شوگر ایک خاموش قاتل، میری آنکھوں دیکھی کہانیاں،تحریر: ڈاکٹر شجاع اختر اعوان

ذیابیطس یا شوگر ایک ایسا مرض ہے جو بظاہر خاموشی سے انسانی جسم میں جگہ بناتا ہے، لیکن جب اس کی پیچیدگیاں سامنے آتی ہیں تو مریض اور اس کے اہلِ خانہ کو شدید مشکلات کا سامنا کرنا پڑتا ہے۔ دنیا بھر میں لاکھوں افراد اس مرض کا شکار ہیں اور پاکستان بھی ان ممالک میں شامل ہے جہاں ذیابیطس کے مریضوں کی تعداد تشویش ناک حد تک بڑھ رہی ہے۔ ذیابیطس کے بارے میں آگاہی، بروقت تشخیص، مناسب علاج اور احتیاطی تدابیر اختیار کرنا وقت کی اہم ضرورت ہے۔ ذیابیطس دراصل خون میں گلوکوز کی مقدار بڑھ جانے کا مرض ہے۔ ایسا اس وقت ہوتا ہے جب جسم میں انسولین مناسب مقدار میں پیدا نہ ہو یا جسم انسولین کو مؤثر طریقے سے استعمال نہ کر سکے۔ انسولین وہ ہارمون ہے جو خون میں موجود گلوکوز کو جسم کے خلیوں تک پہنچانے میں مدد دیتا ہے۔ اگر شوگر مسلسل زیادہ رہے تو دل، گردے، آنکھیں، اعصاب اور خون کی نالیاں متاثر ہو سکتی ہیں۔ یہی وجہ ہے کہ ذیابیطس کو معمولی مرض سمجھنا بہت بڑی غلطی ہے۔ میں نے اپنی زندگی میں اس مرض کے کئی ایسے مریض دیکھے ہیں جن کی تکلیف دہ کہانیاں آج بھی میرے ذہن میں تازہ ہیں۔ میرے دوست ظفر اقبال دل کے عارضے میں مبتلا تھے اور ذیابیطس کی پیچیدگیوں کے باعث ان کے پاؤں کی انگلیاں کاٹنا پڑیں۔ ہمارے محترم استاد ملک منور صاحب، ساکن سقہ آباد، بھی شوگر کی پیچیدگیوں کے باعث اپنی ایک ٹانگ سے محروم ہوئے اور بعدازاں اس دنیا سے رخصت ہو گئے۔ میرے عزیز اور خوش مزاج دوست سید منصور شاہ، جو اٹک میلاد کمیٹی کی سرگرمیوں کا ایک اہم محرک تھے، ذیابیطس کے باعث گردوں کی خرابی کا شکار ہوئے اور بالآخر انتقال کر گئے۔ میرے گاؤں کی ایک عمر رسیدہ خاتون بھی اس مرض کی پیچیدگیوں کے باعث اپنی ٹانگ سے محروم ہوئیں اور زندگی کے باقی ایام شدید مشکلات میں گزارے۔ ایک اور دوست کی بینائی بھی اس مرض کے باعث متاثر ہوئی۔ یہ چند چہرے ہیں، ان درجنوں چہروں میں سے جنہیں میں ذاتی طور پر جانتا ہوں۔ ان میں سے ہر ایک کی اپنی ایک دردناک کہانی ہے۔ یہ وہ لوگ ہیں جن کی زندگیوں کو ذیابیطس نے کسی نہ کسی صورت متاثر کیا اور ان کے لیے معمول کی زندگی گزارنا مشکل بنا دیا۔ میں خود بھی گزشتہ تقریباً دس برس سے ذیابیطس کا مریض ہوں۔ اس عرصے میں اس مرض نے میری صحت کو متاثر کیا اور مجھے دل کے عارضے کا سامنا بھی کرنا پڑا، جس کے نتیجے میں دل کی سرجری کروانا پڑی۔ یہ میرا ذاتی تجربہ ہے، جس نے مجھے اس مرض کی سنگینی اور احتیاط کی اہمیت کا مزید احساس دلایا۔ ذیابیطس کی کئی وجوہات اور خطرے کے عوامل ہیں۔ خاندانی تاریخ، موٹاپا، غیر متوازن خوراک، جسمانی سرگرمی کی کمی اور عمر میں اضافہ اس مرض کے خطرے کو بڑھا سکتے ہیں۔ اس کی عام علامات میں بار بار پیشاب آنا، زیادہ پیاس لگنا، بھوک میں اضافہ، وزن کم ہونا، تھکاوٹ، نظر دھندلانا، زخموں کا دیر سے بھرنا اور ہاتھ پاؤں میں سنسناہٹ شامل ہیں۔ تاہم بعض افراد میں طویل عرصے تک کوئی واضح علامت ظاہر نہیں ہوتی، اسی لیے بروقت ٹیسٹ کروانا ضروری ہے۔ ذیابیطس کے مریضوں میں خون کی نالیوں اور اعصاب کو نقصان پہنچنے کا خطرہ بڑھ جاتا ہے۔ بعض مریضوں کے پاؤں تک خون کی روانی کم ہو جاتی ہے، جس سے جلد، پٹھوں اور انگلیوں کو مناسب خون اور آکسیجن نہیں مل پاتی۔ دوسری طرف اعصابی کمزوری کے باعث پاؤں میں چوٹ یا زخم کا احساس بھی نہیں ہوتا۔ اگر زخم کا بروقت علاج نہ کیا جائے تو انفیکشن اور دیگر پیچیدگیاں پیدا ہو سکتی ہیں، جن کی انتہائی صورت میں ٹانگ یا پاؤں کا حصہ کاٹنے کی نوبت بھی آ سکتی ہے۔ تمباکو نوشی اس خطرے کو مزید بڑھاتی ہے۔ اسی طرح ذہنی دباؤ اور ڈپریشن بھی ذیابیطس کے مریضوں کی صحت اور شوگر کے کنٹرول کو متاثر کر سکتے ہیں۔ میں نے اٹک کے گاؤں مرزا کے ایک ایسے شخص کو بھی دیکھا ہے جو شوگر کے خلاف اپنی جنگ میں غیر معمولی طور پر متحرک رہے۔ وہ تقریباً چالیس برس تک روزانہ بیس کلومیٹر پیدل چلتے رہے۔ صبح اور شام سنجوال کینٹ سے ڈسٹرکٹ جیل تک ان کی پیدل آمدورفت جاری رہتی۔ موسم کی سختی بھی ان کے عزم کو متزلزل نہ کر سکی۔ ان کی یہ مستقل مزاجی اپنی جگہ ایک مثال ہے، تاہم ہر مریض کو اپنی صحت اور جسمانی استعداد کے مطابق ورزش کا انتخاب ڈاکٹر کے مشورے سے کرنا چاہیے۔ میرے دوست محمد طاہر، جنہیں طاہر لا ھوتی کے نام سے بھی جانا جاتا ہے، شہر کی ادبی اور سماجی محفلوں میں ایک معروف اور محبوب شخصیت ہیں۔ وہ بھی پیدل چلنے کی عادت کو اپنائے ہوئے ہیں اور اپنے دوستوں کو بھی اس طرف راغب کرتے رہتے ہیں۔ شہر میں بزرگ شہریوں کا ایک باقاعدہ واکنگ گروپ بھی موجود ہے، جس کے بیشتر اراکین ذیابیطس کے مریض ہیں۔ یہ اچھی بات ہے کہ لوگ اپنی صحت کے لیے وقت نکالتے ہیں اور ایک دوسرے کی حوصلہ افزائی کرتے ہیں۔ ذیابیطس کے مریضوں کے لیے متوازن غذا، مناسب جسمانی سرگرمی اور وزن کو قابو میں رکھنا انتہائی اہم ہے۔ میٹھی اشیا، چینی اور میٹھے مشروبات کے استعمال میں کمی لانی چاہیے۔ سبزیاں، دالیں، مناسب مقدار میں پھل اور ثابت اناج خوراک کا حصہ ہونے چاہییں۔ روٹی اور چاول کی مقدار پر بھی توجہ دینا ضروری ہے۔ اسی طرح ہفتے میں کم از کم 150 منٹ کی معتدل جسمانی سرگرمی، مثلاً تیز قدموں سے پیدل چلنا، عمومی طور پر مفید سمجھی جاتی ہے۔ تاہم جن مریضوں کو دل کا عارضہ یا ذیابیطس کی دیگر پیچیدگیاں لاحق ہوں، انہیں ورزش کی نوعیت اور دورانیے کے بارے میں اپنے معالج سے مشورہ ضرور کرنا چاہیے۔ ذیابیطس کے مریضوں کے لیے صرف پرہیز اور ورزش ہی کافی نہیں، بلکہ خون میں شوگر کی سطح پر مسلسل نظر رکھنا بھی ضروری ہے۔ اس مقصد کے لیے ڈاکٹر کے مشورے کے مطابق گلوکوز کی باقاعدہ جانچ اور لیبارٹری ٹیسٹ کرواتے رہنا چاہیے۔ خاص طور پر HbA1c ٹیسٹ بہت اہم ہے، جو گزشتہ تقریباً تین ماہ کے دوران خون میں شوگر کی اوسط سطح بتاتا ہے۔ عموماً یہ ٹیسٹ ہر تین ماہ بعد کروایا جاتا ہے تاکہ معلوم ہو سکے کہ شوگر کس حد تک قابو میں ہے اور علاج میں کسی تبدیلی کی ضرورت تو نہیں۔ گھر پر گلوکوز چیک کرنے کا وقفہ مریض کی حالت اور علاج کے مطابق مختلف ہو سکتا ہے، اس لیے معالج کی ہدایات پر عمل کرنا ضروری ہے۔ باقاعدہ ٹیسٹ، ڈاکٹر سے رابطہ اور علاج پر پابندی ہی پیچیدگیوں سے بچاؤ کا مؤثر راستہ ہیں۔ مریضوں کو چاہیے کہ روزانہ اپنے پاؤں کا معائنہ کریں، مناسب اور آرام دہ جوتے پہنیں اور کسی بھی زخم، سوجن یا انفیکشن کو معمولی سمجھ کر نظر انداز نہ کریں۔ تمباکو نوشی سے مکمل اجتناب بھی ضروری ہے۔ اگر شوگر قابو میں نہ رہے تو خود سے دواؤں میں کمی بیشی کرنے کے بجائے معالج سے رجوع کرنا چاہیے۔ ذیابیطس ایک قابلِ انتظام مرض ہے۔ اس کے ساتھ زندگی گزاری جا سکتی ہے، بشرطیکہ مریض بروقت تشخیص، باقاعدہ علاج، متوازن غذا، جسمانی سرگرمی اور احتیاط کو اپنی زندگی کا حصہ بنائے۔ ہمیں اپنے گھروں، خاندانوں اور معاشرے میں اس مرض کے بارے میں آگاہی پھیلانی چاہیے تاکہ لوگ اس کی علامات کو پہچانیں، بروقت ٹیسٹ کروائیں اور پیچیدگیوں سے محفوظ رہ سکیں۔ میری ان گزارشات کا مقصد خوف پھیلانا نہیں بلکہ اپنے مشاہدات اور تجربات کی روشنی میں لوگوں کو خبردار کرنا ہے۔ ذیابیطس کو نظر انداز کرنا خطرناک ہو سکتا ہے، لیکن بروقت توجہ اور مسلسل احتیاط سے اس کے نقصانات کو بڑی حد تک کم کیا جا سکتا ہے۔ ہمیں یاد رکھنا چاہیے کہ صحت اللہ تعالیٰ کی بہت بڑی نعمت ہے، اس کی حفاظت ہماری ذمہ داری ہے۔ صحت ہے تو زندگی ہے۔