنوری سے نومبر تک سب مہینے آتے ہیں، شور کرتے ہیں، اپنا کام کرتے ہیں اور چلے جاتے ہیں۔ مگر تو نہیں آتا۔ تو دروازے کے باہر کھڑا رہتا ہے، دستک دینے سے ڈرتا ہے۔ تجھے لگتا ہے کہ اگر تو آ گیا تو لوگ تجھ پر پھر سارا الزام لگا دیں گے۔ کہیں گے، دسمبر آ گیا، اس لیے اداس ہوں۔ اے دسمبر، تو سب سے زیادہ بدنام مہینہ ہے۔ لوگ اپنی اداسی کا نام تجھے دے دیتے ہیں۔ کوئی یہ نہیں کہتا کہ میں اداس ہوں۔ سب کہتے ہیں، دسمبر ہے نا، اس لیے اداس ہوں۔ تو چپ چاپ یہ الزام اپنے سر لے لیتا ہے، جیسے کوئی بڑا بھائی چھوٹے بھائی کی غلطی اپنے سر لے لے۔
مجھے تیرا انتظار اس لیے ہوتا ہے کہ تو مجھ سے ملنے سے ڈرتا ہے۔ مجھے لگتا ہے کہ اگر میں نے دروازہ نہ کھولا تو تو واپس چلا جائے گا، اور پھر پورا سال میں خود کو کوستی رہوں گی کہ میں نے اسے اندر کیوں نہیں بلایا۔
تو آتا ہے تو اپنے ساتھ کوئی تحفہ نہیں لاتا۔ تو اپنے ساتھ ایک آئینہ لاتا ہے۔ ایسا آئینہ جس میں انسان کو اپنا پورا سال نظر آتا ہے۔ باقی مہینے آئینہ نہیں دکھاتے، وہ صرف آگے کا راستہ دکھاتے ہیں۔ تو پیچھے کا راستہ دکھاتا ہے۔ تو کہتا ہے، دیکھو، یہ وہ جگہ ہے جہاں تم گرے تھے، یہ وہ جگہ ہے جہاں تم نے کسی کو معاف کیا تھا۔ اس آئینے کو دیکھنے کی ہمت سب میں نہیں ہوتی، اسی لیے لوگ تجھ سے ڈرتے ہیں۔
تیری خاص بات یہ ہے کہ تو کسی سے کچھ نہیں مانگتا۔ تو آ کر نہیں کہتا کہ میری تعریف کرو۔ تو آ کر ایک کونے میں بیٹھ جاتا ہے، جیسے کوئی مہمان جو جانتا ہو کہ میزبان تھکا ہوا ہے۔ تو کہتا ہے، تم تھک گئی ہو، تم بیٹھو، میں تمہارے لیے چائے بنا دیتا ہوں۔ مجھے تیرا انتظار اس لیے بھی ہوتا ہے کہ تو واحد مہینہ ہے جو واپس لوٹ کر آتا ہے اور پوچھتا ہے، تم نے مجھے یاد کیا؟ جنوری کبھی واپس آ کر نہیں پوچھتا۔ جون کبھی نہیں پوچھتا۔ صرف تو پوچھتا ہے۔ اور جب میں کہتی ہوں، ہاں، میں نے تمہیں بہت یاد کیا، تو تیری آنکھیں نم ہو جاتی ہیں، جیسے کسی بچے کو اس کا کھویا ہوا کھلونا مل گیا ہو۔
لوگ سمجھتے ہیں کہ دسمبر سردی لاتا ہے۔ مگر میں جانتی ہوں، دسمبر سردی نہیں لاتا، دسمبر لوگوں کے اندر کی سردی باہر نکالتا ہے۔ جو سردی پورا سال دل میں جمی رہتی ہے، تو اسے پگھلا دیتا ہے۔ تو اسے آنسو بنا کر بہا دیتا ہے۔ اسی لیے دسمبر میں رونا آسان لگتا ہے۔ کیونکہ تو اجازت دیتا ہے۔ تو کہتا ہے، رو لو، کوئی نہیں دیکھ رہا، میں ہوں نا۔
تو ایک ڈاکٹر کی طرح ہے، جس کے پاس کوئی دوا نہیں، صرف خاموشی ہے۔ وہ خاموشی جو کسی بھی دوا سے زیادہ کام کرتی ہے۔ تو کہتا ہے، باہر دیکھو، دھند ہے، مگر دھند کے پیچھے بھی دنیا ہے۔ بس تھوڑا انتظار کرو، دھند چھٹ جائے گی۔
اے دسمبر، مجھے تیرا انتظار اس لیے ہوتا ہے کہ تو میری ادھوری چٹھیوں کا ڈاکیا ہے۔ پورا سال میں نے جو باتیں کسی سے نہیں کہیں، جو خط میں نے لکھ کر پھاڑ دیے، جو دعائیں میں نے آدھی چھوڑ دیں، تو وہ سب اٹھا کر لاتا ہے اور میرے سامنے رکھ دیتا ہے۔ تو کہتا ہے، یہ لو، یہ تمہاری ہی باتیں ہیں، اب ان کا جواب خود دو۔
کبھی کبھی مجھے لگتا ہے کہ تو مہینہ نہیں ہے، تو ایک ریلوے اسٹیشن ہے۔ جہاں سال بھر کی ٹرینیں آ کر رکتی ہیں۔ کچھ لوگ اترتے ہیں، کچھ چڑھتے ہیں۔ اور تو وہ پلیٹ فارم ہے جہاں سب ایک لمحے کے لیے رک کر سوچتے ہیں، میں نے کہاں جانا ہے؟ تو کسی کو دھکا نہیں دیتا، تو بس سیٹی بجاتا ہے اور کہتا ہے، سوچ لو، ابھی وقت ہے۔
اور سب سے بڑی بات، تو مجھ سے ناراض نہیں ہوتا۔ میں پورا سال تجھے بھول جاتی ہوں۔ مگر تو پھر بھی آتا ہے۔ تو کہتا ہے، کوئی بات نہیں، میں جانتا تھا تم مصروف تھی۔ میں پھر آ گیا ہوں۔ اس لیے اے دسمبر، جب تو دور ہوتا ہے تو میں تیرا انتظار نہیں کرتی، میں اپنی ہی واپسی کا انتظار کرتی ہوں۔ مجھے لگتا ہے کہ تو آئے گا تو میں خود کو واپس مل جاؤں گی۔ وہ میں جو جنوری میں کھو گئی تھی، جو جون میں تھک گئی تھی، جو ستمبر میں رو پڑی تھی، وہ سب مجھے دسمبر میں ہی ملتی ہیں۔
اے دسمبر، مجھے نہ جانے کیوں تیرا انتظار ہوتا ہے، شاید اس لیے کہ تو میرا انتظار کرتا ہے۔ اور دنیا میں سب سے خوبصورت احساس یہی ہے کہ کوئی آپ کا انتظار کرے، بنا کسی شکوے کے، بنا کسی شرط کے۔
مزید پڑھیں




